ໃນວັນທີ 19 ກໍລະກົດ 2022, ກະຊວງປ້ອງກັນປະເທດໄດ້ຈັດພິທີປະກາດຍົກຍ້າຍ ແລະ ແຕ່ງຕັ້ງນາຍທະຫານ, ໂດຍການເປັນປະທານຂອງ ສະຫາຍ ພົນໂທ ທອງລອຍ ສີລິວົງ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນປະ ເທດ ຫົວຫນ້າກົມໃຫຍ່ການເມືອງກອງ ທັບ, ມີຕາງໜ້າບັນດາກົມໃຫຍ່, ຫ້ອງວ່າການກະຊວງ, ຫ້ອງການ, ພ້ອມດ້ວຍພະນັກງານຫລັກແຫລ່ງທີ່ກ່ຽວຂ້ອງ ເຂົ້າຮ່ວມ.
ສະຫາຍ ພັນເອກ ໂສພາວັນ ທໍາມະເທວາ ຮອງຫົວໜ້າກົມພະນັກງານ ກົມໃຫຍ່ການເມືອງກອງທັບ ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການຍົກຍ້າຍນາຍທະຫານ, ອີງຕາມກົດໝາຍນາຍທະຫານກອງທັບປະຊາຊົນລາວ ( ສະບັບປັບປຸງ ) ໃນພາກທີ II ຫມວດ 4 ມາດຕາ 26 ວ່າດ້ວຍການແຕ່ງຕັ້ງຍົກຍ້າຍ, ນາຍທະຫານ, ອີງຕາມ ການຕົກລົງເປັນເອກະພາບຂອງກອງປະຊຸມຄະນະປະຈໍາພັກກະຊວງປ້ອງກັນປະເທດ ຄັ້ງວັນທີ 16 ພຶດສະພາ 2022, ອີງຕາມການຄົ້ນຄວ້າ ແລະ ນໍາສະເໜີຂອງກົມໃຫຍ່ການເມືອງກອງທັບ, ກະ ຊວງປ້ອງກັນປະເທດ ຕົກລົງຍົກຍ້າຍ ສະຫາຍ ພັນເອກ ບຸດສະດີ ອິນທະລັງສີ ຫົວໜ້າກົມກວດກາ ກະຊວງປ້ອງກັນປະເທດ ໄປຮັບໜ້າທີ່ໃຫມ່ ເປັນຜູ້ຊ່ວຍວຽກຮອງລັດຖະມົນຕີກະຊວງປ້ອງກັນປະເທດ ຮັບຜິດຊອບວຽກງານເສດ ຖະກິດ ( ມີຖານະທຽມເທົ່າກົມ ) ແລະ ແຕ່ງຕັ້ງ ສະຫາຍ ພົນຈັດຕະວາ ສຸລິນພອນ ຄໍາພະຈັນ ເປັນຫົວຫນ້າກົມກວດກາ ກະຊວງປ້ອງກັນປະເທດ ຜູ້ໃໝ່.
ໂອກາດນດັ່ງກ່າວ, ສະຫາຍ ພົນໂທ ທອງລອຍ ສິລິວົງ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນປະ ເທດ ຫົວໜ້າກົມໃຫຍ່ການເມືອງ ກອງ ທັບ ໄດ້ເນັ້ນໃຫ້ຜູ້ທີ່ໄດ້ຮັບການຍົກຍ້າຍ ແລະແຕ່ງຕັ້ງມອບໝາຍໜ້າທີ່ໃຫມ່ໃນຄັ້ງນີ້ ຈົ່ງຍົກສູງສະຕິລະວັງຕົວຈໍາແນກໄດ້ມິດສັດຕູຢ່າງຈະແຈ້ງ, ເຊື່ອມຊືມກຳ ແໜ້ນຕໍ່ແນວທາງນະໂຍບາຍ, ມະຕິຄໍາສັ່ງ, ມະຕິກອງປະຊຸມຕ່າງໆຂອງຂັ້ນເທິງວາງອອກ, ສຶບຕໍ່ປັບປຸງແບບແຜນວິທີເຮັດວຽກ, ວິທີນຳພາ ຢ່າງມີວິທະຍາສາດ, ມີປະສິດທິພາບ ປະສິດທິຜົນສູງສຸດ ສອດຄ່ອງກັບ 4 ຫນ້າທິ່ໃຫຍ່ 26 ແຜນງານທີ່ກະຊວງປ້ອງກັນປະເທດວາງອອກ ເພື່ອເຮັດໃຫ້ກົມກອງມີການຫັນປ່ຽນທີ່ທັນສະໄຫມ ແລະ ພັດທະນາຂື້ນເປັນກ້າວໆ.
ໂດຍ: ໂຈ່ລີ້ ວົງໄຊ
