ໃນວັນທີ 26 ກໍລະກົດ 2024 ນີ້, ສະຫາຍ ພົນຈັດຕະວາ ສົມຈິດ ກິດຕິຍະລາດ ເລຂາຄະນະພັກກອງພົນ ຫົວໜ້າການເມືອງກອງພົນທີ 4 ພ້ອມດ້ວຍ ຄະນະພັກກອງພົນ, ຄະນະຫ້ອງ ອົງການ 5 ຫ້ອງ ກອງພົນທີ 4 ກອງທັບປະຊາຊົນລາວ ເຂົ້າວາງພວງມາລາ ເພື່ອອຸທິດເຖິງດວງວິນຍານຂອງ ສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກ ຄອມມູນິດຫວຽດນາມ ຢູ່ທີ່ ກົງສູນໃຫຍ່ ສສ ຫວຽດນາມ ປະຈຳແຂວງສະຫວັນນະເຂດ ສປປ ລາວ ໂດຍການຕ້ອນຮັບຂອງ ສະຫາຍ ນາງ ດັ່ງທິ ຮ໋າຍເຕິມ ຫົວໜ້າກົງສູນໃຫຍ່ ສສ ຫວຽດນາມ ປະຈຳ ແຂວງສະວັນນະເຂດ ພ້ອມດ້ວຍຄະນະ.
ໂອກາດດັ່ງກ່າວ, ສະຫາຍ ພົນຈັດຕະວາ ສົມຈິດ ກິດຕິຍະລາດ ຕາງໜ້າໃຫ້ຄະນະພັກ-ຄະນະບັນຊາ ຕະຫລອດຮອດນາຍ ແລະ ພົນທະຫານ ໃນທົ່ວກອງພົນ ກ່າວສະແດງຄວາມເສຍໃຈຢ່າງສຸດຊຶ້ງຕໍ່ການຈາກໄປຢ່າງບໍ່ມີວັນຫວນກັບຂອງ ສະຫາຍ ຫງວຽນ ຝູ໋ຈ້ອງ ເລຂາທິການໃຫຍ່ ສສ ຫວຽດນາມ, ພວກເຮົາຂໍສະແດງຄວາມຮູ້ບຸນຄຸນຕໍ່ຜົນງານວິລະກຳ ແລະ ຜົນງານລວມຕ່າງໆ ຂອງສະຫາຍທີ່ໄດ້ປະກອບສ່ວນໄລຍະຜ່ານມາ ໄປຕະຫລອດກາລະນານ, ຈະຂໍສືບຕໍ່ເພີ່ມທະວີຮັດແໜ້ນຄວາມສາມັກຄີ ແບບພິເສດ ລະຫວ່າງສອງພັກ, ສອງລັດ ແລະ ສອງກອງທັບໃຫ້ຢັ້ງຢືນຕະຫລອດໄປ.
ຂ່າວ: ຮທ ໂພຄຳ ພອນປະເສີດ
