ກະຊວງກະສິກໍາ ແລະປ່າໄມ ຮ່ວມກັບນະຄອນຫລວງວຽງຈັນ ຈັດພິທີປູກຕົ້ນໄມ້ ໂອກາດວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນ

ຕອນເຊົ້າວັນທີ 1 ມິຖຸນາ 2024 ກົມປ່າໄມ້ ກະຊວງກະສິກໍາ ແລະປ່າໄມ ຮ່ວມກັບນະຄອນຫລວງວຽງຈັນ ແລະເມືອງນາຊາຍທອງ ຮ່ວມກັນຈັດພິທີປູກຕົ້ນໄມ້ ໂອກາດວັນປູກຕົ້ນໄມ້ ແຫ່ງຊາດ ແລະວັນເດັກນ້ອຍສາກົນ ວັນທີ 1 ມິຖຸນາ ເຂດບ້ານໂພສີ ກຸ່ມບ້ານໂພນທອງ, ເມືອງນາຊາຍທອງ, ນະຄອນຫຼວງວຽງຈັນ.ເຂົ້າຮ່ວມໃນພິທີ ທ່ານ ລິນຄຳ ດວງສະຫວັນ, ລັດຖະມົນຕີກະຊວງ ກະສິກຳ ແລະ ປ່າໄມ້, ທ່ານພູວົງ ວົງຄໍາຊາວ ຮອງເຈົ້າຄອງນະຄອນຫລວງວຽງຈັນ , ທ່ານ ສົມຫວັງ ພິມມະວົງ ຫົວໜ້າກົມປ່າໄມ້, ກະຊວງ ກະສິກຳ ແລະ ປ່າໄມ້ ພ້ອມດ້ວຍບໍລິສັດ, ອົງການປົກຄອງເມືອງນາຊາຍທອງ ແລະປະຊາຊົນບ້ານໃກ້ຄຽງ ເຂົ້າຮ່ວມ.

, ທ່ານ ສົມຫວັງ ພິມມະວົງ ຫົວໜ້າກົມປ່າໄມ້, ກະຊວງ ກະສິກຳ ແລະ ປ່າໄມ້ ກ່າວວ່າ: ວັນທີ 9 ກຸມພາ 1980 ສະພາລັດຖະມົນຕີໄດ້ອອກ ມະຕິຕົກລົງ ກໍານົດເອົາ ວັນທີ 1 ມິຖຸນາ ຊຶ່ງກົງກັບວັນເດັກນ້ອຍ ສາກົນ ເປັນວັນປູກຕົ້ນໄມ້ແຫ່ງຊາດ ຂອງ ສປປ ລາວ ໂດຍມີຈຸດປະສົງ ເພື່ອປູກຈິດສຳ ນຶກໃຫ້ແກ່ອະນຸຊົນ ແລະ ເຍົາວະຊົນຂອງຊາດ ກໍຄື ລູກຫຼານ ຜູ້ເກີດໃໝ່-ໃຫຍ່ລຸນ ໃຫ້ມີສະຕິ ຮັກ ແລະ ຫວງແຫນ ປ່າໄມ້ ແລະຊັບພະຍາກອນປ່າໄມ້, ປຸກລະດົມທົ່ວປວງຊົນ ເຂົ້າຮ່ວມໃນການ ຄຸ້ມຄອງ, ປົກປັກຮັກສາ ແລະພັດທະນາ ປ່າໄມ້ ເຮັດໃຫ້ປ່າໄມ້ ມີຄວາມອຸດົມສົມບູນ, ເປັນເຫງົ້າພະລັງ ໃນການ ປົກປັກຮັກສາລະບົບນິເວດທຳມະຊາດ, ຊີວະນານາພັນ ໃຫ້ກາຍເປັນທ່າແຮງທາງດ້ານເສດຖະກິດ. ຈາກການກຳນົດ ວັນປູກຕົ້ນໄມ້ ແຫ່ງຊາດ ດັ່ງກ່າວ ໄດ້ເຮັດໃຫ້ການ ປູກໄມ້ ກາຍເປັນຂະບວນການຟົດຟື້ນ ໃນທົ່ວປະເທດ, ຊຶ່ງໃນແຕ່ລະປີ ໄດ້ມີການຈັດ ພິທີ ປູກຕົ້ນໄມ້ ຄຽງຄູ່ກັບ ການ ສະເຫຼີມ

ສະຫຼອງ ວັນເດັກນ້ອຍ ສາກົນ ໂດຍມີການເຂົ້າຮ່ວມ ຂອງທຸກຊັ້ນຄົນ ຢູ່ໃນສັງຄົມ ຢ່າງກ້ວາງຂວາງ. ຜ່ານການເຄື່ອນໄຫວຕົວຈິງໃນໄລຍະຜ່ານມາ ສັງເກດເຫັນວ່າ ເນື້ອທີ່ປູກໄມ້ ໄດ້ເພີ້ນຂຶ້ນຢ່າງຕໍ່ເນື່ອງ ຈາກ 452 ເຮັກຕາ ໃນປີ 1978 ມາເປັນ 1.384 ເຮັກຕາ ໃນປີ 1985 ແລະ ໃນປີ 2023ສັງລວມເນື້ອທີ່ປູກໄມ້ ໃນທົ່ວປະເທດ ໄດ້ທັງໝົດ 579.373 ເຮັກຕາ. ໃນນັ້ນ, ເປັນການລົງທຶນຂອງບໍລິສັດ ຜູ້ປະກອບການ 65,85%, ປະຊາຊົນ 32,6%, ແລະ ລັດ 1,55% ຕາມລໍາດັບ.ຊຶ່ງປະກອບມີຊະນິດພັນໄມ້ ດັ່ງນີ້: ໄມ້ຢາງພາລາ 56,57%, ໄມ້ວິກ 15,31%, ໄມ້ສັກ 9,35%,

ໄມ້ເກດສະໜາ 5,98%, ສ່ວນທີ່ຍັງເຫຼືອ 12,78% ເປັນຊະນິດພັນໄມ້ ພື້ນເມືອງ ແລະ ອື່ນໆ.

ສະເພາະປີ 2023 ສາມາດຈັດຕັ້ງປະຕິບັດໄດ້ ຈຳນວນ 21.554 ເຮັກຕາ ເທົ່າກັບ 51,31% ຂອງແຜນການ 42.000 ເຮັກຕາ ປະກອບມີ ໄມ້ ຢາງພາລາ 6.164 ເຮັກຕາ, ໄມ້ ວິກ 4.381 ເຮັກຕາ, ໄມ້ ສັກ 218 ເຮັກຕາ, ໄມ້ເກດສະໜາ 134 ເຮັກຕາ ແລະ ໄມ້ພື້ນເມືອງ 10.657 ເຮັກຕາ.

ທ່ານ ສົມຫວັງ ພິມມະວົງ ໃຫ້ຮູ້ອີກວ່າ: ຈຸດປະສົງລວມ ຂອງການປູກຕົ້ນໄມ້ຮ່ວມກັນໃນຄັ້ງນີ້ ແມ່ນເພື່ອສົ່ງເສີມການປູກຕົ້ນໄມ້ ແລະ ຟື້ນຟູປ່າ ຕາມທິດທາງນະໂຍບາຍ ຂອງພັກ ແລະ ລັດທີ່ມີຄາດໝາຍຈະເພີ່ມເນື້ອທີ່ປົກຫຸ້ມຂອງ ປ່າໄມ້ ໃຫ້ໄດ້ 70% ຕາມມະຕິ ຂອງຄະນະບໍລິຫານງານສູນກາງພັກ , ພ້ອມທັງ ປູກຈິດສໍານຶກ ໃຫ້ນ້ອງນ້ອຍເຍົາວະຊົນ ຮູ້ຈັກຄຸນຄ່າ, ຮັກປ່າໄມ້ ແລະຊັບພະຍາກອນປ່າໄມ້.

ໃນປີ 2024 ເພື່ອສ້າງ ຂະບວນການ ພ້ອມທັງ ປູກຈິດສຳນຶກໃຫ້ທົ່ວສັງຄົມ, ກະຊວງກະສິກຳ ແລະ ປາໄມ້ ໄດ້ອອກ ແຈ້ງການ ທັງໄດ້ສົມທົບກັບ ຄະນະພັກ, ອົງການປົກຄອງທ້ອງຖິ່ນ ທົ່ວປະເທດ ກະກຽມແຜນການ ແລະ ຂະບວນການປູກໄມ້ ຢູ່ທ້ອງຖິ່ນຕົນເອງ ໃຫ້ເປັນຂະບວນຟົດຟື້ນ, ໂດຍມີແຜນການ ເກັບແກ່ນ ໃຫ້ໄດ້ 20,832 ກິໂລ, ກຳເບ້ຍ 34.905,400 ກວ່າເບ້ຍ ແລະ ປູກໄມ້ ໃຫ້ໄດ້ 42.000 ເຮັກຕາ. ພ້ອມນີ້ຢູ່ແຕ່ລະແຂວງ ແລະ ນະຄອນຫຼວງ ມີແຜນການຈັດງານວາງສະແດງເບ້ຍໄມ້ ເພື່ອເປັນການສົ່ງເສີມການ ປູກໄມ້ເປັນສິນຄ້າ ແລະ ປົກປັກຮັກສາສິ່ງແວດລ້ອມ.

ການຈັດພິທີ ປູກຕົ້ນໄມ້ ຮ່ວມກັນໃນຄັ້ງນີ້ ແມ່ນເພື່ອເຮັດໃຫ້ ວັນປູກໄມ້ແຫ່ງຊາດ ວັນທີ 1 ມິຖຸນາ 2024 ມີຄວາມໝາຍຄວາມສຳຄັນ ແລະ ມີຄວາມໝັ້ນຍືນ ກາຍເປັນແຮງບັນດານໃຈ ໃຫ້ຄົນລາວທຸກຖ້ວນໜ້າ ເພີ້ມທະວີຄວາມຮັກປ່າໄມ້ ແລະ ປົກປັກຮັກສາ ສິ່ງແວດລ້ອມ.

ໂອກາດນີ້ ທ່ານສົມຫວັງ ພິມມະວົງ ຫົວໜ້າກົມປ່າໄມ້, ກະຊວງ ກະສິກຳ ແລະ ປ່າໄມ້ ໄດ້ຮຽກຮ້ອງມາຍັງ ທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນເຂົ້າຮ່ວມຂະບວນການປູກຕົ້ນໄມ້ ແລະ ປັກປັກຮັກສາຕົ້ນໄມ້ ທີ່ປູກຢ່າງຕັ້ງໜ້າ ແລະ ຖືເອົາວັນປະຫວັດສາດ ດັ່ງກ່າວນີ້ ເປັນງານບຸນໃຫ່ຍ ເປັນປະເພນີ ສືບຕໍ່ກັນໄປ ເພື່ອຮັບປະກັນເຮັດໃຫ້ ສປປ ລາວ ເຕັມໄປດ້ວຍພື້ນທີ່ສີຂຽວ, ມີສະພາບສິ່ງແວດລ້ອມທີ່ສົມບູນ ແລະ ສົດໃສ.

ເນື້ອທີ່ ປູກຕົ້ນໄມ້ໃນມື້ນີ້ ມີປະມານ 5 ເຮັກຕາ, ຈຳນວນເບ້ຍໄມ້ທີ່ນໍາມາປູກມີ 5.000 ກວ່າເບ້ຍ ໃນນັ້ນມີ ໄມ້ຕົ້ວ, ໄມ້ຍາງ, ໄມ້ດູ່, ໄມ້ແຕ້ຄ່າ ແລະ ໄມ້ ວິກ ປູກໃນເຂດປ່າສະຫງວນແຫ່ງຊາດ ພູພະນັງ ເຂດບ້ານໂພສີ ເມືອງນາຊາຍທອງ, ນະຄອນຫຼວງວຽງຈັນ.

ໂດຍ: ຂ່າວອອນລາຍ ວສລ