ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກະຊວງປ້ອງກັນຄວາມສະຫງົບ ຈະກໍ່ສ້າງເຮືອນຮັບແຂກທັນສະໄໝ ລະດັບ 5 ດາວ ຢູ່ຫຼວງພະບາງ

ໃນວັນທີ 9 ມັງກອນ 2020 ຢູ່ສັນຕິລິສອດ ນະຄອນຫຼວງພະບາງ, ແຂວງຫຼວງພະບາງ, ກົມໃຫຍ່ພະລາທິການ ກະຊວງປ້ອງກັນຄວາມສະຫງົບ ແລະ ບໍລິສັດເອເຊຍລົງທຶນພັດທະນາ ແລະ ກໍ່ສ້າງຈຳກັດຜູ້ດຽວ ໄດ້ຮ່ວມກັນເຊັນສັນຍາການລົງທືືນກໍ່ສ້າງເຮືອນຮັບແຂກທັນສະໄໝ ລະດັບ 5 ດາວ ຂອງກອງບັນຊາການ ປກສ ແຂວງຫຼວງພະບາງ ຢ່າງເປັນທາງການ.
ເຂົ້າຮ່ວມເປັນສັກຂີພິຍານໃນພິທີເຊັນສັນຍາໃນຄັ້ງນີ້, ມີທ່ານພົນໂທ ວິໄລ ຫຼ້າຄຳຟອງ, ລັດຖະມົນຕີກະຊວງປ້ອງກັນຄວາມສະຫງົບ, ພ້ອມດ້ວຍ ທ່ານ ຄຳຂັນ ຈັນທະວີສຸກ, ເຈົ້າແຂວງຫຼວງພະບາງ ແລະ ບັນດາຫົວໜ້າກົມ-ຮອງກົມ, ຫ້ອງວ່າການກະຊວງ, ກອງບັນຊາການ ປກສ ແຂວງຫຼວງພະບາງ, ກົມກອງອ້ອມຂ້າງກະຊວງ, ແລະ ພະແນກການທີ່ກ່ຽວຂ້ອງອ້ອມຂ້າງແຂວງ ຕະຫຼອດຮອດຜູ້ອຳນວຍການບໍລິສັດເຂົ້າຮ່ວມ.
ໂຄງການກໍ່ສ້າງເຮືອນຮັບແຂກທັນສະໄໝ ລະດັບ 5 ດາວ ເປັນໂຄງການຮ່ວມລົງທຶນ ລະຫວ່າງ ກະຊວງປ້ອງກັນຄວາມສະຫງົບ ແລະ ນັກທຸລະກິດລາວ ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານວິຊາສະເພາະກຳລັງປ້ອງກັນຄວາມສະຫງົົບໃຫ້ດີຂື້ນ ແລະ ທັງເພື່ອບໍລິການຮັບໃຊ້ແຂກພາຍໃນ ແລະ ຕ່າງປະເທດ, ແລະ ເພື່ອເປັນການສົ່ງເສີມການລົງທືນພາຍໃນ ດ້ວຍການສ້າງຜົນປະໂຫຍດຮ່ວມກັນ, ໃນມູນຄ່າການລົງທືນ 32.230.000 ໂດລາສະຫະລັດ, ດ້ວຍໄລຍະເວລາລົງທຶນ 50 ປີ, ໃນນີ້ ຝ່າຍປ້ອງກັນຄວາມສະຫງົບຖືຫຸ້ນ 30% ແລະ ບໍລິສັດຖືຫຸ້ນ 70%, ໂດຍຈະໃຊ້ເວລາກໍ່ສ້າງທັງໝົດ 2 ປີ ນັບແຕ່ມື້ທີ່ໄດ້ຮັບໃບອະນຸຍາດກໍ່ສ້າງເປັນຕົ້ນໄປ; ຄາດວ່າ ຮອດປີ 2021 ຈະສາມາດເປີດໃຫ້ບໍລິການໄດ້, ໂດຍຈະອອກເເບບຕາມສະຖາປັດຕະຍະກຳເກົ່າ ແລະ ສອດຄ່ອງກັບວັດທະນະທຳຂອງເເຂວງຫລວງພະບາງ. ເຮືອນຮັບແຂກດັ່ງກ່າວນີ້ ປະກອບມີທັງໝົດ 55 ຫ້ອງ, ສາມາດຮອງຮັບນັກທ່ອງທ່ຽວໄດ້ປະມານ 25,000 – 30,000 ຄົນຕໍ່ປີ, ເຊີ່ງຕັ້ງຢູ່ດິນຂອງກອງບັນຊາການປກສ ແຂວງຫຼວງພະບາງ, ທີ່ບ້ານມະໂນ; ພາຍໃນຈະມີສິ່ງອໍານວຍຄວາມສະດວກອີກຫຼາຍຢ່າງ ເພື່ອໃຫ້ນັກທ່ອງທ່ຽວໄດ້ສຳຜັດຢ່າງເຕັມທີ່.
ໃນພິທີເຊັນສັນຍາໃນຄັ້ງນີ້, ແມ່ນທ່ານພົນຈັດຕະວາ ໜູດີ ມີໄຊຍະລາດ, ຫົວໜ້າກົມໃຫ່ຍພະລາທິການປ້ອງກັນຄວາມສະຫງົບ, ກະຊວງປກສ ແລະ ທ່ານ ພຶດສະພາ ພູມມະສັກ, ປະທານບໍລິສັດເອເຊບລົງທືນພັດທະນາ ແລະ ກໍ່ສ້າງຈຳກັດຜູ້ດຽວ ທີ່ໄດ້ຮ່ວມກັນລົງນາມໃນສັນຍາວ່າດ້ວຍການລົງທຶນກໍ່ສ້າງເຮືອນຮັບແຂກທັນສະໄໝລະດັບ 5 ດາວ ຢ່າງເປັນທາງການ.


ຂ່າວ,​ພາບ: ວໍລະນຸດ ສິລິກຸນ