ໃນລະວ່າງວັນທີ 8-9 ພະຈິກ 2023 ນີ້, ພັນເອກ ຈະເລີນສຸກ ວັງເວີນໂຂງ ຫົວໜ້າການທະຫານກອງໂທລະພາບກອງທັບປະຊາຊົນລາວ ພ້ອມດ້ວຍຄະນະ ໄດ້ເຄື່ອນວຽກຊຸກຍູ້ວຽກງານຂ່າວສານ-ສື່ມວນຊົນ ຢູ່ກອງພົນທະຫານຮາບທີ 1 ໃຫ້ການຕ້ອນຮັບ ໂດຍ ພົນຈັດຕະວາ ວົງຈັນ ພັນຈັນທະມານ ຫົວໜ້າການເມືອງກອງພົນທະຫານຮາບທີ 1 ພ້ອມດ້ວຍຄະນະ.
ພັນເອກ ຈະເລີນສຸກ ວັງເວີນໂຂງ ກ່າວວ່າ: ໂອກາດລົງມາເຮັດວຽກຄັ້ງນີ້ຈຸດປະສົງຫຼັກ ກໍ່ເພື່ອສໍາຫຼວດສະຖານທີ່ ແລະ ຕິດຕັ້ງຈານດາວທຽມ ເພື່ອເປັນການຂະຫຍາຍຕາໜ່າງຂ່າວໃຫ້ກ້ວາງຂວາງ ຫຼື ສ້າງຄວາມສະດວກໃຫ້ແກ່ວຽກງານຂ່າວສານ-ສື່ມວນຊົນຢູ່ໃນກົມກອງໃຫ້ມີຄວາມສະດວກ ແລະ ທັນສະໄໝ ສາມາດຕອບສະໜອງ ຂ່າວສານໃຫ້ເຂັ້ນເທິງ ແລະ ສັງຄົມ ໄດ້ຢ່າງວ່ອງໄວທັນກັບສະພາບການ ແລະ ມີຄວາມປອດໄພສູງ, ເຮັດໃຫ້ບັນຍາກາດຂະບວນການ ແລະ ຜົນສໍາເລັດວຽກງານດ້ານຕ່າງຂອງກົມກອງມີຄວາມຟົດຟື້ນແຂງແຮງ.
ໂອກາດດຽວກັນນີ້ ພົນຈັດຕະວາ ວົງຈັນ ພັນຈັນທະມານ ຫົວໜ້າການເມືອງກອງພົນທະຫານຮາບທີ 1 ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນຕໍ່ກະຊວງປ້ອງກັນປະເທດ ກໍ່ຄືກອງໂທລະພາບກອງທັບ ທີ່ມີຄວາມເປັນຫ່ວງເປັນໃຍໄດ້ນໍາເອົາຈານດາວທຽມ ມາມອບໃຫ້ກອງພົນທະຫານຮາບທີ 1 ເພື່ອນໍາໃຊ້ເຂົ້າໃນການເຄື່ອນໄຫວວຽກງານຂ່າວສານ-ສື່ມວນຊົນໃຫ້ມີຄວາມສະດວກສະບາຍຂຶ້ນກ່ວາເກົ່າ.
ຈານດາວທຽມດັ່ງກ່າວແມ່ນມາຈາກ ບໍລິສັດ ດາວທຽມລາວ-ເອເຊຍ ປາຊີຟິກ ດ້ວຍລະບົບສົ່ງສັນຍານຜ່ານດາວທຽມ ( VSAT System )ສາມາດອັບໂຫຼດວີດີໂອ ໄດ້ 02 MB ແລະ ດາວໂຫຼດວີດີໂອ ໄດ້ 7-8 MB, ມູນຄ່າທັງໝົດ 720.000.000 ກີບ ( ເຈັດຮ້ອຍຊາວລ້ານກີບ ).
ຈາກນັ້ນ ຫົວໜ້າການທະຫານກອງໂທລະພາບກອງທັບປະຊາຊົນລາວ ແລະຄະນະ ໄດ້ເຄື່ອນໄຫວສໍາຫຼວດສະຖານທີ່ຕົວຈິງ ແລະ ຕິດຕັ້ງຈານດາວທຽມ ສໍາເລັດຕາມຄາດໝາຍ ໂດຍວິຊາການຈາກບໍລິສັດ ດາວທຽມລາວ-ເອເຊຍ ປາຊີຟິກ ສົມທົບກັບ ວິຊາການເຕັກນິກ ມາຈາກກອງໂທະພາບກອງທັບ ປະຊາຊົນລາວ.
ໂດຍ: ໂກຮັງ ພັນທະວົງ.
