ຕອນບ່າຍ ວັນທີ 12 ກໍລະກົດ 2024 ທີ່ ຫໍປະຊຸມແຫ່ງຊາດ, ກະຊວງການຕ່າງປະເທດໃນນາມອະນຸກໍາມະການກອງເລຂາຄະນະຊີ້ນຳລະດັບຊາດເພື່ອກະກຽມ ແລະດໍາເນີນການເປັນປະທານອາຊຽນ ປີ 2024 ໄດ້ຈັດກອງປະຊຸມເຜີຍແຜ່ກ່ຽວກັບການກະກຽມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມທີ່ກ່ຽວຂ້ອງ ເຊິ່ງຈະຈັດຂຶ້ນ ລະຫວ່າງວັນທີ 21-27 ກໍລະກົດ 2024 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ ໃຫ້ແກ່ບັນດາທູຕານຸທູດປະເທດສະມາຊິກອາຊຽນ, ຄູ່ຮ່ວມເຈລະຈາອາຊຽນ ແລະ ຄູ່ຮ່ວມມືພາຍນອກອາຊຽນ ທີ່ຈະເຂົ້າຮ່ວມກອງປະຊຸມດັ່ງກ່າວໂດຍການເປັນປະທານຂອງທ່ານ ຈາຕຸລົງ ບົວສີສະຫວັດ, ຫົວໜ້າກົມອາຊຽນ, ກະຊວງການຕ່າງປະເທດ. ເຂົ້າຮ່ວມກອງປະຊຸມຄັ້ງນີ້ ມີຜູ້ຕາງໜ້າຈາກກົມພິທີການທູດ, ກົມການຂ່າວ, ກົມກົງສູນ ແລະ ກົມເສດຖະກິດ,ກະຊວງການຕ່າງປະເທດ ແລະ ກົມການບິນພົນລະເຮືອນ, ກະຊວງໂຍທາທິການ ແລະ ຂົນສົ່ງເຂົ້າຮ່ວມບັນຍາຍ ແລະ ຜູ້ຕາງໜ້າຈາກສະຖານທູດປະເທດສະມາຊິກອາຊຽນ, ຄູ່ເຈລະຈາອາຊຽນ ແລະ ຄູ່ຮ່ວມມືພາຍນອກອາຊຽນ ປະຈຳ ສປປ ລາວ ແລະ ພະນັກງານຂອງແຕ່ລະອະນຸກໍາມະການກ່ຽວຂ້ອງ ເຂົ້າຮ່ວມຫຼາຍກວ່າ 200 ທ່ານ.
ຈຸດປະສົງຂອງການຈັດກອງປະຊຸມເຜີຍແຜ່ໃນຄັ້ງນີ້ ແມ່ນເພື່ອແຈ້ງກ່ຽວກັບການກະກຽມດ້ານພາລະທິການຕ່າງໆ ເຊັ່ນ: ສະຖານທີ່ຈັດກອງປະຊຸມ, ສະຖານທີ່ພັກເຊົາ, ພາຫະນະຮັບໃຊ້, ຂັ້ນຕອນການຂໍວິຊາເຂົ້າ-ອອກປະເທດ, ການກຽມຄວາມພ້ອມຂອງສະໜາມບິນ, ຄວາມພ້ອມຂອງສູນຂ່າວ ແລະ ແຜນການເຄື່ອນໄຫວອື່ນໆ.
ພາຍຫລັງໄດ້ຮັບຟັງການເຜີຍແຜ່ຄວາມຄືບໜ້າດ້ານຕ່າງໆແລ້ວ, ຜູ້ເຂົ້າຮ່ວມກອງປະຊຸມ ຍັງໄດ້ໄປຢ້ຽມຊົມເບິ່ງສະຖານທີ່ປະຊຸມຕົວຈິງຢູ່ ຫໍປະຊຸມແຫ່ງຊາດ ໂດຍສະເພາະບັນດາຫ້ອງປະຊຸມ, ຫ້ອງຮັບແຂກ, ຫ້ອງທີ່ຈັດໃຫ້ແຕ່ລະປະເທດ, ຫ້ອງອາຫານ, ຫ້ອງງານລ້ຽງ ແລະ ຫ້ອງອື່ນໆ ທີ່ຈະຮັບໃຊ້ໃນໄລຍະກອງປະຊຸມລັດຖະມົນຕີຕ່າງປະເທດອາຊຽນໃນຄັ້ງນີ້.
ໃນໂອກາດກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 57 ຄັ້ງນີ້ຈະມີກອງປະຊຸມລະດັບລັດຖະມົນຕີຕ່າງປະເທດປິ່ນອ້ອມອື່ນໆກັບປະເທດຄູ່ເຈລະຈາ, ຄູ່ຮ່ວມມືຂະແໜງການ ແລະຄູ່ຮ່ວມມືໃນຂອບແມ່ນໍ້າຂອງ ລວມແລ້ວຈະມີກອງປະຊຸມລະດັບລັດຖະມົນຕີ ປະມານ 25 ກອງປະຊຸມ ແລະມີລັດຖະມົນຕີຕ່າງປະເທດ ແລະຕາງໜ້າ 35 ປະເທດເຂົ້າຮ່ວມ. ໂດຍຈະມີຄະນະຜູ້ແທນເດີນທາງມາເຂົ້າຮ່ວມກອງປະຊຸມ ຫຼາຍກວ່າ 1,000 ທ່ານ ແລະ ມີນັກຂ່າວຈາກພາຍໃນ ແລະ ຕ່າງປະເທດ ມາເກັບກຳຂ່າວ ຫຼາຍກ່ວາ 500 ທ່ານ.
