ກະກຽມສະຫລອງວັນສ້າງຕັ້ງແຂວງບໍລິຄໍາໄຊ ຄົບຮອບ 40 ປີ

ປັດຈຸບັນ, ແຕ່ລະຄະນະອະນຸກໍາມະການທີ່ໄດ້ຮັບການແຕ່ງຕັ້ງ ພວມເອົາໃຈໃສ່ປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນຢ່າງເປັນເຈົ້າການ ເພື່ອກະ ກຽມໃຫ້ແກ່ການສະເຫລີມສະຫລອງວັນສ້າງຕັ້ງ ແຂວງບໍລິຄໍາໄຊ ຄົບຮອບ 40 ປີ (6/3/1984-6/3/2024) ເຊິ່ງພິທີທາງການຈະຈະຈັດຂຶ້ນໃນວັນທີ 6 ມີນາ 2024 ທີ່ສວນອານຸສາວະລີ ທ່ານ ສີສົມພອນ ລໍວັນໄຊ ພາຍໃນເມືອງປາກຊັນ.

ທ່ານ ເລື່ອນວິໄລ ຈັນທະລາພັນ, ຮອງປະທານສະພາປະຊາຊົນແຂວງບໍລິຄໍາໄຊ, ທັງເປັນຫົວໜ້າຄະນະອະນຸກໍາມະການກະກຽມທາງເນື້ອໃນ ແລະ ຈັດຕັ້ງພິທີ ໃຫ້ຮູ້ວ່າ: ຄະນະອະນຸກໍາມະການຂອງຕົນໄດ້ສໍາເລັດການກະກຽມຫລາຍວຽກງານ ເຊັ່ນ: ໄດ້ສໍາເລັດການກະກຽມບົດໂຄສະນາເຜີຍແຜ່ກ່ຽວກັບມູນເຊື້ອ ແລະ ການເຕີບໃຫຍ່ຂະຫຍາຍຕົວຂອງແຂວງບໍລິຄໍາໄຊ ຕະຫລອດໄລຍະ 40 ປີ, ບົດຄໍາຖາມ-ຄໍາຕອບກ່ຽວກັບແຂວງບໍລິຄໍາໄຊ, ບົດປາໄສໃນພິທີໂຮມຊຸມນຸມ, ການກະກຽມຈັດງານວາງສະແດງສິນຄ້າ, ການສະແດງສິລະປະ, ກະກຽມພິທີທາງສາດສະໜາ ຕັ້ງກອງ 7 ກອງ, ກະກຽມພິທີໃສ່ບາດ, ກະກຽມຈູດບັ້ງໄຟດອກ ແລະ ອື່ນໆ ຊຶ່ງການກະກຽມທຸກວຽກງານມີຄວາມພ້ອມແລ້ວເກືອບ 100%.

ສ່ວນ ທ່ານ ດວງຕາ ມໍລະຄາສຸກ, ປະທານຄະນະກວດກາພັກ-ລັດແຂວງບໍລິຄໍາໄຊ, ຫົວໜ້າຄະນະອະນຸກໍາມະການພິທີການຮັບແຂກ ໃຫ້ຮູ້ວ່າ: ສໍາລັບການກະກຽມວຽກງານທີ່ຢູ່ໃນຄວາມຮັບຜິດຊອບຂອງອະນຸກໍາມະການພິທີການຮັບແຂກ ມີຄວາມພ້ອມແລ້ວຫລາຍກວ່າ 90% ເຊັ່ນ: ການກະກຽມທີ່ພັກ, ການກະກຽມເຊີນແຂກພາຍໃນແຂກ, ຈາກສູນກາງ ແລະ ປະເທດໃກ້ຄຽງເຂົ້າຮ່ວມພິທີ, ກະກຽມສະຖານທີ່ຈັດງານ ແລະ ອື່ນໆ.

ນອກຈາກນີ້ ການກະກຽມວຽກງານຂອງອີກຫລາຍຄະນະກໍາມະການມີຄວາມຄືບໜ້າຢ່າງຕໍ່ເນື່ອງ ແລະ ຈະສໍາເລັດຕາມເວລາທີ່ກໍານົດ ເພື່ອເຮັດໃຫ້ການສະເຫລີມສະຫລອງວັນສ້າງຕັ້ງແຂວງບໍລິຄໍາໄຊ ຄົບຮອບ 40 ປີ ມີຄວາມຍິ່ງໃຫຍ່, ຄຶກຄື້ນ ແລະ ມີຄວາມໝາຍທີ່ເລິກເຊີ່ງ.

Cr: ຂ່າວອອນລາວ, ວສລ