ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກະຊວງການເງີນຜ່ານຮ່າງກົດໝາຍວ່າດ້ວຍການປະກັນໄພໃຫ້ສະພາແຫ່ງຊາດພິຈາລະນາ ແລະ ຮັບຮອງ.

ການດຳເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ 8 ໃນວັນທີ 29 ພະຈິກ 2019 ທີ່ຫໍປະຊຸມສະພາແຫ່ງຊາດ ຫລັກ 6 ນະຄອນຫລວງວຽງຈັນ. ພາຍໃຕ້ການເປັນປະທານຂອງທ່ານ ສົມພັນ ແພງຄຳມີ, ຮອງປະທານສະພາແຫ່ງຊາດ. ສະມະຊິກສະພາແຫ່ງຊາດແຕ່ລະເຂດເລືອກຕັ້ງໄດ້ຮັບຟັງ ແລະ ຄົ້ນຄວ້າປະກອບຄຳຄິດເຫັນເພື່ອຮັບຮອງເອົາຮ່າງກົດໝາຍວ່າດ້ວຍການປະກັນໄພ ສະບັບປັບປຸງ, ສະເໜີໂດຍ ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງີນ.

ຮ່າງກົດໝາຍວ່າດ້ວຍການປະກັນໄພໄດ້ຮັບການຮັບຮອງຈາກສະພາແຫ່ງຊາດໃນປີ 1990 ປະກອບມີ 6 ພາກ, 11 ໝວດ, 69 ມາດຕາ. ຈາກນັ້ນໄດ້ຮັບການປັບປຸງມາແລ້ວ 1 ຄັ້ງໃນປີ 2011 ປະກອບມີ 11 ພາກ, 13 ໝວດ, 126 ມາດຕາ. ມາຮອດກອງປະຊຸມສະພາຄັ້ງນີ້ ໄດ້ປັບປຸງໃຫ້ເຫລືອ 11 ພາກ, 12 ໝວດ ແລະ 99 ມາດຕາ.

ທ່ານ ສົມດີ ດວງດີ ຍົກໃຫ້ເຫັນວ່າ:  ເນື້ອໃນບາງມາດຕາຂອງກົດໝາຍວ່າດ້ວຍການປະກັນໄພທີ່ນໍາໃຊ້ໃນປັດຈຸບັນຍັງກໍານົດແບບລວມໆ ແລະ ບໍ່ຮັດກຸມເທົ່າທີ່ຄວນ, ການກຳນົດທຶນຈົດທະບຽນຂອງບໍລິສັດປະກັນໄພຕ່ຳເກີນໄປ, ການວາງເງີນເຂົ້າປະກັນໄພຂອງບໍລິສັດຍັງຈຳກັດ ແລະ ອື່ນໆ. ເຮັດໃຫ້ມີຄວາມຈຳເປັນຕ້ອງໄດ້ປັບປຸງຮ່າງກົດໝາຍສະບັບນີ້ຄືນໃໝ່ ເພື່ອ
ໃຫ້ແທດເໝາະກັບການເຕີບໃຫ່ຍຂະຫຍາຍຕົວຂອງສັງຄົມໃນປັດຈຸບັນ. ຖ້າຫາກຮ່າງກົດໝາຍສະບັບນີ້ ຜ່ານການຮັບຮອງ ແລະ ປະກາດໃຊ້ຢ່າງເປັນທາງການຈະເປັນບ່ອນອີງທີ່ສຳຄັນ
ໃນການຄຸ້ມຄອງ, ຕິດຕາມ ແລະ ກວດກາວຽກງານປະກັນໄພໃນລາວໃຫ້ມີປະສິດທິຜົນກວ່າເກົ່າ, ທັງເປັນການຍົກບົດບາດຂອງຮ່າງກົດໝາຍສະບັບນີ້ໃຫ້ສູງຂື້ນ ແລະ ໃກ້ຄຽງກັບບັນດາປະເທດເພື່ອນມິດ ແລະ ສອດຄ່ອງກັບຫລັກການຄຸ້ມຄອງຂອງປະກັນໄພສາກົນຕື່ມອິກ.

ພາຍຫລັງທ່ານນາຍົກລັດຖະມົນຕີ, ລັດຖະມົນຕີກະຊວງການເງີນ ຂື້້ນຜ່ານຮ່າງກົດໝາຍວ່າດ້ວຍການປະກັນໄພສະບັບປັບປຸງສຳເລັດ ທ່ານ ສົມພັນ ແພງຄຳມີ, ຮອງປະທານສະພາແຫ່ງຊາດ ໃນນາມປະທານກອງປະຊຸມໄດ້ມີຄຳເຫັນເຈາະຈີ້ມເພື່ອໃຫ້ສະມະຊິກສະພາແຫ່ງຊາດໄດ້ປະກອບຄຳເຫັນໃສ່ຮ່າງກົດໝາຍສະບັບນີ້ ເພື່ອໃຫ້ມີເນື້້ອໃນຄົບຖ້ວນ ແລະ ຮັດກຸມຂື້ນ
ກ່ວາເກົ່າ.

ຂຽນຂ່າວ: ບຸນຕຽງ ຈັນທະວົງ