ຕອນເຊົ້າ ວັນທີ 13 ກໍລະກົດ 2024, ທີ່ບ້ານຮ່ອງສຸພາບ, ເມືອງໄຊເສດຖາ, ນະຄອນຫຼວງວຽງຈັນ ກະຊວງກະສິກໍາ ແລະປ່າໄມ້ ຮ່ວມກັບນະຄອນຫລວງວຽງຈັນ ຈັດພິທີປ່ອຍປາລົງສູ່ທໍາມະຊາດ ໂອກາດສະເຫຼີມສະຫຼອງວັນປ່ອຍປາ ແລະ ສັດນໍ້າ ແຫ່ງຊາດ.
ເຂົ້າຮ່ວມໃນພິທີ ມີທ່ານ ບຸນທອງ ຈິດມະນີ ,ຮອງປະທານປະເທດ, ທ່ານລິນຄໍາ ດວງສະຫວັນ, ລັດຖະມົນຕີ ກະຊວງ ກະສິກໍາແລະ ປ່າໄມ້; ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ; ພ້ອມດ້ວຍ ເອກອັກຄະລັດຖະທູດ ຮົງກາລີ ປະຈຳ ສປປ ລາວ, ຜູ້ຕາງໜ້າອົງການຈັດຕັ້ງສາກົນ ແລະປະຊາຊົນບ້ານໃກ້ຄຽງເຂົ້າຮ່ວມ.
ທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ກ່າວວ່າ: ວັນທີ 13 ກໍລະກົດ ຂອງທຸກໆປີ ແມ່ນ ວັນປ່ອຍປາ ແລະ ສັດນໍ້າ ແຫ່ງຊາດ ທີ່ໄດ້ກຳນົດໃນ ກົດໝາຍວ່າດ້ວຍສັດນໍ້າ ແລະ ການປະມົງ ຊຶ່ງໃນໄລຍະຜ່ານມາ ກະຊວງກະສິກຳ ແລະ ປ່າໄມ້ ໄດ້ປະສານສົມທົບກັບທຸກພາກສ່ວນ ທັງຂັ້ນສູນກາງ ແລະ ທ້ອງຖີ່ນ ໃຫ້ຄວາມສຳຄັນຕໍ່ວັນດັ່ງກ່າວ ດ້ວຍການໂຄສະນາເຜີຍແຜ່ກົດໝາຍ ແລະ ບັນດານິຕິກຳຕ່າງໆທີ່ກ່ຽວຂ້ອງ ຢ່າງກວ້າງຂວາງໃນຂອບເຂດທົ່ວປະເທດ ເພື່ອເຮັດໃຫ້ທຸກພາກສ່ວນ ໃນສັງຄົມເຂົ້າໃຈ ແລະ ເອົາໃຈໃສ່ຕໍ່ວຽກງານການພັດທະນາ, ການອະນຸລັກ, ການຄຸ້ມຄອງ ແລະ ນຳໃຊ້ ປາ ແລະ ສັດນໍ້າ ໃຫ້ມີຄວາມຍືນຍົງ ເພື່ອປະກອບສ່ວນເຂົ້າໃນການຄໍ້າປະກັນສະບຽງອາຫານ ແລະ ໂພຊະນາການ ພ້ອມທັງຜະລິດເປັນສິນຄ້າ ເພື່ອສ້າງລາຍຮັບ ໃຫ້ປະຊາຊົນລາວນັບມື້ຫລາຍຂຶ້ນ.
ຈາກການປະກອບສ່ວນຄືດັ່ງກ່າວນັ້ນ ໄດ້ເຮັດໃຫ້ການພັດທະນາ, ການອະນຸລັກ, ການຄຸ້ມຄອງວຽກສັດນໍ້າ ແລະ ການປະມົງ ມີຫຼາຍດ້ານ ທີ່ພົ້ນເດັ່ນ ເປັນຕົ້ນ ໄດ້ເຮັດໃຫ້ຈຳນວນປາ ແລະ ສັດນໍ້າ ປ່ອຍລົງແຫຼ່ງນ້ຳທຳມະຊາດ, ຫ້ວຍຮ່ອງຄອງບຶງ, ໜອງຕ່າງໆ ເພີ່ມຂຶ້ນໃນແຕ່ລະປີ ຄື: ປີ 2021 ປ່ອຍໄດ້ 58 ລ້ານໂຕ, ປີ 2022 ໄດ້ 61ລ້ານໂຕ ແລະ ປີ 2023 ປ່ອຍໄດ້ 62 ລ້ານໂຕ; ຂະແໜງກະສິກຳ ແລະ ປ່າໄມ້ ໄດ້ເອົາໃຈໃສ່ ພັດທະນາ, ຊຸກຍູ້-ສົ່ງເສີມ ພື້ນຖານການຜະລິດ ແນວພັນປາ-ແນວພັນສັດນ້ຳ ຊຶ່ງໃນທົ່ວປະເທດມີສູນ,ສະຖານີທີ່ຜະລິດລູກປາ ຂອງລັດຫລາຍກວ່າ50 ແຫ່ງ, ຟາມຜະລິດລູກປາ ຂອງເອກະຊົນ ຫຼາຍກວ່າ 140ແຫ່ງ ແລະ ການຜະລິດລູກປາແບບຄອບຄົວມີຫລາຍກວ່າ 400ແຫ່ງ ສາມາດສະໜອງແນວພັນປາ ໃຫ້ສັງຄົມໄດ້ ຈໍານວນ 290 ລ້ານກວ່າໂຕ ຫລື ເທົ່າກັບ 73% ຂອງຄວາມ ຕ້ອງການພາຍໃນ. ບັນດາສູນດັ່ງກ່າວໄດ້ຄົ້ນຄວ້າທົດລອງລ້ຽງ ແລະ ຂະຫຍາຍພັນ ປາ ແລະ ສັດນໍ້າ ພື້ນເມືອງໄດ້ຫຼາຍຊະນິດ ເປັນຕົ້ນແມ່ນ ປາເຄິງ, ປາກົດ, ປາເໝັ້ນ ແລະ ປາເຂັງ. ພ້ອມກັນນັ້ນ, ບັນດາທ້ອງຖິ່ນກໍ່ໄດ້ເອົາໃຈໃສ່ການອະນຸລັກສັດນ້ຳດ້ວຍການ ສ້າງວັງສະຫງວນ ຕາມແຫຼ່ງນ້ຳທຳມະຊາດຕ່າງໆ ຊຶ່ງມາຮອດປະຈຸບັນ ໃນທົ່ວປະເທດມີວັງສະຫງວນປາ ຫລາຍກວ່າ1.100ວັງ ໃນນັ້ນ ມີຄະນະຄຸ້ມຄອງວັງສະຫງວນແລ້ວ 890ວັງ.
ສຳລັບປີນີ້, ກະຊວງກະສິກຳ ແລະ ປ່າໄມ້ ໄດ້ສົມທົບກັບ ອົງ ການປົກຄອງແຂວງ, ນະຄອນຫຼວງ ມີແຜນຈະປ່ອຍປາຄືນສູ່ແຫຼ່ງນໍ້າທຳມະຊາດ ໃນຂອບເຂດທົ່ວປະເທດໃຫ້ໄດ້ 64 ລ້ານໂຕ. ສໍາລັບພິທີທາງການມື້ນີ້ ກະຊວງກະສິກຳ ແລະ ປ່າໄມ້ ໄດ້ປະສານສົມທົບກັບ ອົງການປົກຄອງນະຄອນຫຼວງວຽງຈັນ ເລືອກເອົາ ບ້ານຮ່ອງສຸພາບ ແຫ່ງນີ້ ເປັນຈຸດປ່ອຍປາຄືນສູ່ທຳມະຊາດ ເຊີ່ງປາທີ່ຈະນຳມາປ່ອຍທັງໝົດມີ 400.000 ໂຕ.ໃນນີ້ມີ ປາປາກ, ປາເຄິງ, ປາກົດ, ປາເໝັ້ນ, ປາເພັ້ຍ, ປາອີໄທ, ປາວຽນໄຟ ແລະປາຊະນິດອື່ນໆ.
