ໃນວັນທີ 16 ພຶດສະພາ 2024 ທີ່ຫ້ອງປະຊຸມຂອງກະຊວງຍຸຕິທໍາ, ຫ້ອງການກະຊວງ ໄດ້ຈັດກອງປະຊຸມຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ໂດຍການເປັນປະທານຂອງ ທ່ານ ບຸນທາ ຊົ່ງເຢີທ່າວ, ຮອງລັດຖະມົນຕີ ກະຊວງຍຸຕິທໍາ, ປະທານຄະນະສົ່ງເສີມຄວາມກ້າວໜ້າຂອງແມ່ ຍິງ, ແມ່ ແລະ ເດັກ, ມີທ່ານ ນ. ຟູລເວຍ ເຄຼຮິຊິ ຫົວໜ້າໂຄງການຄັນຮົ່ມ ພ້ອມຄະນະຂອງທັງສອງຝ່າຍເຂົ້າຮ່ວມ.
ກອງປະຊຸມ ໄດ້ປຶກສາວຽກງານພາຍໃຕ້ໂຄງການຄັນຮົ່ມ ໄລຍະ II ຊຶ່ງຈັດຕັ້ງປະຕິບັດຮ່ວມກັນ ໂດຍອົງການ UNFPA ແລະ UNDP ແມ່ນຮັບຜິດຊອບແຜນງານທີ 3: ປັບປຸງໂຄງຮ່າງການຈັດຕັ້ງ ແລະ ກອບນະໂຍບາຍ ທີ່ແນໃສ່ການເພີ່ມທະວີການລຶບລ້າງຄວາມຮຸນແຮງບົນພື້ນຖານທາງເພດຕໍ່ກັບແມ່ຍິງ ແລະ ການສົ່ງເສີມການມີສ່ວນຮ່ວມຂອງແມ່ຍິງ ໂດຍການພັດທະນາຫຼັກ ສູດການຝຶກອົບຮົມທີ່ສະເພາະເຈາະຈົງສໍາລັບຂະແໜງການຍຸຕິທໍາ, ເຈົ້າໜ້າທີ່ຕໍາຫຼວດ ແລະ ໜ່ວຍໄກ່ເກ່ຍຂໍ້ຂັດແຍ່ງຂັ້ນບ້ານ ເພື່ອຮັບປະກັນໃຫ້ແກ້ໄຂກໍລະນີຄວາມຮຸນແຮງບົນພື້ນຖານທາງເພດ ມີຄວາມອ່ອນໄຫວ, ມີປະສິດທິພາບ ແລະ ສອດຄ່ອງກັບຫຼັກການເອົາຜູ້ເຄາະຮ້າຍເປັນໃຈກາງ. ໂດຍການເພີ່ມທະວີຂອດປະສານງານ, ເພີ່ມຈໍານວນຜູ້ຊ່ຽວຊານ ແລະ ສ້າງຄວາມໄວ້ເນື້ອເຊື່ອໃຈພາຍໃນຂະແໜງການຍຸຕິທໍາ, ແຜນງານທີ 3 ມີຈຸດປະສົງເພື່ອສ້າງສະພາບແວດລ້ອມທີ່ດີສໍາລັບຜູ້ເຄາະຮ້າຍ, ຜູ້ລອດຊີວິດ ແລະ ປັບປຸງການເຂົ້າເຖິງຄວາມຍຸຕິທໍາຂອງຊຸມຊົນ.
ຕອນທ້າຍ ປະທານກອງປະຊຸມ ໄດ້ມີທິດຊີ້ນໍາຕໍ່ວຽກງານຈຸດສຸມໃນຕໍ່ໜ້າ ແລະ ສະແດງຄວາມຂອບໃຈ ມາຍັງທ່ານ ຫົວໜ້າໂຄງການ ພ້ອມດ້ວຍຄະນະ ທີ່ໄດ້ໃຫ້ກຽດສະລະເວລາ ເຂົ້າຮ່ວມປຶກສາວຽກໂຄງການໄລຍະທີ II ໃນຄັ້ງນີ້.
ຂ່າວ-ພາບ: ໄໝສີສົດ ສິນພອນເພັດ
