ລະຫວ່າງ ວັນທີ 21-22 ທັນວາ 2023 ນີ້, ພັນເອກ ພູວຽງ ດາວັນນາຮັກ ຄະນະພັກກອງພົນ ຫົວໜ້າຫ້ອງພະລາທິການ ກອງພົນທະຫານຮາບທີ 1 ພ້ອມດ້ວຍຄະນະ ໄດ້ເຄື່ອນໄຫວໂຄສະນາປາຖະກະຖາ ຫວນຄືນມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ຢູ່ໂຮງຮຽນມັດທະຍົມສົມບູນຜາຕັ້ງ ແລະໂຮງຮຽນມັດທະຍົມສົມບູນທ່າເຮືອ ເມືອງວັງວຽງ ແຂວງວຽງຈັນ; ເຊິ່ງໃຫ້ການຕ້ອນຮັບ ແລະ ເຂົ້າຮ່ວມຮັບຟັງ ຂອງຄະນະອໍານວຍການໂຮງຮຽນ, ຄູອາຈານ ແລະນັກຮຽນ ຈໍານວນ 500 ກວ່າຄົນ.
ພັກເອກ ພູວຽງ ດາວັນນາຮັກ ໄດ້ເຫຼົ່າຄືນປະຫວັດຄວາມເປັນມາບົນເສັ້ນທາງແຫ່ງການປະຕິວັດ ຂອງກອງທັບປະຊາຊົນລາວ ຕະຫຼອດໄລຍະຜ່ານມາ ວ່າ: ກອງທັບປະຊາຊົນລາວ ກໍາເນີດມາຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ພາຍໃຕ້ການນໍາພາ ແລະ ສຶກສາອົບຮົມຈາກພັກປະຊາຊົນປະຕິວັດລາວ ຍາມໃດກໍ່ມີຄວາມຈົງຮັກພັກດີ, ບໍລິສຸດຜຸດຜ່ອງ, ມີລະບຽບແບບແຜນທີ່ເຂັ້ມງວດ, ເຊື່ອໝັ້ນຕໍ່ການນໍາພາຂອງພັກ, ເຊື້ອໝັ້ນຕໍ່ກໍາລັງແຮງຂອງຕົນ, ມີຄວາມເດັດດ່ຽວໜຽວແໜ້ນ, ພິລະອາດຫານ, ມີນໍ້າໃຈເສຍສະຫຼະອັນສູງສົ່ງ ເພື່ອຊາດ, ເພື່ອປະຊາຊົນ, ເພື່ອອຸດົມການສັງຄົມນິຍົມ. ແມ່ນເຄື່ອງມືອັນແຫຼມຄົມຂອງພັກປະຊົນຊົນປະຕິວັດລາວ ຍາມໃດກໍ່ມີຄວາມສາມັກຄີຊ່ວຍເຫຼືອປະຊາຊົນບັນດາເຜົ່າຢ່າງກົມກຽວ. ເຮັດໃຫ້ກອງທັບປະຊາຊົນຊົນລາວ ກາຍເປັນກອງທັບທີ່ແຂງແກ່ນ ຍິ່ງສູ້ຮົບກໍ່ຍິ່ງເຕີບໃຫຍ່ເຂັ້ມແຂງ, ຍິ່ງສູ້ຮົບກໍ່ຍິ່ງໄດ້ຮັບໄຊຊະນະ ແລະ ເຕີບໃຫຍ່ຂະຫຍາຍຕົວຕະຫຼອດມາ. ເຊິ່ງຜ່ານພຶດຕິກໍາແຫ່ງການຕໍ່ສູ້ກູ້ຊາດອັນຍືດເຍື້ອຍາວນານ, ດຸເດືອດຂ້ຽວຂາດ ແລະ ອົງອາດມີໄຊ ກາຍເປັນກອງທັບວິລະຊົນຂອງຊາດລາວວິລະຊົນຄົນລາວພິລະອາດຫານ ສາດມານໍພາປະຊົນຊົນລາວບັນດາເຜົ່າຫຼຸດພົ້ນອອກຈາກແອກຄອບຄອງຂອງພວກຈັກກະພັກ, ພວກສັກດີນາຕ່າງດ້າວ ແລະ ສະຖາປະນາ ສປປລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ແລະ ໄດ້ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດມາເຖິງທຸກວັນນີ້. ວັນທີ 20 ມັງກອນ ແມ່ນສັນຍາລັກ ແຫ່ງອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ, ແມ່ນຂີດໝາຍປະຫວັດອັນສໍາຄັນ ເປັນບັນໄດກ້າວໄປສູ່ຄວາມອົບອຸ່ນ, ຮຸ່ງເຮືອງ, ສີວິໄລ ຂອງປວງຊົນລາວບັນດາເຜົ່າໃນຂອບເຂດທົ່ວປະເທດ.
ການເຄື່ອນໄຫວປາຖະກະຖາໃນຄັ້ງນີ້ກໍ່ເພື່ອລະນຶກເຖິງມູນເຊື້ອອັນດີງາມທາງດ້ານປະຫວັດສາດ, ຜົນງານແຫ່ງການເຕີບໃຫຍ່ຂະຫຍາຍຕົວ ແລະ ເຂັ້ມແຂງຮອບດ້ານຂອງກອງທັບປະຊາຊົນລາວບົນເສັ້ນທາງ ແລະ ອຸດົມການແຫ່ງການປະຕິວັດຊາດ ປະຊາທິປະໄຕ ປະຊາຊົນ ແລະເພື່ອເສີມຂະຫຍາຍທາດແທ້, ມູນເຊື້ອຂອງການປະຕິວັດ ໃຫ້ຄູ-ອາຈານ, ນັກຮຽນຜູ້ທີ່ເປັນລູກຫຼານຂອງພໍ່ແມ່ປະຊາຊົນ, ເປັນໜໍ່ແໜງຂອງປະເທດຊາດ ເຊື່ອມຊຶມກໍາແໜ້ນມູນເຊື້ອອັນສະຫງ່າງາມ ແລະ ສະຫວ່າງສະໄຫວ ຂອງກອງທັບປະຊາຊົນລາວ ໃຫ້ຝັງເລິກໄວ້ໃນຄວາມຊົງຈໍາ ແລະ ກາຍເປັນແບບຢ່າງທີ່ດີທີ່ຕະຫຼອດໄປ.
ຂຽນໂດຍ: ໂກຮັງ ພັນທະວົງ.
