ໃນວັນທີ 07 ທັນວາ 2022 ນີ້, ກອງພົນທີ 1 ໄດ້ຈັດພິທີມອບເງິນຊົດເຊີຍ ໃຫ້ພະນັກງານທີ່ພັກການຮັບເບ້ຍບໍານານ, ເຂົ້າຮ່ວມເປັນປະທານພິທີ ໂດຍພັນເອກ ວົງຈັນ ພັນຈັນທະມານ ຫົວໜ້າການເມືອງກອງພົນ, ໂດຍມີຄະນະພັກ-ຄະນະບັນຊາ, ພະແນກການ ທີ່ກ່ຽວຂ້ອງເຂົ້າຮ່ວມ.
ອີງຕາມກົດໝາຍວ່າດ້ວຍນາຍທະຫານກອງທັບປະຊາຊົນລາວ ແລະກົດໝາຍວ່າດ້ວຍປະກັນສັງຄົມ ກອງພົນທີ 1 ໄດ້ຈັດພິທີມອບ-ຮັບເງິນອຸດໜູນບໍານານ ໃຫ້ພະນັກງານອາວຸດໂສທີ່ພັກການຮັບເບ້ຍບໍານານຕາມແນວທາງນະໂຍບາຍຂອງພັກ-ລັດຕາມລະບຽບ, ຫຼັກການ ຈໍານວນ 21 ສະຫາຍ, ລວມມູນຄ່າເງິນທັງໝົດ 414.777.076 ກີບ ຢ່າງເປັນທາງການ ແລະ ສົມກຽດ; ເຊິ່ງໃຫ້ກຽດຂຶ້ນມອບ ໂດຍ ພັນເອກ ວົງຈັນ ພັນຈັນທະມານ ຫົວໜ້າການເມືອງກອງພົນ ແລະ ຂຶ້ນຮັບ ຂອງບັນດາສະຫາຍພະນັກງານບໍານານ ແລະ ຄອບຄົວຂອງພະນັກງານບໍານານ ຕາມລໍາດັບ.
ພັນເອກ ວົງຈັນ ພັນຈັນທະມານ ຫົວໜ້າການເມືອງກອງພົນທີ 1 ກ່າວສະແດງຄວາມຍ້ອງຍໍຊົມເຊີຍ ແລະ ຂອບອົກຂອບໃຈ ທີ່ໄລຍະຜ່ານມາ ບັນດາສະຫາຍເຫລົ່ານີ້ ໄດ້ອຸທິດເຫື່ອແຮງ, ຈິດໃຈ, ສະຕິປັນຍາ, ຄວາມຮູ້, ຄວາມສາມາດ ຂອງຕົນເຂົ້າໃນການຈັດຕັ້ງປະຕິບັດໜ້າທີ່ວຽກງານລວມ ຂອງກົມກອງ ເຮັດໃຫ້ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງກົອງພົນ ກໍ່ຄືໜ້າທີ່ການເມືອງຂອງກົມກອງມີຜົນສໍາເລັດຫຼາຍດ້ານທີ່ໜ້າເພິ່ງພໍໃຈ, ຜົນງານ ແລະ ຄຸນຄວາມດີດັ່ງກ່າວ ພະນັກງານ-ນັກຮົບ ກອງພົນທີ 1 ຈະນໍາເອົາມາເປັນບົດຮຽນອໍາລໍ້າຄ່າໃຫ້ແກ່ຕົນເອງ ແລະ ພະນັກງານ-ນັກຮົບຮຸ່ນຕໍ່ໄປ ແລະ ຫວັງຢ່າງຍິ່ງວ່າບັນດາສະຫາຍ ຈະສືບຕໍ່ໃຫ້ທິດຊີ້ນໍາ ແລະ ອູ້ມຊູຊ່ວຍເຫຼືອ, ເບິ່ງແຍງ ກອງພົນທີ 1 ຕໍ່ໄປ ແລະ ກອງພົນທີ 1 ກໍ່ຈະໃຫ້ການຊຸກຍູ້, ເບິ່ງແຍງ ແລະ ຊ່ວຍເຫຼືອທາງດ້ານວັດຖຸ ແລະ ຈິດໃຈ ໃຫ້ແກ່ພະນັກງານອາວຸໂສບໍານານຕະຫຼອດໄປ ຕາມຄວາມສາມາດ ແລະ ເງື່ອນໄຂຕົວຈິງຂອງກົມກອງ.
ໂດຍ: ກໍ ແດນດອກກຽງ