ພິທີເຊັນບົດບັນທຶກຄວາມເຂົ້າໃຈເພື່ອສຶກສາຄວາມເປັນໄປໄດ້ໃນໂຄງການ ປະກັນໄພນັກທ່ອງທ່ຽວຢູ່ ສປປ ລາວ ລະຫວ່າງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ບໍລິສັດ ຟໍເຕ ໂຕໂກລາວ ປະກັນໄພ ຈຳກັດ ໄດ້ຈັດຂຶ້ນໃນວັນທີ 17 ທັນວາ 2020 ທີ່ຫ້ອງປະຊຸມ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຂົ້າຮ່ວມເປັນສັກຂີພະຍານໂດຍ ທ່ານ ສຈ.ປອ. ກິແກ້ວ ໄຂຄຳພິທູນ ເລຂາທິການສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຫົວໜ້າກົມ, ຮອງກົມ ພ້ອມດ້ວຍຄະນະ, ທ່ານ ທົ້ງ ສຸກຸນເທົາວະຣີ ເອກອັກຄະຣາຊະທູດຣາຊາອານາຈັກກຳປູເຈຍ ປະຈຳລາວ, ທ່ານ ຄຳສະຫວ່າງ ມິງບຸບຜາ ທີ່ປຶກສາອາວຸໂສ ບໍລິສັດ ຟໍເຕ-ໂຕໂກລາວ ປະກັນໄພ ຈຳກັດ, ທ່ານ ຄາຊຶອິຈິ ອິວະຄະມິ ຫົວນ້າອົງການສົ່ງເສີມການຄ້າ ຍີ່ປຸ່ນ, ທ່ານ ຄາຊຶມິເນ ຄີຄືທະ ປະທານສະພາການຄ້າ ແລະ ອຸດສາຫະກຳ ຍີ່ປຸ່ນ ປະຈຳ ສປປ ລາວ, ທ່ານ ນາງ ຣາຟີກາ ຮາຊູຣາ ໂມຫາມັດ ຣີດຊວນ ຜູ້ຕາງໜ້າເອກອັກຄະຣາຊະທູດມາເລເຊຍ ປະຈຳ ສປປ ລາວ ແລະ ທ່ານ ລີມ ຄັງ ຮົງ ເລຂາໂທ, ຜູ້ຕາງໜ້າຈາກສະຖານທູດສິງກະໂປ ປະຈຳ ສປປ ລາວ ພ້ອມດ້ວຍແຂກຖືກເຊີນເຂົ້າຮ່ວມ.
ຈຸດປະສົງແມ່ນເພື່ອດຶງດູດຊອກຫາແຫຼ່ງທຶນທີ່ຈະມາພັດທະນາອຸດສາຫະກຳການທ່ອງທ່ຽວຂອງ ສປປ ລາວ; ດຶງດູດເຕັກນິກປະສົບການການບໍລິຫານຄຸ້ມຄອງອຸດສາຫະກໍາການທ່ອງທ່ຽວຈາກຕ່າງປະເທດ; ດຶງດູດເອົາຫົວໜ່ວຍທຸລະກິດການທ່ອງທ່ຽວທັງພາຍໃນ ແລະ ຕ່າງປະເທດທີ່ມີປະສົບການເຂົ້າມາລົງທຶນໃນຂະແໜງການ ທ່ອງທ່ຽວໃນ ສປປ ລາວ, ເພື່ອເຜີຍແຜ່ເອກະລັກການທ່ອງທ່ຽວທາງທໍາມະຊາດ, ວັດທະນາທໍາ, ປະຫວັດສາດ ຂອງສປປ ລາວ, ສາມາດສ້າງສິ່ງພີມ, ສ້າງຮູບເງົາ, ວີດີໂອ, ຮູບພາບ ເພື່ອເປັນການໂຄສະນາແຫຼ່ງທ່ອງທ່ຽວຂອງ ສປປ ລາວ ໃຫ້ຕ່າງປະເທດຮັບຮູ້, ໃຫ້ນັກທ່ອງທ່ຽວຈາກຕ່າງປະເທດມາທ່ຽວລາວໃຫ້ຫຼາຍຂື້ນ; ເຜີຍແຜ່ນະໂຍບາຍຊຸກຍູ້ການທ່ອງທ່ຽວຂອງ ສປປ ລາວ, ເພື່ອໃຫ້ຜູ້ລົງທຶນຕ່າງປະເທດມາລົງທຶນໃຫ້ຫຼາຍຂື້ນໃນຂະແໜງການທ່ອງທ່ຽວຢູ່ ສປປ ລາວ, ເພື່ອຊຸກຍູ້, ສົ່ງເສີມໃຫ້ຂະແໜງການທ່ອງທ່ຽວໃນສປປ ລາວ ມີຄຸນນະພາບທີ່, ຮ່ວມກັນຈັດຝຶກອົບຮົມໃຫ້ແກ່ພະນັກງານໃນການຄຸ້ມຄອງບໍລິຫານ, ການໂຄສະນາເຜີຍແຜ່, ການຊອກຫາແຫຼ່ງທຶນຕ່າງໆ, ພ້ອມນັ້ນ ພາຍໃຕ້ການສະໜັບສະໜູນຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ບໍລິສັດ ຟໍເຕ ໂຕໂກລາວ ປະກັນໄພ ຈຳກັດ ສາມາດສ້າງໂຮງຮຽນເຕັກນິກວິຊາຊີບ ເພື່ອຝຶກອົບວຽກງານການທ່ອງທ່ຽວ ເພື່ອສ້າງບຸກຄະລາກອນດ້ານການທ່ອງທ່ຽວຂອງ ສປປລາວ. ບໍລິສັດ ຟໍເຕ ໂຕໂກລາວ ປະກັນໄພ ຈຳກັດ ສາມາດສຶກສາ, ຊອກຫາແຫຼ່ງທຶນ, ເຕັກນິກ, ຫົວໜ່ວຍທຸລະກິດ ເພື່ອມາລົງທຶນໃນຂະແໜງການອຸດສາຫະກໍາການທ່ອງທ່ຽວ, ສຶກສາສ້າງແຜນຄຸ້ມຄອງການບໍລິຫານແຫຼ່ງທ່ອງທ່ຽວທາງທໍາມະຊາດ, ວັດທະນາທໍາ, ປະຫວັດສາດ. ນໍາໃຊ້ເຕັກນິກທີ່ທັນສະໄໝເຂົ້າມາຄຸ້ມຄອງການທ່ອງທ່ຽວ. ສຶກສາສ້າງແຜນຄຸ້ມຄອງຕະຫຼາດການທ່ອງທ່ຽວ, ຄຸ້ມຄອງຫົວໜ່ວຍທຸລະກິດການທ່ອງທ່ຽວ ສາມາດຍົກສູງຄຸນນະພາບການທ່ອງທ່ຽວຂອງສປປ ລາວ ຂື້ນໃນເວທີສາກົນ.
Loading...