ກະຊວງຍຸຕິທໍາ ປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ.

ພິທີປາຖະກະຖາເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ໄດ້ຈັດຂຶ້ນໃນຕອນເຊົ້າຂອງ ວັນທີ 23 ມັງກອນ 2024 ທີ່ຫ້ອງປະຊຸມໃຫຍ່ຂອງກະຊວງຍຸຕິທໍາ ໂດຍການໃຫ້ກຽດເຂົ້າ ຮ່ວມ ແລະ ປາຖະກະຖາໂດຍ ພົນໂທ ແສງນວນ ໄຊຍະລາດ ເລຂາຄະນະພັກ, ປະທານສະຫະພັນນັກຮົບເກົ່າແຫ່ງຊາດລາວ, ມີ ທ່ານ ບຸນທາ ຊົງເຢີທ່າວ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງຍຸຕິທໍາ, ມີ ທ່ານຮອງລັດຖະມົນຕີ, ຫົວໜ້າຫ້ອງການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ພ້ອມດ້ວຍພະນັກງ ານ-ລັດຖະກອນຂອງກະຊວງຍຸຕິທໍາເຂົ້າຮ່ວມຢ່າງພ້ອມພຽງ.

ໃນໂອກາດນີ້, ພົນໂທ ແສງນວນ ໄຊຍະລາດ ເລຂາຄະນະພັກ, ປະທານສະຫະພັນນັກຮົບເກົ່າແຫ່ງຊາດລາວໄດ້ຫວນຄືນເຖິງມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ ໂດຍສະເພາະແມ່ນໄລຍະການຕໍ່ສູ້ກູ້ຊາດຕ້ານການຮຸກຮານຂອງຈັກກະພັດລ່າເມືອງຂື້ນຄືຈັກກະພັດອາເມລິກາກໍຄືການປະຕິບັດສອງໜ້າທີ່ຍຸດທະສາດອັນສຳຄັນ ໃນການປົກປັກຮັກສາ ແລະ ສ້າງສາພັດທະນາປະ ເທດຊາດຂອງພວກເຮົາ. ການສ້າງຕັ້ງກອງທັບປະຊາຊົນລາວ ແມ່ນເຫດການໜຶ່ງທີ່ສຳຄັນທີ່ສຸດໃນປະຫວັດສາດຂອງປະເທດເຮົາ ເປັນບາດກ້າວແຫ່ງການເຕີບໃຫຍ່ຂະຫຍາຍຕົວຂອງການປະຕິວັດ ແລະ ກໍແມ່ນບາດກ້າວທີ່ເຂັ້ມແຂງຂອງກອງກຳລັງປະກອບອາວຸດປະຕິວັດ ເປັນຂະບວນຫຼັກແຫຼ່ງໃນການຕໍ່ສູ້ຂອງປະຊາຊົນລາວ ເພື່ອຍາດເອົາຄວາມເປັນເອກະລາດແຫ່ງຊາດ ແລະ ຄວາມຢູ່ເຢັນເປັນສຸກຂອງປະຊາຊົນລາວບັນດາເຜົ່າ. ໃນໄລຍະສ້າງຕັ້ງຂຶ້ນໃໝ່ແມ່ນຊື່ວ່າກອງລາດຊະວົງ ຕໍ່ມາແມ່ນກອງທັບລາວອິດສະຫຼະ ຈາກນັ້ນກໍໄດ້ປ່ຽນຊື່ມາເປັນກອງທັບປົດປ່ອຍປະຊາຊົນລາວ ແລະ ປັດຈຸບັນແມ່ນກອງທັບປະຊາຊົນລາວ. ໃນສະໄໝຕໍ່ສູ້ກູ້ຊາດຕ້ານຈັກກະພັດລ່າເມືອງຂຶ້ນແບບເກົ່າ ແລະ ໃໝ່, ກອງກຳລັງປະຕິວັດໄດ້ເຮັດໜ້າທີ່ຂອງຕົນດ້ວຍຄວາມອົງອາດກ້າຫານຍອມເສຍສະລະເລືອດເນື້ອເພື່ອກອບກູ້ເອົາຜືນແຜ່ນດິນ ແລະ ອຳນາດອະທິປະໄຕຈາກການຄອບຄອງຂອງຈັກກະພັດຕ່າງດ້າວມາໃນກຳມືແມ່ນຜົນງານອັນໃຫຍ່ຫຼວງຂອງກອງທັບ ກໍຄືປະຊາຊົນລາວທຸກຊົນເຜົ່າ.ນອກຈາກນີ້ທ່ານກໍໄດ້ຍົກໃຫ້ເຫັນເຫດການປະຫວັດສາດທີ່ກອງພັນທີ 2 ໄດ້ຜ່າວົງປິດລ້ອມຂອງສັດຕູຢູ່ແຂວງຊຽງຂວາງໄປເຖິງຖານທີ່ໝັ້ນຂອງການປະຕິວັດໄດ້ຢ່າງປອດໄພ ແລະ ເຫດການຜູ້ນຳແນວລາວຮັກຊາດແຫກຄຸກໂພນເຄັງຢ່າງມະຫັດສະຈັນ ຖືເປັນສອງເຫດການທີ່ສຳຄັນໃນໜ້າທີ່ປະຫວັດສາດຂອງຊາດລາວເຮົາ.

ໃນໂອກາດນີ້ທ່ານຍັງໄດ້ຍົກໃຫ້ເຫັນເຖິງ 5 ບັ້ນຮົບໃຫຍ່ທີ່ກອງທັບປະຕິວັດໄດ້ດຳເນີນຕໍ່ສູ້ກູ້ຊາດທີ່ເຕັມໄປດ້ວຍການເສຍສະລະເອົາເລືອດເນື້ອທາແຜ່ນດິນແລະສາມາດຍາດໄດ້ໄຊຊະນະຢ່າງລຽນຕິດ ຄື: ບັ້ນຮົບປົດປ່ອຍຫຼວງນ້ຳທາ (ແຂວງຫຼວງນ້ຳທາ), ບັ້ນຮົບນ້ຳບາກ (ແຂວງຫຼວງພະບາງ), ບັ້ນຮົບຜາຖີ່ (ແຂວງຫົວພັນ), ບັ້ນຮົບກູ້ກຽດ (ທົ່ງໄຫຫີນ-ແຂວງຊຽງຂວາງ) ແລະ ບັ້ນຮົບລາມເຊິນ (ຫວຽດນາມ). ກອງທັບກັບປະຊາຊົນ ຍາມໃດກໍປຽບເໝືອນປາກັບນ້ຳ ທີ່ບໍ່ສາມາດແຍກອອກຈາກກັນໄດ້. ຈຸດປະສົງຂອງການຈັດປາຖະກະຖາໃນເທື່ອນີ້ກໍເພື່ອ ເຮັດໃຫ້ພະນັກງານ-ລັດຖະກອນຂອງກະຊວງຍຸຕິທໍາ ໄດ້ຮັບຮູ້, ເຂົ້າໃຈ ແລະ ກຳໄດ້ປະຫວັດ ຕົ້ນກຳເນີດ, ແລະການເຕີບໃຫຍ່ຂະຫຍາຍຕົວ ການຕໍ່ສູ້ເດັດດ່ຽວໜຽວແໜ້ນ ບໍ່ຍອມຈຳນົນ ຂອງກອງທັບປະຊາຊົນລາວໃນແຕ່ລະໄລຍະຂອງການປະຕິວັດລາວນັບແຕ່ມື້ສ້າງຕັ້ງຈົນເຖິງປັດຈຸບັນ.

ຂ່າວ: ອ່ອນຄໍາ ໄຊຍະວົງ; ພາບ: ນ. ບຸນຖອມ ພະສະແຫວງ