ກະຊວງປ້ອງກັນປະເທດ ຈັດປາຖະກະຖາຫວນຄືນມູນເຊື້ອ ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ແຂວງຊຽງຂວາງ ຄົບຮອບ 65 ປີ (18/5/1959-18/5/2024) ໃນວັນທີ 22 ພຶດສະພາ 2024 ໂດຍການປາຖະກະຖາຂອງ ທ່ານ ພົ.ວ ຄຳຫອມ ແສງບົວລົມ ຮອງປະທານສະຫະພັນນັກຮົບເກົ່າແຫ່ງຊາດລາວ.
ການເລົ່າຄືນມູນເຊື້ອຄັ້ງນີ້, ເພື່ອລະນຶກເຖິງຄຸນງາມຄວາມດີ ແລະ ນໍ້າໃຈເສຍສະຫລະ ຂອງບັນດານັກຮົບທີ່ໄດ້ອຸທິດຕົນ ເພື່ອປະເທດຊາດໃນຂະບວນການປະຕິວັດຜ່ານມາ ແລະ ເພື່ອສືບຕໍ່ເສີມຂະຫຍາຍມູນເຊື້ອ, ທາດແທ້ຂອງພັກ ເຂົ້າໃນການຊີ້ນໍາ-ນໍາພາ ຈັດຕັ້ງປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດສັງຄົມນິຍົມ ເພື່ອເຮັດໃຫ້ອ້າຍນ້ອງທະຫານ, ໄດ້ຮັບຮູ້ ແລະ ເຂົ້າໃຈເຖິງຄວາມໝາຍຄວາມສຳຄັນຂອງວັນດັ່ງກ່າວ ແລະ ນຳເອົາບົດຮຽນ ມາໝູນໃຊ້ເຂົ້າໃນການປະຕິບັດໜ້າທີ່ການເມືອງຂອງຕົນ, ເອົາເປັນແບບເປັນຢ່າງໃນການດຳລົງຊີວິດ ປະຕິບັດໜ້າທີ່ໃຫ້ຖືກຕ້ອງ ແລະ ສອດຄ່ອງກັບລະບຽບຫລັກການ, ໃຫ້ມີຄວາມໂປ່ງໃສ ແລະ ຍຸຕິທໍາ ໃຫ້ບັນລຸຕາມຄາດໝາຍທີ່ວາງໄວ້.
ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫລວງ ຂອງກໍາລັງປະກອບອາວຸດ ທີ່ຢູ່ພາຍໃຕ້ການນໍາພາອັນປີຊາສາມາດສະຫລາດສ່ອງໃສ ຂອງພັກປະຊາຊົນປະຕິບັດລາວ ແລະ ກອງທັບປະຊາຊົນລາວ. ເຫດການດັ່ງກ່າວ, ສະແດງໃຫ້ເຫັນເຖິງຄວາມສະຫລຽວສະຫລາດ, ການມີໄຫວພິບ, ຄວາມຈົ່ງຮັກພັກດີ, ຄວາມສາມັກຄີເປັນຈິດໜຶ່ງໃຈດຽວຂອງປະຊາຊົນບັນດາເຜົ່າ, ຄວາມປີຊາສາມາດຂອງຄະນະພັກ-ຄະນະບັນຊາ ຈຶ່ງສາມາດເຮັດໃຫ້ກອງພັນທີ 2 ສາມາດຜ່າວົງປິດລ້ອມໄດ້ສຳເລັດ.
ທີ່ມາ: ຂປລ
