ກອງປະຊຸມໃຫຍ່ ຊຸດທີ II ຂອງສະມາຄົມສິນລະປິນລາວໄດ້ມີຂຶ້ນໃນວັນນທີ 5 ເມສານີ້ທີ່ຫໍວັດທະນະທຳແຫ່ງຊາດ ໂດຍເປັນກຽດເຂົ້າຮ່ວມຂອງ ທ່ານ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ, ມີບັນດາຮອງລັດຖະມົນຕີ ແລະ ສິນລະປິນເຂົ້າຮ່ວມ.
ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ປະທານສະມາຄົມສິນລະປິນລາວໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານໃນໄລຍະຜ່ານມາ ແລະ ວາງທິດທາງແຜນການໃນຕໍ່ໜ້າວ່າ: ໄດ້ມີການເຄື່ອນໄຫວຢ່າງຕັ້ງໜ້າເຂົ້າໃນວຽກງານວິຊາສະເພາະ ແລະ ຮັບໃຊ້ໜ້າທີ່ການເມືອງຂອງກົມ, ກອງ ທ້ອງຖິ່ນ ແລະ ຢູ່ໃນການເຄື່ອນໄຫວຂອງຜູ້ປະກອບການຕ່າງໆ ໃນສັງຄົມໄດ້ເປັນຢ່າງດີ, ການປະດິດຄິດແຕ່ງເພງຮ້ອງ, ບົດຟ້ອນ, ດົນຕີ, ຂັບລຳ, ລະຄອນ, ກາຍະສິນ ແລະ ການສະແດງຕ່າງໆ ແລະ ສືບຕໍ່ເປັນຂະບວນການຟົດຟື້ນ ທັງທາງດ້ານປະລິມານ ແລະ ຄຸນນະພາບ, ປະກອບສ່ວນເຂົ້າໃນການສຶກສາອົບຮົມ ໃຫ້ຄົນລາວ ມີແນວຄິດຮັກເຊື້ອແພງຊາດເຊື່ອໝັ້ນຕໍ່ການນຳພາຂອງພັກ-ລັດ ແລະ ອະນາຄົດອັນສົດໃສຂອງ ປະເທດຊາດ. ວຽກງານການຟື້ນຟູອະນຸລັກພັດທະນາ ແລະ ໂຄສະນາເຜີຍແຜ່ມູນເຊື້ອສິລະປະ ວັດທະນະທຳອັນດີງາມຂອງຊາດ-ຂອງເຜົ່າໄດ້ຮັບການຈັດຕັ້ງປະຕິບັດໄດ້ດີພໍສົມຄວນ ໂດຍສົມ ທົບ ຮັບເອົາສິ່ງຍອດຍິ່ງຂອງຍຸກສະໄໝເຂົ້າໃນຂະບວນການສິລະປະວັດທະນະທຳຢ່າງເລິກເຊິ່ງ ແລະ ກວ້າງຂວາງ, ສ້າງຄວາມບັນເທີງ ແລະ ມ່ວນຊື່ນອັນສົດໃສໃນສັງຄົມລາວ ທັງຢູ່ພາຍໃນ ແລະ ຕ່າງປະເທດ. ພິເສດໄດ້ຮ່ວມກັບໂທລະພາບແຫ່ງຊາດ ຈັດການສະແດງຄອນເສີດທີ່ມີຊື່ວ່າ “ອຸດທິຍານສວນສິນ“ ເປັນເວລາຫຼາຍເດືອນເຮັດໃຫ້ສິນລະປິນຫຼາຍຄົນໄດ້ມີໂອກາດເຂົ້າຮ່ວມສະ ແດງໃນເວທີດັ່ງກ່າວ, ປະກອບສ່ວນສ້າງຄວາມສາມັກຄີ-ມິດຕະພາບ ແລະ ການແລກປ່ຽນທາງ ດ້ານສິລະປະການສະແດງກັບພາກພື້ນ ແລະ ສາກົນໄດ້ຢ່າງກ້ວາງຂວາງ ອັນໄດ້ປະກອບສ່ວນສ້າງວຽກເຮັດງານທຳປະກອບສ່ວນສ້າງລາຍຮັບໃຫ້ແກ່ເຫຼົ່າສິນລະປິນ ແລະ ຜູ້ປະກອບການບັນ ເທີງດີພໍສົມຄວນ.
ໃນໂອກາດດັ່ງກ່າວ ທ່ານ ກິແກ້ວ ໄຂຄຳພິທູນ ໄດ້ໂອ້ລົມ ແລະ ສະແດງຄວາມຍ້ອງຍໍຊົມເຊີຍຕໍ່ບັນດາສິນລະປິນລາວທຸກຄົນທີ່ເຮັດໜ້າທີ່ຂອງຕົນ ໃນການເຄື່ອນໄຫວຮັບໃຊ້ສັງຄົມຜ່ານມາແຕ່ຕ້ອງໄດ້ພ້ອມກັນເອົາໃຈໃສ່ຕື່ມບາງບັນຫາລຸ່ມນີ້: ສືບຕໍ່ເຕົ້າໂຮມບັນດານັກສິລະປິນເພື່ອພ້ອມກັນຊຸກຍູ້ສົ່ງເສີມວຽກງານສິລະປະການສະແດງ ແລະ ສິນລະປິນຂອງຊາດໃຫ້ມີການພັດທະນາຂຶ້ນເລື້ອຍໆ ແລະ ເພື່ອເຕົ້າໂຮມເຫຼົ່າສິນລະປິນລາວທຸກທົ່ວໜ້າໃຫ້ມີຄວາມສາມັກຄີເອກະພາບກັນ, ເພື່ອປະຕິບັດຕາມແນວທາງຂອງພັກ, ກົດໝາຍຂອງລັດ ແລະ ກົດລະບຽບຂອງສະມາຄົມວາງອອກສືບຕໍ່ສົ່ງເສີມໃຫ້ມີບົດປະພັນປະດິດຄິດແຕ່ງ ແລະ ຜະລິດຕະພັນທາງດ້ານສິລະປະການສະແດງໃຫ້ຫຼາກຫຼາຍ ນັບທັງປະລິມານ ແລະ ຄຸນນະພາບ ເພື່ອເປັນຈຸດປະສານສົມທົບກັບພາກລັດກໍຄືກົມ, ກອງ ຂອງກະຊວງອົງການທີ່ກ່ຽວຂ້ອງໃນການຈັດຕັ້ງປະຕິບັດວຽກງານສິລະປະວັນນະຄະດີ. ສືບຕໍ່ຈັດຕັ້ງຜັນຂະຫຍາຍເອົາມະຕິຂອງກອງປະຊຸມໃຫຍ່ໄປຈັດຕັ້ງ ປະຕິບັດໃຫ້ເກີດໝາກເກີດຜົນຕົວຈິງ, ສືບຕໍ່ເຄື່ອນໄຫວທາງດ້ານສິລະປະວັດທະນະທຳຢູ່ພາຍໃນປະເທດໃຫ້ຖືກຕ້ອງຕາມແນວທາງນະໂຍບາຍຂອງພັກ, ກົດໝາຍຂອງລັດໂດຍສະເພາະກໍແມ່ນກົດໝາຍສິລະປະການສະແດງ, ເຮັດໃຫ້ບົດປະພັນ, ຜະລິດຕະພັນຂອງວຽກງານສິລະປະການສະແດງ ນັບມື້ນັບອຸດົມຮັ່ງມີ, ສາມາດຕອບສະໜອງໜ້າທີ່ການເມືອງໃນການປົກປັກສ້າງສາ ແລະ ພັດທະນາປະເທດຊາດ ຂອງພວກເຮົາ ໂດຍສະເພາະປະກອບສ່ວນເຂົ້າໃນການພັດທະນາຄົນໃຫ້ຮັບຮູ້ ແລະ ເຂົ້າໃຈເຖິງຮີດຄອງປະເພນີວັດທະນະທຳອັນດີງາມຂອງຊາດ, ເຮັດໃຫ້ຄົນມີນ້ຳໃຈຮັກເຊື້ອແພງຊາດ ຮັກລະບອບໃໝ່, ຮັກມູນເຊື້ອສິລະປະວັດທະນະທຳຂອງຊາດ ຂອງເຜົ່າ, ຈຳກັດການເຄື່ອນໄຫວສິລະປະວັດທະນະທຳ ທີ່ຫຼ້າຫຼັງຊອດກະຈາ, ຕ້ານພັກ, ຕ້ານລັດ ແລະ ລາມົກອະນາຈານ ແລະ ອື່ນໆ, ສະມາຄົມຄວນນຳໃຊ້ທ່າແຮງທາງດ້ານສິລະປະການສະແດງ ເພື່ອສ້າງແຫຼ່ງລາຍຮັບທາງດ້ານວິຊາການ ພ້ອມນັ້ນກໍຍາດແຍ່ງເອົາການຊ່ວຍເຫຼືອສະໜັບສະໜູນຈາກພາກສ່ວນຕ່າງໆ ຢູ່ໃນສັງຄົມທັງພາຍໃນ ແລະ ຕ່າງປະເທດ ເພື່ອສ້າງຄວາມເຂັ້ມແຂງທາງດ້ານງົບປະມານ ໃຫ້ແກ່ສະມາຄົມໃນການເຄື່ອນໄຫວ ແລະ ເບິ່ງແຍງດູແລດ້ານສະຫວັດດີການຕໍ່ສະມາຊິກຂອງຕົນ ແລະ ກົມສິລະປະການສະແດງ ກະຊວງ ຖວທ ແລະ ພາກສ່ວນຕ່າງໆທີ່ກ່ຽວຂອ້ງ ຈົ່ງໃຫ້ການອູ້ມຊູສະໜັບສະໜູນ ເພື່ອໃຫ້ສະມາຄົມສິນລະປິນ ກໍຄືສະມາຄົມວິຊາຊີບຕ່າງໆທີ່ຂຶ້ນກັບການຊີ້ນຳຂອງກະຊວງ, ກົມ ໃຫ້ມີການເຄື່ອນໄຫວວຽກງານ ໄດ້ຕາມລະດັບຄາດໝາຍ, ສຳລັບສະມາຄົມ ກໍຕ້ອງໄດ້ຕັ້ງໜ້າເຄື່ອນໄຫວວຽກງານຂອງຕົນ ດ້ວຍຄວາມຮັບຜິດຊອບ ແລະ ຢ່າງຕັ້ງໜ້າອີ່ຫຼີ, ຫຼີກເວັ້ນພາຍຫຼັງກອງປະຊຸມສຳເລັດລົງແລ້ວ ພັດບໍ່ໄດ້ຮັບການຈັດຕັ້ງປະຕິບັດໃຫ້ເກີດຜົນເປັນຈິງຮ່ວມກັນ.
ພາບ-ຂ່າວ: ບຸນອູ້ມ
