ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກະຊວງການຕ່າງປະເທດຖະແຫຼງກ່ຽວກັບມາດຕະການຄຸ້ມຄອງ ແລະ ຊ່ວຍເຫຼືອນັກສຶກສາ ແລະ ພົນລະເມືອງລາວຢູ່ຈີນ

ໃນຕອນບ່າຍວັນທີ 3 ກຸມພາ 2020, ທີ່ນະຄອນຫຼວງວຽງຈັນ, ທ່ານ ບົວແກ້ວ ພູມວົງໄຊ ຫົວໜ້າກົມການຂ່າວ, ກະຊວງການຕ່າງປະເທດ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບມາດຕະການຄຸ້ມຄອງ ແລະ ຊ່ວຍເຫລືອບັນດານັກສຶກສາ ແລະ ພົນລະເມືອງລາວທີ່ອາໄສຢູ່ ສປ ຈີນ. ທ່ານ ບົວແກ້ວ ພູມວົງໄຊ ກ່າວວ່າ: ກະຊວງການຕ່າງປະເທດແຫ່ງ ສປປ ລາວ ໄດ້ສືບຕໍ່ຕິດຕາມສະພາບການລະບາດຂອງພະຍາດອັກເສບປອດ ເຊື້ອຈຸລະໂລກສາຍພັນໃໝ່ຢ່າງໃກ້ຊິດ, ພາຍຫຼັງທີ່ໄດ້ເລີ່ມລະບາດຢູ່ເມືອງ ອູຫັ້ນ, ແຂວງ ຫູເປີ່ຍ ຂອງສປ ຈີນ ນັບແຕ່ທ້າຍປີ 2019 ເປັນຕົ້ນມາ ແລະ ໄດ້ແຜ່ລະບາດໄປຫຼາຍແຂວງ, ລວມທັງ ນະຄອນຫຼວງປັກກິ່ງ, ຫຼາຍປະເທດ ແລະ ເຂດປົກຄອງຕ່າງໆໃນໂລກ, ຊຶ່ງມາຮອດວັນທີ 3 ກຸມພາ 2020 ໄດ້ມີຜູ້ເສຍຊີວິດແລ້ວທັງໝົດ 425 ຄົນ ແລະ ມີຜູ້ຕິດເຊື້ອຫຼາຍກວ່າ 20.440 ຄົນ. ຕໍ່ສະພາບການດັ່ງກ່າວ, ກະຊວງການຕ່າງປະເທດແຫ່ງ ສປປ ລາວ, ໂດຍສະເພາະແມ່ນສະຖານເອກອັກຄະລັດຖະທູດ ແລະ ບັນດາສະຖານກົງສຸນແຫ່ງ ສປປ ລາວ ປະຈໍາຢູ່ ສປ ຈີນ ໄດ້ເອົາໃຈໃສ່ໃຫ້ຄໍາແນະນໍາ ແລະ ປະສານສົມທົບກັບນັກສຶກສາລາວທີ່ພວມສຶກສາຮໍ່າຮຽນຕໍ່ຢູ່ ສປ ຈີນ ຢ່າງໃກ້ຊິດ, ພ້ອມທັງໄດ້ຖາມເຖິງຊີວິດການເປັນຢູ່, ບັນຫາ ແລະ ຄວາມຕ້ອງການຊ່ວຍເຫຼືອຂອງເຂົາເຈົ້າ; ພ້ອມນັ້ນ ກໍ່ໄດ້ແນະນໍາໃຫ້ນັກສຶກສາຈໍານວນທີ່ໄປຢ້ຽມຢາມໝູ່ ແລະ ພີ່ນ້ອງທີ່ຕ່າງແຂວງຂອງຈີນນັ້ນ ພາຍຫຼັງທີ່ສອບເສັງແລ້ວ ໃຫ້ຢູ່ກັບທີ່, ແລະ ເອົາໃຈໃສ່ຕິດຕາມຂ່າວສານຈາກເຈົ້າໜ້າທີ່ຝ່າຍຈີນຢ່າງໃກ້ຊິດ ແລະ ປະຕິບັດຕາມລະບຽບການສຸກເສີນ ແລະ ຄໍາແນະນໍາຂອງແຕ່ລະເຂດ ແລະ ແຕ່ລະໂຮງຮຽນຢ່າງເຄັ່ງຄັດ.


ນັກສຶກສາລາວທີ່ໄປຮຽນຢູ່ ສປ ຈີນ ໃນສົກ 2019-2020 ມີທັງໝົດ 8.230 ຄົນ ຍິງ 3.542 ຄົນ, ແຕ່ຫຼັງຈາກສອບເສັງຈົບພາກຮຽນທີ 1 ໃນທ້າຍເດືອນ ທັນວາ 2019, ນັກສຶກສາລາວສ່ວນໃຫຍ່ແມ່ນໄດ້ເດີນທາງກັບ ສປປ ລາວ ເພື່ອຢ້ຽມຢາມຄອບຄົວຕາມປົກກະຕິ. ມາຮອດວັນທີ 30 ມັງກອນ 2020, ມີນັກສຶກສາລາວທີ່ຍັງຢູ່ ສປ ຈີນ ຈໍານວນ 242 ຄົນ ຍິງ 71 ຄົນ, ໃນນີ້ຢູ່ນະຄອນຫຼວງປັກກິງ 10 ຄົນ, ຍິງ 5 ຄົນ ແລະ ຢູ່ເມືອງອູຮັ້ນ 37 ຄົນ, ຍິງ 18 ຄົນ, ຊຶ່ງນັກສຶກສາເຫຼົ່ານີ້ແມ່ນມີສຸຂະພາບແຂງແຮງດີ ແລະ ຢູ່ໃນຄວາມຮັບຜິດຊອບຂອງໂຮງຮຽນ, ໂດຍທາງໂຮງຮຽນຈີນມີການຈັດຫານໍ້າດື່ມ ແລະ ອາຫານການກິນໄວ້ບໍລິການ ແລະ ເປີດຮ້ານຄ້າພາຍໃນໂຮງຮຽນ. ໂດຍລວມແລ້ວ, ນັກສຶກສາລາວ ກໍ່ຄື ນັກສຶກສາຕ່າງປະເທດທີ່ຢູ່ມະຫາວິທະຍາໄລຕ່າງໆໃນ ສປ ຈີນ ແມ່ນໄດ້ຮັບການເອົາໃຈໃສ່ຈາກການຈັດຕັ້ງຂອງຝ່າຍຈີນເປັນຢ່າງດີ. ກະຊວງການຕ່າງປະເທດ ແລະ ບັນດາສໍານັກງານຜູ້ຕາງໜ້າແຫ່ງ ສປປ ລາວ ຢູ່ ສປ ຈີນ ຈະສືບຕໍ່ປະສານງານຢ່າງໃກ້ຊິດກັບບັນດານັກສຶກສາລາວຜູ້ທີ່ຍັງຢູ່ປະເທດຈີນ ເພື່ອໃຫ້ກໍາລັງໃຈ ແລະ ຊ່ວຍເຫຼືອແກ່ເຂົາເຈົ້າ ພ້ອມທັງສືບຕໍ່ປະສານກັບເຈົ້າໜ້າທີ່ຂອງຝ່າຍຈີນ ກ່ຽວກັບມາດຕະການຕອບໂຕ້ກັບການລະບາດຂອງພະຍາດດັ່ງກ່າວໃນແຕ່ລະໄລຍະ.
ໃນໂອກາດນີ້, ກະຊວງການຕ່າງປະເທດ ຂໍແຈ້ງໃຫ້ບັນດານັກສຶກສາລາວເຮົາຜູ້ທີ່ຍັງຢູ່ ສປ ຈີນ ຈົ່ງປະຕິບັດຕາມຄໍາແນະນໍາຂອງບັນດາສໍານັກງານຜູ້ຕາງໜ້າແຫ່ງ ສປປ ລາວ ປະຈໍາ ສປ ຈີນ ແລະ ປະຕິບັດຕາມລະບຽບການສຸກເສີນຂອງຝ່າຍຈີນຢ່າງເຂັ້ມງວດ. ສໍາລັບນັກສຶກສາລາວຜູ້ທີ່ເດີນທາງກັບ ສປປ ລາວ ເພື່ອຢ້ຽມຢາມຄອບຄົວນັ້ນ ກໍ່ຂໍໃຫ້ຕິດຕາມຂໍ້ມູນຂ່າວສານຈາກທາງມະຫາວິທະຍາໄລທີ່ຕົນສຶກສາຢູ່ນັ້ນຢ່າງເປັນປົກກະຕິ ກ່ຽວກັບການເປີດພາກຮຽນທີ 2 ຂອງສົກປີ 2019-2020 ພາຍຫຼັງທີ່ທາງການຈີນໄດ້ປະກາດສືບຕໍ່ປິດສະຖາບັນການສຶກສາຕ່າງໆແຕ່ຂັ້ນມະຫາວິທະຍາໄລ ລົງຮອດຂັ້ນອະນຸບານຢ່າງບໍ່ມີກໍານົດ.