ກອງພັນໃຫຍ່102 ກອງພົນທະຫານຮາບທີ1 ໄດ້ຈັດພີທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949 – 20 ມັງກອນ 2024) ແລະ ວັນສ້າງຕັ້ງກອງພັນໃຫຍ່102 ຄົບຮອບ 05 ປີ ( 14ມີນາ 2019– 14 ມີນາ2024 ) ຂຶ້ນຢ່າງເປັນທາງການ,ໃນວັນທີ15ກຸມພາ 2024 , ໂດຍການເປັນປະທານຂອງ ພົນຈັດຕະວາ ວົງຈັນ ພັນຈັນທະມານ ຫົວໜ້າການເມືອງກອງພົນທະຫານຮາບທີ1, ມີບັນດາຄະນະພັກ-ຄະນະບັນຊາກອງພົນ, ກອງພັນໃຫຍ່102, ເຈົ້າເມືອງແມດ ພ້ອມດ້ວຍຄະນະພັກ-ຄະນະບັນຊາປ້ອງກັນຊາດ-ປ້ອງກັນຄວາມສະຫງົບເມືອງແມດ ແລະ ເມືອງກາສີ, ພະນັກງານປະຕິວັດອາວຸໂສບຳນານ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ພະນັກງານລັດຖະກອນ, ນັກທຸລະກິດ ແລະ ມວນຊົນຊາວເມືອງແມດ ແຂວງວຽງຈັນ ເຂົ້າຮ່ວມ.
ໃນພິທີ ພັນເອກ ຄໍາຊາວ ລິນທະກຸນແກ້ວ ຫົວໜ້າການທະຫານ ກອງພັນໃຫຍ່102 ກ່າວໃນພິທີຄັ້ງນີ້ວ່າ: ກ່ອນໜ້ານີ້ 75 ປີ ໂດຍປະຕິບັດຕາມຂໍ້ຕົກລົງຂອງພັກກອມມູນິດອິນດູຈີນ ແລະ ເພື່ອຕອບສະໜອງຕາມຄວາມຮຽກຮ້ອງຕ້ອງການກັບພາລະກິດຕໍ່ສູ້ກູ້ຊາດ ແລະ ຍາດເອົາເອກະລາດ, ອິດສະລະພາບ ແລະຜືນແຜນດິນອັນຄົບຖ້ວນຂອງຊາດລາວເຮົາ. ວັນທີ 20 ມັງກອນ 1949 ກອງລາດຊະວົງ ໄດ້ສ້າງຕັ້ງຂຶ້ນຢ່າງເປັນທາງການຢູ່ເຂດທີໝັ້ນຕາແສງລາວຮຸ່ງ ເມືອງຊຽງຄໍ້ ແຂວງຫົວພັນ, ເຊິ່ງແມ່ນກອງທັບປະຊາຊົນລາວໃນປະຈຸບັນ ໂດຍແມ່ນປະທານໄກສອນ ພົມວິຫານເປັນຜູ້ສ້າງຕັ້ງ ແລະ ບັນຊາໂດຍກົງ,ພວກເຮົາຂໍຈາລຶກ ແລະ ຮູ້ບຸນຄຸນຕໍ່ ປະທານ ໄກສອນ ພົມວິຫານ ທີ່ໄດ້ສ້າງຕັ້ງ ແລະ ຊຸບຫລໍ່ກໍ່ສ້າງກອງທັບປະຊາຊົນລາວໃຫ້ເຕີບໃຫຍ່ຂະຫຍາຍຕົວມາເຖິງທຸກວັນນີ້, ພ້ອມທັງໄດ້ເລົ່າຄືນເຖິງມູນເຊື້ອຕົ້ນກຳເນີດ ແລະການເຕີບໃຫຍ່ເຂັ້ມແຂງຂອງກຳລັງປະກອບອາວຸດກອງທັບປະຊາຊົນລາວ ທີ່ໄດ້ພ້ອມກັບປະຊາຊົນລາວບັນດາເຜົ່າຕໍ່ສູ້ກູ້ຊາດໃນເມື່ອກ່ອນກໍ່ຄືການປະຕິບັດ 2 ໜ້າທີ່ຍຸດທະສາດປົກປັກຮັກສາ ແລະສ້າງສາພັດທະນາປະເທດຊາດຢ່າງສົມກຽດ;ຕະຫຼອດ 75 ປີກອງທັບໄດ້ອອກແຮງປັບປຸງກໍ່ສ້າງກຳລັງປະກອບອາວຸດຂອງຕົນໃຫ້ເຕີບໃຫຍ່ເຂັ້ມແຂງ ແລະ ກ້າວຂຶ້ນເປັນກອງທັບທີ່ມີແບບແຜນທັນສະໄໝ. ພ້ອມທັງ ຍົກໃຫ້ເຫັນເຖິງມູນເຊື້ອ ແລະ ຜົນສໍາເລັດຫຼາຍດ້ານທີ່ກອງພັນໃຫຍ່102ຍາດມາໄດ້ຕະຫຼອດໄລຍະ 05ປີຜ່ານມາ, ເຊິ່ງຄະນະພັກ-ຄະນະບັນຊາໃນແຕ່ລະລຸ້ນກໍ່ໄດ້ເອົາໃຈໃສ່ຕັ້ງໜ້າເຄື່ອນໄຫວປະຕິບັດໜ້າທີ່ການເມືອງທີ່ພັກ-ລັດ ແລະ ການຈັດຕັ້ງຂັ້ນເທິງມອບໝາຍໃຫ້, ປະກອບສ່ວນເຂົ້າໃນການປະຕິບັດສອງໜ້າທີ່ຍຸດທະສາດຂອງພັກຄື: ປົກປັກຮັກສາ ແລະ ສ້າງສາພັດທະນາປະເທດຊາດ ຕິດພັນກັບການເຄື່ອນໄຫວ ປັບປຸງກໍ່ສ້າງກົມກອງ ໃຫ້ມີຄວາມໜັກແໜ້ນເຂັ້ມແຂງ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ, ເອົາໃຈໃສ່ສຶກສາອົບຮົມການເມືອງນຳພາແນວຄິດ ໃຫ້ພະນັກງານ-ນັກຮົບ, ປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ, ຂໍ້ກຳນົດກົດລະບຽບຂອງກອງທັບ ແລະ ກົມກອງເຮັດໃຫ້ສະພາບການເມືອງ ແນວຄິດຂອງພະນັກງານ ສະມາຊິກພັກ-ນັກຮົບ ມີຄວາມສະຫງົບ ເຊື່ອໝັ້ນຕໍ່ການນຳພາຂອງພັກ, ຮັບປະກັນເຮັດໃຫ້ການປັບປຸງກໍ່ສ້າງອົງການຈັດຕັ້ງພັກມີຄວາມໜັກແໜ້ນ.ເສດຖະກິດ-ສັງຄົມກໍ່ໄດ້ຮັບການຂະຫຍາຍຕົວຂຶ້ນມາເປັນກ້າວໆ.
ໂອກາດສຸດທີ່ສໍາຄັນນີ້,ຜູ້ເຂົ້າຮ່ວມຍັງໄດ້ຮັບຊົມການເດີນສວນສະໜາມຈາກກ້ອນກຳລັງຕ່າງໆ ແລະ ຊົມການສະແດງຫັດກາຍມືເປົ່າ 2 ບົດ 24 ຈັງຫວະ, ຫັດກາຍມີປືນ, ຫັດກາຍ 4 ທິດ 28ຈັງຫວະ, ມວຍ-ປ້ອງກັນຕົວຂອງເຫຼົ່າຮົບສຶບຂ່າວ-ຕີພິເສດ ຕື່ມອີກ.
ໂດຍ: ຊັນໂດ ລາດຊະພູມີ.
