ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກະຊວງປ້ອງກັນປະເທດ ຈັດການເຝິກແອບສະແດງກຳລັງພາຍໃຕ້ລະຫັດ “ ຄົມໃນຝັກ 01.2020 ”

ກະຊວງປ້ອງກັນປະເທດ ຈັດການເຝິກແອບສະແດງກຳລັງໃນໂອກາດສະເຫຼີມສະຫຼອງວັນສ້າງຕັ້ງເຫຼົ່າຮົບສືບຂ່າວການທະຫານ ວັນທີ 25 ທັນວາ 1954 ຄົບຮອບ 65 ປີ ພາຍໃຕ້ລະຫັດ “ ຄົມໃນຝັກ 01.2020 ” ເພື່ອສ້າງຂະບວນຂໍ່ານັບຮັບຕ້ອນ ວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 71 ປີ ໃນວັນທີ 17 ມັງກອນນີ້ ຢູ່ວິທະຍາຄານກົມມະດຳ, ມີ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ, ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ, ບັນດາການນຳພັກ-ລັດ, ນາຍ ແລະ ພົນທະຫານມາຈາກກົມກອງຕ່າງໆພ້ອມດ້ວຍແຂກຮັບເຊີນເຂົ້າຮ່ວມ.

ໃນພິທີ ພັນໂທ ສີເພັງ ສຸລະເດດ ຫົວໜ້າຫ້ອງເສນາທິການ 213 ຫົວໜ້າບັນຊາພາກສະໜາມເຫຼົ່າຮົບສືບຂ່າວ 213 ໃຫ້ຮູ້ວ່າ: ການຈັດຕັ້ງພິທີຄັ້ງນີ້ ເພື່ອຮັບປະກັນໃຫ້ກຳລັງກົມກອງເຫຼົ່າຮົບສືບຂ່າວ ໄດ້ຮັບການອົບຮົມຫັດແອບຢ່າງເປັນປົກກະຕິຕໍ່ເນື່ອງ ປະຕິບັດລະບຽບພາກສະໜາມ, ຊຳນິຊຳນານທາງດ້ານສິນລະປະຍຸດ ຍຸດທະວິທີສືບຂ່າວ, ເຕັກນິກການນຳໃຊ້ອາວຸດ-ລູກປືນ ອຸປະກອນສືບຂ່າວແລະອື່ນໆ.

ໃນໂອກາດສະເຫຼີມສະຫຼອງວັນສ້າງຕັ້ງເຫຼົ່າຮົບສືບຂ່າວການທະຫານ ວັນທີ 25 ທັນວາ 1954 ຄົບຮອບ 65 ປີ ເພື່ອເປັນຜົນງານຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 71 ປີ ໃຫ້ມີບັນຍາກາດຟົດຟື້ນມ່ວນຊື່ນ ພັນໂທ ສີເພັງ ສຸລະເດດ ໃຫ້ຮູ້ຕື່ມວ່າ: ໃນໄລຍະຫຼາຍປີຜ່ານມາ ກຳລັງກົມກອງເຫຼົ່າຮົບສືບຂ່າວ ກອງທັບປະຊາຊົນລາວ ໄດ້ຈັດຕັ້ງອົບຮົມ-ຫັດແອບກຳລັງເປັນປົກກະຕິຕໍ່ເນື່ອງ ຕາມຄຳສັ່ງຫັດແອບປະຈຳປີ ຂອງກົມອົບຮົມກົມໃຫຍ່ ເສນາທິການກອງທັບ ໂດຍສຸມໃສ່ອົບຮົມ-ຫັດແອບການທະຫານ, ການບັນຊາສູ້ຮົບ, ສິນລະປະຍຸດ, ຍຸດທະວິທີສືບຂ່າວເປັນຫຼັກ ແລະ ເຕັກນິກວິຊາສະເພາະອື່ນໆ. ສຳລັບລາຍການຕ່າງໆທີ່ນຳມາສະແດງໃນງານຄັ້ງນີ້ ປະກອບມີຫຼາຍລາຍການ: ການສະແດງສິນລະປະວັນນະຄະດີຂອງໜ່ວຍສິນລະປະສືບຂ່າວການທະຫານ, ການສະແດງມວຍສູ້ຮົບການທະຫານ ໜ່ວຍສືບຂ່າວມືເປົ່າ ແລະ ປະກອບອາວຸດ, ການສືບຂ່າວຂ້າມສິ່ງກີດຂວາງ, ການໂດດຈ້ອງ, ເຝິກແອບກຳລັງພາຍໃນ, ການບຸກຊ່ວຍເຫຼືອຕົວປະກັນຢູ່ຕາມສະຖານທີ່ຕ່າງໆ, ການທຳລາຍຖານທີ່ໝັ້ນຂອງສັດຕູດ້ວຍການຍິງປືນແທ້ ແລະ ການສະແດງເຮືອບິນຮົບຍັກ 130 ເຊິ່ງລາຍການສະແດງຕ່າງໆສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວຂອງ ເຫຼົ່າຮົບສືບຂ່າວການທະຫານ ກໍ່ຄືຄວາມເຂັ້ມແຂງຂອງກອງທັບປະຊາຊົນລາວຕະຫຼອດໄລຍະ 71 ປີ ພາຍໃຕ້ການຊີ້ນຳ ນຳພາອັນປີຊາສາມາດ ແລະ ສະຫຼາດສ່ອງໃສຂອງພັກປະຊາຊົນປະຕິວັດລາວ, ໃນຕອນທ້າຍຂອງພິທີ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ ໄດ້ໂອ້ລົມ ແລະເນັ້ນໜັກ ໃຫ້ນາຍແລະພົນທະຫານເຫຼົ່າຮົບສືບຂ່າວ ກໍ່ຄື ນາຍແລະພົນທະຫານທົ່ວກຳລັງປ້ອງກັນຊາດຈົ່ງສືບຕໍ່ເຮັດໜ້າທີ່ວຽກງານຂອງຕົນຢ່າງຕັ້ງໜ້າ ແລະປະຕິບັດລະບຽບວິໃນຢ່າງເຂັ້ມງວດເພື່ອເຮັດໃຫ້ກອງທັບປະຊາຊົນລາວກາຍເປັນກອງທັບທີ່ໜັກແໜ້ນເຂັ້ມແຂງ ທາງດ້ານປະລິມານ ແລະຄຸນນະພາບ, ກາຍເປັນກຳລັງແຮງສັງລວມຂອງພັກ-ລັດ ແລະປະຊາຊົນ ເຮັດໃຫ້ສະຖຽນລະພາບທາງດ້ານການເມືອງມີຄວາມໜັກແໜ້ນ, ສັງຄົມມີຄວາມສະຫງົບປອດໄພ, ສີວິໄລ ແລະຍຸດຕິທຳປະກອບສ່ວນເຂົ້າໃນ 2 ໜ້າທີ່ຍຸດທະສາດ ຄືປົກປັກຮັກສາ ແລະສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ. ໂອກາດດຽວກັນນີ້ນາຍົກລັດຖະມົນຕີພ້ອມດ້ວຍຄະນະຍັງໃຫ້ກຽດຈັບມືທັກທາຍນາຍແລະພົນທະຫານພາຍໃນກົມ 213 ເຫຼົ່າຮົບສືບຂ່າວການທະຫານ ເພື່ອເປັນຂວັນກຳລັງໃຈໃນການປະຕິບັດໜ້າທີ່ຕື່ມອີກ.