ໃນຕອນເຊົ້າຂອງວັນທີ 13 ຕຸລາ ນີ້, ກະຊວງການຕ່າງປະເທດ ໄດ້ຈັດພິທີປາຖະກະຖາ ມູນເຊື້ອ ວັນການທູດລາວ ຄົບຮອບ 78 ປີ (12 ຕຸລາ 1945 – 12 ຕຸລາ 2023) ໂດຍໃຫ້ກຽດເປັນປະທານ ແລະ ຂຶ້ນບັນຍາຍຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ; ມີບັນດາຄະນະພັກ-ຄະນະນໍາກະຊວງການຕ່າງປະເທດ, ອະດີດທູດອາວຸໂສ, ພະນັກງານບໍານານ, ຄະນະກົມ ແລະ ບັນດາພະນັກງານລັດຖະກອນທັງໝົດຂອງກະຊວງການຕ່າງປະເທດ ເຂົ້າຮ່ວມ
ຈຸດປະສົງຂອງພິທີໃນຄັ້ງນີ້ ແມ່ນເພື່ອລະນຶກເຖິງຜົນງານ ແລະ ຄຸນງາມຄວາມດີຂອງບັນພະບູລຸດຂອງພວກເຮົາ ກໍຄື ຫວນຄືນປະຫວັດສາດ ຂອງຊາດລາວ ທີີ່ປະຊາຊົນລາວເຮົາມີຄວາມເອກອ້າງທະນົງໃຈ ຕໍ່ມູນເຊື້ອຮັກຊາດ, ສາມັກຄີ ແລະ ອົງອາດກ້າຫານ, ເດັດດ່ຽວຕໍ່ສູ້ຕ້ານການຮຸກຮານ ຂອງພວກສັກດີນາລ່າເມືອງຂຶ້ນ ເພື່ອປົກປັກຮັກສາປິຕຸພູມອັນແສນຮັກ ແລະ ຫວງແຫນຂອງຕົນ ທັງເປັນການສະເຫຼີມສະຫຼອງ ແລະ ຍ້ອງຍໍຜົນງານການເຄື່ອນໄຫວວຽກງານການຕ່າງປະເທດ ກໍຄື ການຈັດຕັ້ງປະຕິບັດນະໂຍບາຍການຕ່າງປະເທດຂອງລາວ ຕະຫຼອດໄລຍະ 78 ປີ ທີ່ຜ່ານມາ. ພ້ອມກັນນັ້ນ, ກໍເປັນໂອກາດອັນດີສຳລັບພະນັກງານກະຊວງການຕ່າງປະເທດ ໂດຍສະເພາະແມ່ນ ນັກການທູດໜຸ່ມນ້ອຍ ທີ່ຈະໄດ້ຮຽນຮູ້ ແລະ ກຳແໜ້ນນະໂຍບາຍການຕ່າງປະເທດຂອງລາວເຮົາ ແຕ່ລະໄລຍະ ເພື່ອນຳໃຊ້ເຂົ້າໃນການເຄື່ອນໄຫວວຽກງານການຕ່າງປະເທດໃຫ້ຄ່ອງແຄ້ວ ແລະ ສອດຄ່ອງກັບແນວທາງ ໃນການພັດທະນາເສດຖະກິດ-ສັງຄົມ ຂອງ ພັກ ແລະ ລັດ ກໍຄື ເພື່ອຮັບປະກັນຄຸນນະພາບຂອງການປະຕິບັດໜ້າທີ່ການເມືອງການທູດຂອງຕົນທີ່ໄດ້ຮັບການມອບໝາຍ ໃຫ້ໄດ້ຮັບໝາກຜົນດີຍິ່ງຂຶ້ນ.
ໃນພິທີ, ທ່ານ ສະເຫຼີມໄຊ ກົມມະສິດ ໄດ້ຍົກໃຫ້ເຫັນເຖິງປະຫວັດຄວາມເປັນມາ ແລະ ຄວາມໝາຍຄວາມສໍາຄັນຂອງວັນການທູດລາວ, ຜົນສໍາເລັດຂອງການເຄື່ອນໄຫວວຽກງານການຕ່າງປະເທດຂອງ ພັກ ແລະ ລັດຖະບານ ໃນຕະຫຼອດໄລຍະ 78 ປີ, ກາລະໂອກາດ ແລະ ສິ່ງທ້າທາຍ, ພ້ອມທັງກໍານົດທິດທາງ ແລະ ແຜນວຽກຈຸດສຸມໃນຕໍ່ໜ້າ ຊຶ່ງລາວເຮົາສືບຕໍ່ຮັກສາ ແລະ ເສີມຂະຫຍາຍຄວາມສາມັກຄີພິເສດ ແລະ ການຮ່ວມມືຮອບດ້ານ ກັບ ສສ ຫວຽດນາມ ຢ່າງໜັກແໜ້ນ ແລະ ນັບມື້ນັບມີໝາກຜົນຕົວຈິງ; ສ້າງບາດກ້າວໃໝ່ທີ່ໜັກແໜ້ນໃນການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານຕາມທິດ 4 ດີ ກັບ ສປ ຈີນ; ມິດຕະພາບ ແລະ ການພົວພັນທີ່ເປັນມູນເຊື້ອກັບ ຣັດເຊຍ, ສປປ ເກົາຫຼີ, ສ ກູບາ ແລະ ກໍາປູເຈຍ ໄດ້ຮັບການເສີມຂະຫຍາຍ; ໄດ້ເສີມສ້າງມິດຕະພາບ ແລະ ການຮ່ວມມືກັບປະເທດບ້ານໃກ້ເຮືອນຄຽງ ໂດຍຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ; ເສີມຂະຫຍາຍການຮ່ວມມືກັບປະເທດມະຫາອໍານາດ, ປະເທດໃຫຍ່ ແລະ ປະເທດເພື່ອນມິດອື່ນໆທັງຢູ່ໃກ້ ແລະ ຢູ່ໄກ, ມາຮອດປັດຈຸບັນ ສປປ ລາວ ໄດ້ສ້າງຕັ້ງສາຍພົວພັນການທູດກັບ 148 ປະເທດໃນໂລກ. ພ້ອມນັ້ນ, ສປປ ລາວ ຍັງໄດ້ເຄື່ອນໄຫວການທູດຢ່າງຫ້າວຫັນ ແລະ ເປັນເຈົ້າການໃນເວທີພາກພື້ນ ແລະ ສາກົນ, ພ້ອມທັງໄດ້ປັບປຸງຍົກລະດັບພື້ນຖານໂຄງລ່າງ, ບັນດາກົນໄກ ແລະ ນິຕິກໍາຕ່າງໆ ທີ່ຕິດພັນກັບວຽກງານການທູດການຕ່າງປະເທດ ໃຫ້ສອດຄ່ອງກັບສະພາບຄວາມຮຽກຮ້ອງຕ້ອງການຂອງວຽກງານໃນແຕ່ລະໄລຍະ. ພ້ອມດຽວກັນນີ້, ທ່ານ ສະເຫຼີມໄຊ ກົມມະສິດ ກໍໄດ້ແຈ້ງຄວາມຄືບໜ້າຂອງການກະກຽມຄວາມພ້ອມ ໃນການເປັນປະທານອາຊຽນ ຄັ້ງທີ 3 ຂອງ ສປປ ລາວ ໃນປີ 2024 ທີ່ຈະມາເຖິງນີ້, ເຊິ່ງ ສປປ ລາວ ເຮົາຈະເລີ່ມດໍາເນີນການເປັນປະທານອາຊຽນ ແຕ່ວັນທີ 1 ມັງກອນ 2024 ຫາ 31 ທັນວາ 2024 ພາຍໃຕ້ຄໍາຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ (ASEAN: Enhancing Connectivity and Resilience)”. ທ່ານ ຮອງນາຍົກລັດຖະມົນຕີ ໄດ້ຮຽກຮ້ອງໃຫ້ບັນດາອ້າຍເອື້ອຍນ້ອງພະນັກງານກະຊວງການຕ່າງປະເທດທຸກຄົນ ຈົ່ງຮ່ວມແຮງຮ່ວມໃຈກັນ ປະກອບສ່ວນຕາມພາລະບົດບາດຂອງຕົນ ເພື່ອເຮັດໃຫ້ການເປັນປະທານອາຊຽນ ແລະ ການເປັນເຈົ້າພາບກອງປະຊຸມຕ່າງໆ ໄດ້ຮັບຜົນສໍາເລັດ ເພື່ອຜົນປະໂຫຍດລວມຂອງພາກພື້ນ ແລະ ຜົນປະໂຫຍດແຫ່ງຊາດຂອງລາວເຮົາ.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ຍັງໄດ້ຊີ້ນໍາ ແລະ ໃຫ້ທິດເຍືອງທາງແກ່ພະນັກງານກະຊວງການຕ່າງປະເທດ ໂດຍໄດ້ເນັ້ນວ່າ ໃນສະພາບການຂອງໂລກທີ່ມີການຜັນແປໄປຢ່າງໄວວາ ແລະ ສະຫຼັບສັບຊ້ອນ, ພະນັກງານກະຊວງການຕ່າງປະເທດ ຫຼື ນັກການທູດ ຕ້ອງສືບຕໍ່ຍຶດໝັ້ນແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປີດກວ້າງການຮ່ວມມືແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ຕາມທິດຊີ້ນໍາເພີ່ມມິດຫຼຸດຜ່ອນສັນຕູ ພາຍໃຕ້ຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ພັດທະນາປະເທດຊາດ”; ພ້ອມທັງໄດ້ຢໍ້າຕື່ມອີກວ່າ ນັກການທູດ ຕ້ອງເປັນຄົນທີ່ມີຄວາມຮູ້ກວ້າງຂວາງ, ມີຄວາມຊໍານິຊໍານານດ້ານການພົວພັນສາກົນ, ມີຄວາມຮູ້ດ້ານເສດຖະກິດ, ກົດໝາຍ, ພາສາຕ່າງປະເທດ, ມີຄວາມຮູ້ດ້ານວັດທະນະທໍາ, ສາສະໜາ, ເຕັກໂນໂລຢີ, ຕ້ອງເປັນນັກເຈລະຈາ ແລະ ນັກໂຄສະນາທີ່ມີຄວາມສາມາດ ແລະ ຄ່ອງແຄ້ວ, ຕ້ອງມີຄວາມສະດຸ້ງໄວ ເພື່ອສາມາດເປັນເສນາທິການທີ່ດີໃຫ້ແກ່ພັກ ແລະ ລັດຖະບານໃນຂົງເຂດວຽກງານການຕ່າງປະເທດ ແນໃສ່ບັນລຸສອງຫນ້າທີ່ຍຸດທະສາດຂອງພັກ ແລະ ລັດ ຕາມລະດັບຄາດຫມາຍທີ່ວາງໄວ້ໄດ້ເປັນຢ່າງດີ.
ຂ່າວ-ພາບ: ກະຊວງການຕ່າງປະເທດ