ປະຈຸບັນຄະນະພັກ ອໍານາດການປົກຄອງເມືອງໄຊເສດຖາ ແຂວງອັດຕະປື ພວມກະກຽມຄວາມພ້ອມດ້ານຕ່າງໆ ໃຫ້ແກ່ງານສະເຫຼີມສະຫຼອງ ແລະ ປະກາດເອົາວັດຫຼວງເມືອງເກົ່າ ແລະ ວັດທາດພະໄຊ ເປັນມໍລະດົງແຫ່ງຊາດ ລະດັບທ້ອງຖິ່ນ,ເຊິ່ງງານດັ່ງກ່າວຈະຈັດຂື້ນແຕ່ວັນທີ 20 – 25 ມິຖຸນາ 2023 .ເຊິ່ງຈະຈັດໃຫ້ມີຫຼາຍກິດຈະກໍາ ເພື່ອເປັນການດຶງດູດນັກທ່ອງທ່ຽວ.
ທ່ານ ພອນໄຊ ໄກສອນເສນາ ຮອງເຈົ້າເມືອງໄຊເສດຖາ ໄດ້ໃຫ້ສໍາພາດວ່າ: ເພື່ອຮັບຕ້ອນແຂກຜູ້ເດີນທາງເຂົ້າມາຮ່ວມງານ ປະກາດວັດຫຼວງເມືອງເກົ່າ ແລະ ວັດທະພະໄຊ ເປັນມໍລະດົກແຫ່ງຊາດ ລະດັບທ້ອງຖິ່ນ ປະຈຸບັນອໍານາດການປົກຄອງເມືອງ ແລະ ບ້ານ ໄດ້ກະກຽມຄວາມພ້ອມໃນດ້ານຕ່າງໆເປັນຕົ້ນ: ໄດ້ສ້າງຂະບວນການອະນາໄມ ປະດັບປະດາຕົວເມືອງ,ປັບປຸງການບໍລິການດ້ານສະຖານທີ່ພັກແຮມ, ຮ້ານອາຫານ, ການບໍລິການຢູ່ສະຖານທີ່ທ່ອງທ່ຽວພາຍໃນເມືອງ, ມີການຝຶກຊ້ອມກ້ອນກຳລັງ ແລະ ກະກຽມລາຍການສະແດງສີລະປະ-ວັນນະຄະດີ,ພ້ອມນັ້ນ ກໍ່ໄດ້ຊຸກຍູ້ໃຫ້ພໍ່ແມ່ປະຊາຊົນ ບັນດາເຜົ່າພາຍໃນເມືອງໄຊເສດຖາ ໃຫ້ກຽມຄວາມພ້ອມໃນການເປັນເຈົ້າພາບທີ່ດີ .ເຊິ່ງໃນໄລຍະການສະເຫຼີມສະຫຼອງ ພາຍໃນງານຍັງມີຫຼາກຫຼາຍກິດຈະກຳເປັນຕົ້ນ: ການສະແດງເປົ່າແຄນ,ເທດສະການຮ່ອນຄຳ, ລໍາວົງລາວປະຍຸກ, ງານປະກວດນັກຮ້ອງສຽງດີ, ປະກວດນາງສາວທິດາເຜົ່າ, ເທດສະການອາຫານພື້ນເມືອງ, ງານຕະຫຼາດນັດ, ງານວາງສະແດງສິນຄ້າໜຶ່ງເມືອງໜຶ່ງຜະລິດຕະພັນ ຫຼື ໂອດ໋ອບ ຈາກ 5 ຕົວເມືອງຂອງແຂວງ ແລະ ກິດຈະກໍາອື່ນໆ .
ທ່ານ ພອນໄຊ ໄກສອນເສນາ ຮອງເຈົ້າເມືອງ ໄຊເສດຖາ ຍັງໄດ້ຕາງໜ້າໃຫ້ອຳນາດການປົກຄອງເມືອງ ແລະ ພໍ່ແມ່ປະຊາຊົນຊາວເມືອງ ໄຊເສດຖາ ຂໍເຊີນຊວນບັນດາທ່ານ ແຂກທັງພາຍໃນ ແລະ ຕ່າງປະເທດ ໃຫ້ເຂົ້າມາຮ່ວມງານ ປະກາດວັດຫຼວງເມືອງເກົ່າ ແລະ ວັດທະພະໄຊ ເປັນມໍລະດົກແຫ່ງຊາດ ລະດັບທ້ອງຖິ່ນ ເພື່ອສຶກສາໃຫ້ເຫັນເຖິງແກ່ນແທ້ ດ້ານວັດທະນະທໍາ ຮີດຄອງປະເພນີ ວິຖີດໍາລົງຊີວິດ ຂອງປະຊາຊົນຊາວ ແຂວງອັດຕະປື ກໍ່ຄືຊາວເມືອງໄຊເສດຖາ ທີ່ເຕັມໄປດ້ວຍຄວາມງົດງາມ ແລະ ເປັນເອກະລັກສະເພາະທ້ອງຖິ່ນ .
ຂ່າວ: ພຸດປະສົງ ຖວທ
