ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກະຊວງປ້ອງກັນປະເທດສະຫຼຸບວຽກງານປ້ອງກັນຊາດປະຈຳປີ 2019 ແລະ ວາງທິດທາງແຜນການປີ 2020

ໃນໂອກາດສະເຫລີມສະຫລອງວັນສ້າງຕັ້ງກອງທັບປະຊາຊົນລາວຄົບຮອບ 71ປີ ປີນີ້, ໃນຕອນເຊົ້າຂອງມື້ນີ້ ທີ່ສະໂມສອນໃຫຍ່ກົມໃຫຍ່ການເມືອງກອງທັບ, ນະຄອນຫຼວງວຽງຈັນ, ໄດ້ມີການຈັດກອງປະຊຸມສະຫຼຸບການຈັດຕັ້ງປະຕິບັດວຽກງານປ້ອງກັນຊາດປະຈຳປີ 2019 ແລະ ກຳນົດວາງທິດທາງແຜນການເຄື່ອນໄຫວສຳລັບປີ 2020, ພາຍໃຕ້ການເປັນປະທານຂອງພົນເອກ ຈັນສະຫມອນ ຈັນຍາລາດ, ກຳມະການກົມການເມືອງສູນກາງພັກ, ເລຂາຄະນະພັກ ແລະ ລັດຖະມົນຕີກະຊວງປ້ອງກັນປະເທດ, ໂດຍມີບັນດາຮອງລັດຖະມົນຕີ, ຫົວຫນ້າກົມ-ຮອງກົມ ພ້ອມດ້ວຍນາຍ ແລະ ພົນທະຫານອ້ອມຂ້າງກະຊວງປ້ອງກັນປະເທດ ແລະ ຜູ້ຕາງໜ້າພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານພົນເອກ ຈັນສະຫມອນ ຈັນຍາລາດ, ກຳມະການກົມການເມືອງສູນກາງພັກ, ເລຂາຄະນະພັກ ແລະລັດຖະມົນຕີກະຊວງປ້ອງກັນປະເທດ ໄດ້ຂຶ້ນມີຄຳເຫັນກ່າວໄຂກອງປະຊຸມວ່າ: ກອງປະຊຸມໃນຄັ້ງນີ້ ເປີດຂື້ນທ່າມກາງບັນຍາກາດທີ່ທົ່ວພັກ-ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ມີຄວາມເບີກບານມ່ວນຊື່ນໃນການຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີສີບຂອງພັກ, ລວມທັງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ໄລຍະທ້າຍສະໄໝຢ່າງເປັນຂະບວນຟົດຟື້ນ ລວມເຖິງໃນການສະເຫຼີມສະຫຼອງວັນສຳຄັນຕ່າງໆຂອງພັກ ແລະ ຂອງຊາດ, ໂດຍສະເພາະວັນສ້າງຕັ້ງກອງທັບປະຊາຊົນລາວຄົບຮອບ 71ປີ.

ໃນໄລຍະຜ່ານມາ ກໍ່ຄື ໃນປັດຈຸບັນ, ໂດຍພາຍໃຕ້ການຊີ້ນຳໆພາຂອງພັກປະຊາຊົນປະຕິວັດລາວ, ກອງທັບປະຊາຊົນລາວ ນັບມື້ໄດ້ຮັບການພັດທະນາ ແລະ ເຕີບໃຫຍ່ເຂັ້ມແຂງເປັນກ້າວໆ, ຍາດໄດ້ຜົນສຳເລັດໃນຫລາຍດ້ານ, ຊຶ່ງໄດ້ຊ່ວຍເຮັດໃຫ້ປະເທດຊາດມີສະຖຽນລະພາບທາງດ້ານການເມືອງຢ່າງຫນັກແຫນ້ນ, ສັງຄົມມີຄວາມສະຫງົບສຸກ ແລະ ສີວິໄລຮ້ອຍສ່ວນຮ້ອຍ, ທັງຊ່ວຍເຮັດໃຫ້ບົດບາດອິດທິພົນຂອງປະເທດເຮົາ ນັບມື້ນັບພົ້ນເດັ່ນທັງໃນເວທີພາກພື້ນ ແລະ ສາກົນໃນຂະນະທີ່ປະຊາຊົນລາວບັນດາເຜົ່າ ພວມຢູ່ທ່າງທຳມາຫາກີນ ແລະ ອື່ນໆ.
ສຳລັບການຈັດກອງປະຊຸມສະຫຼຸບການຈັດຕັ້ງປະຕິບັດວຽກງານປ້ອງກັນຊາດປະຈຳປີ 2019 ນີ້ ແລະ ການວາງທິດທາງແຜນການສຳລັບປະຈຳປີ 2020, ໃນໂອກາດສະເຫລີມສະຫລອງວັນສ້າງຕັ້ງກອງທັບປະຊາຊົນລາວຄົບຮອບ 71ປີ ຂອງກະຊວງປ້ອງກັນປະເທດໃນຄັ້ງນີ້, ບັນດາຜູ້ເຂົ້າຮ່ວມ ໄດ້ເປັນເອກະພາບກັນສັງເກດ-ຕີລາຄາສະພາບ ແລະ ຜົນການຈັດຕັ້ງປະຕິບັດວຽກງານວິຊາສະເພາະຂອງກະຊວງປ້ອງກັນປະເທດໃນໄລຍະຜ່ານມາ, ໂດຍສະເພາະແມ່ນ 4 ຫນ້າທີ່ໃຫຍ່ແລະ 26 ແຜນງານທີ່ອົງຄະນະພັກກະຊວງປ້ອງກັນປະເທດໄດ້ວາງອອກ, ເພື່ອເປັນທິດທາງໃນການປັບປຸງແກ້ໄຂ, ແລະການຮັບຟັງການປະກອບຄຳຄິດຄຳເຫັນໃສ່ບົດລາຍງານການເຄື່ອນໄຫວຂອງຜູ້ແທນກອງປະຊຸມ, ລວມເຖິງ ການລາຍງານສະພາບການຈັດຕັ້ງປະຕິບັດວຽກງານຂອງບັນດາທູດທະຫານລາວທີ່ປະຈຳຢູ່ຕ່າງປະເທດ ແລະ ວຽກງານສຳຄັນອື່ນໆອີກຈຳນວນຫນື່ງ.

ນອກຈາກນັ້ນ, ກອງປະຊຸມຍັງໄດ້ສຸມໃສ່ຄົ້ນຄວ້າວາງທິດທາງແຜນການປີ 2020 ຕື່ມອີກ ເພື່ອໃຫ້ສອດຄ່ອງກັບສະພາບເງື່ອນໄຂຂອງກອງທັບໃນປັດຈຸບັນ ບົນພື້ນຖານຊຸກຍູ້ຂະບວນການປະຕິບັດຫນ້າທີ່ດ້ານວຽກງານຕ່າງໆ ດ້ວຍຈິດໃຈບຸກທະລຸ ເພື່ອໃຫ້ມີການຫັນປ່ຽນຢ່າງຕັ້ງຫນ້າ ແລະ ມີປະສິດທິຜົນກວ່າເກົ່າ.

ຂ່າວ,​ພາບ: ເດດອາລຸນ ແກ້ວວິໄລວົງ