ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກະຊວງການຕ່າງປະເທດ ຈັດກິດຈະກຳກິລາບານເຕະ ເພື່ອສ້າງຂະບວນການຂໍ່ານັບຮັບຕ້ອນ ວັນຊາດ ທີ 2 ທັນວາ ຄົບຮອບ 44 ປີ ແລະ ກອງປະຊຸມວຽກງານການຕ່າງປະເທດ ຄັ້ງທີ 14

ໃນວັນທີ 29 ພະຈິກ 2019, ທີ່ ເດີ່ນບານເຕະ ກູ໊ດໄລ໌, ນະຄອນຫຼວງວຽງຈັນ, ກະຊວງການຕ່າງປະເທດ ໄດ້ຈັດກິດຈະກໍາແຂ່ງຂັນກິລາບານເຕະຍິງ-ຊາຍ ຂຶ້ນ ເພື່ອ​ສ້າງ​ຂະ​ບວນ​ການ​ການ​ຂໍ່ານັບ​ຮັບ​ຕ້ອນ ວັນຊາດ ທີ 2 ທັນວາ 2019 ຄົບຮອບ 44 ປີ ແລະ ກອງປະຊຸມວຽກງານການຕ່າງປະເທດ ຄັ້ງທີ 14, ຊຶ່ງໃຫ້ກຽດເຂົ້າຮ່ວມໂດຍ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ, ບັນດາຄະນະກົມ, ຄະນະພະແນກ ແລະ ຊາວໜຸ່ມພາຍໃນກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ ຈໍານວນ 300 ກວ່າ ທ່ານ.

ການຈັດກິດຈະກຳໃນຄັ້ງນີ້ ກໍເພື່ອ​ເຮັດ​ໃຫ້​ຊາວ​ໜຸ່ມ​ຂອງ​ກະຊວງ​ການ​ຕ່າງປະ​ເທດ ​ເຫັນ​ໄດ້ ​ແລະ ​ເຂົ້າ​ໃຈ ກ່ຽວ​ກັບ ຂະ​ບວນວິວັດ​ແຫ່ງ​ການ​ຂະຫຍາຍຕົວ​ຂອງ​ຊາດ​ລາວພວກ​ເຮົາ ​ເວົ້າ​ລວມ, ​ເວົ້າສະ​ເພາະ​ ກໍຄື ​ການ​ຜ່ານ​ຜ່າທຸກຄວາມ​ຫຍຸ້ງ​ຍາກດ້ວຍ​ຄວາມ​ທໍ​ລະ​ຫົດ​ອົດທົນຂອງ​ນັກ​ປະຕິວັດອາວຸ​ໂສ​ໃນ​ລຸ້ນກ່ອນ ທີ່ຍາມ​ໃດກໍ​ອຸທິດ​ກໍາລັງວັງຊາ​ຂອງ​ຕົນ​ເຂົ້າ​ໃນພາລະກິດ​ປະຕິວັດ​ຊາດປະຊາ​ທິປະ​ໄຕ ​ໂດຍ​ມີ​ພັກ​ປະຊາຊົນ​ປະຕິວັດ​ລາວ ​ເປັນ​ຜູ້​ຊີ້​ນໍາ​-ນໍາພາ​ໂດຍ​ກົງ ​ແລະ ຮອບດ້ານ ຈົນສາມາດປະກາດ​ເອກະລາດ ​ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975 ມາເຖິງປັດຈຸບັນແມ່ນ ຄົບຮອບ 44 ປີ. ປະຈຸ​ບັນ ສປປ ລາວ ກໍ​ໄດ້ຮັບ​ການ​ພັດທະນາ​ຢ່າງ​ຮອບດ້ານ ​ແລະ ບໍ່​ຢຸດ​ຢັ້ງ ອັນ​ໄດ້​ເຮັດ​ໃຫ້ຊື່​ສຽງ​ຮຽງ​ນາມ​ຂອງພວກ​ເຮົາ ​ພົ້ນ​ເດັ່ນ​ຂຶ້ນ​ໃນ​ເວທີ​ພາກ​ພື້ນ ​ແລະ ສາກົນ, ຊຶ່ງ​ສາມາດ​ເຫັນ​ໄດ້​ຢ່າງ​ປະຈັກ​ຕາ​ວ່າ ປະຈຸ​ບັນ ສປປ ລາວ ມີ​ສາຍ​ພົວພັນ​ການ​ທູດກັບ​ຕ່າງປະ​ເທດ ຈໍານວນ  143 ປະ​ເທດ.  ໂດຍລວມແລ້ວ ການເຄື່ອນໄຫວຂະບວນການກິດຈະກໍານີ້ ກໍເພື່ອສ້າງຄວາມສາມັກຄີພາຍໃນຂອງພະນັກງານກະຊວງການຕ່າງປະເທດ ໃຫ້ມີບັນຍາກາດທີ່ມ່ວນຊື່ນ, ຟົດຟື້ນ ​ແລະ ​ເຕັມ​ໄປ​ດ້ວຍ​ຄວາມ​ໝາຍ​ຄວາມ​ສໍາຄັນ.

ພາຍຫຼັງ ສຳເລັດກິດຈະກຳກິລາບານເຕະແລ້ວ, ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ກໍໃຫ້ກຽດມອບລາງວັນໃຫ້ແກ່ທີມທີ່ຊະນະເລີດ ແລະ ໂອ້ລົມ ແກ່ຊາວໜຸ່ມກະຊວງການຕ່າງປະເທດ ດ້ວຍບັນຍາກາດທີ່ອົບອຸ່ນ ​ແລະ ​ເປັນ​ກັນ​ເອງ.

ຂ່າວຈາກ: ກົມການຂ່າວກະຊວງການຕ່າງປະເທດ