ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ລະຫວ່າງ ວັນທີ 13-14 ທັນວາ 2023 ນີ້, ພົນຈັດຕະວາ ອຸ່ນຈັນ ແດງວັນສົມ ຫົວໜ້າການທະຫານກອງພົນທະຫານຮາບທີ1 ໄດ້ເຄື່ອນໄຫວໂຄສະນາປາຖະກະຖາ ມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີຢູ່ກອງພັນ 13 ແລະ ໂຮງຮຽນມັດທະຍົມສົມບູນບ້ານຊ່ວາງເມືອງວັງວຽງ ແຂວງວຽງຈັນ, ມີພັນຕີ ພະສິດ ລໍຈິງຄູນພັນ ຫົວໜ້າພະແນກໂຄສະນາອົບຮົມກອງພົນທະຫານຮາບທີ1;ເຊິ່ງໃຫ້ການຕ້ອນຮັບ ແລະ ເຂົ້າຮ່ວມຮັບຝັງຂອງຄະນະພັກ-ຄະນະບັນຊາ, ພະນັກງານ-ນັກຮົບກອງພັນ 13, ອໍານາດການປົກຄອງບ້ານອ້ອມຂ້າງ ແລະ ຜູ້ອໍານວຍການໂຮງຮຽນ, ຄູອາຈານ, ນັກຮຽນ ຈໍານວນ 450 ກວ່າຄົນ.
ກອງທັບປະຊາຊົນລາວ ກໍາເນີດເກີດມາຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ພາຍໃຕ້ການນໍາພາ ແລະ ສຶກສາອົບຮົມຈາກພັກປະຊາຊົນປະຕິວັດລາວ ຍາມໃດກໍ່ມີຄວາມຈົງຮັກພັກດີ, ບໍລິສຸດຜຸດຜ່ອງ, ມີລະບຽບແບບແຜນທີ່ເຂັ້ມງວດ, ເຊື່ອໝັ້ນຕໍ່ການນໍາພາຂອງພັກ, ເຊື້ອໝັ້ນຕໍ່ກໍາລັງແຮງຂອງຕົນ, ມີຄວາມເດັດດ່ຽວໜຽວແໜ້ນ, ພິລະອາດຫານ, ມີນໍ້າໃຈເສຍສະຫຼະອັນສູງສົ່ງ ເພື່ອຊາດ, ເພື່ອປະຊາຊົນ, ເພື່ອອຸດົມການສັງຄົມນິຍົມ. ແມ່ນເຄື່ອງມືອັນແຫຼມຄົມຂອງພັກປະຊົນຊົນປະຕິວັດລາວ ຍາມໃດກໍ່ມີຄວາມສາມັກຄີຊ່ວຍເຫຼືອປະຊາຊົນບັນດາເຜົ່າຢ່າງກົມກຽວ. ເຮັດໃຫ້ກອງທັບປະຊາຊົນຊົນລາວ ກາຍເປັນກອງທັບທີ່ແຂງແກ່ນ ຍິ່ງສູ້ຮົບກໍ່ຍິ່ງເຕີບໃຫຍ່ເຂັ້ມແຂງ, ຍິ່ງສູ້ຮົບກໍ່ຍິ່ງໄດ້ຮັບໄຊຊະນະ ແລະ ເຕີບໃຫຍ່ຂະຫຍາຍຕົວຕະຫຼອດມາ.ເຊິ່ງຜ່ານພຶດຕິກໍາແຫ່ງການຕໍ່ສູ້ກູ້ຊາດອັນຍືດເຍື້ອຍາວນານ, ດຸເດືອດຂ້ຽວຂາດ ແລະ ອົງອາດມີໄຊ ກາຍເປັນກອງທັບວິລະຊົນຂອງຊາດລາວວິລະຊົນຄົນລາວພິລະອາດຫານ ສາດມານໍພາປະຊົນຊົນລາວບັນດາເຜົ່າຫຼຸດພົ້ນອອກຈາກແອກຄອບຄອງຂອງພວກຈັກກະພັກ, ພວກສັກດີນາຕ່າງດ້າວ ແລະ ສະຖາປະນາ ສປປລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.
ວັນທີ 20 ມັງກອນ ແມ່ນສັນຍາລັກ ແຫ່ງອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ແມ່ນຂີດໝາຍປະຫວັດອັນສໍາຄັນ ເປັນບັນໄດກ້າວໄປສູ່ຄວາມອົບອຸ່ນ, ຮຸ່ງເຮືອງ, ສີວິໄລ ຂອງປວງຊົນລາວບັນດາເຜົ່າໃນຂອບເຂດທົ່ວປະເທດ.
ການເຄື່ອນໄຫວປາຖະກະຖາໃນຄັ້ງນີ້ກໍ່ເພື່ອລະນຶກເຖິງມູນເຊື້ອອັນດີງາມທາງດ້ານປະຫວັດສາດ, ຜົນງານແຫ່ງການເຕີບໃຫຍ່ຂະຫຍາຍຕົວ ແລະ ເຂັ້ມແຂງຮອບດ້ານຂອງກອງທັບ ບົນຍ່ານທາງ ປະຫວັດສາດ ແລະ ເພື່ອເສີມຂະຫຍາຍມູນເຊື້ອ, ທາດແທ້ຂອງການປະຕິວັດ ໃຫ້ຄູ-ອາຈານ, ນັກຮຽນ ແລະ ພະນັກງານ-ນັກຮົບ ຜູ້ທີ່ເປັນລູກຫຼານຂອງພໍ່ແມ່ປະຊາຊົນ, ເປັນໜໍ່ແໜງຂອງປະເທດຊາດ ເຊື່ອມຊຶມກໍາແໜ້ນມູນເຊື້ອອັນສະຫງ່າງາມ ແລະ ສະຫວ່າງສະໄຫວ ຂອງກອງທັບປະຊາຊົນລາວໃຫ້ຝັງເລິກໄວ້ໃນແນວຄິດຈິດໃຈ ແລະ ກາຍເປັນຄວາມຊົງຈໍາທີ່ບໍ່ມີວັນຫຼົງລືມ.
ໂດຍ: ໂກຮັງ ພັນທະວົງ.