ກະຊວງປ້ອງກັນປະເທດ ໄດ້ຍິງປືນສະແດງໃນໂອກາດສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 75 ປີ ຈັດຂື້ນໃນຕອນເຊົ້າວັນທີ 17 ມັງກອນ 2024, ທີ່ວິທະຍາຄານນາຍ ແລະ ພົນທະຫານ ກົມມະດຳ ເມືອງໂພນໂຮງ ແຂວງວຽງຈັນ ໂດຍການເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ, ເລຂາທິການໃຫ່ຍຄະນະບໍລິຫານງານສູນກາງພັກ ປະທານປະເທດ, ທ່ານ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ ມີການນໍາພັກ-ລັດ ພ້ອມດ້ວຍນາຍ ແລະພົນທະທານ.
ໃນພິທີຜູ້ເຂົ້່າຮ່ວມໄດ້ຮັບຊົມການສະແດງສິລະປະຈາກກອງສິລະປະກອງທັບປະຊາຊົນລາວ, ການສະແດງຂອງເຫລົ່າຮົບສືບຂ່າວ ແລະ ເຫລົ່າຮົບຕີພິເສດ ປະກອບມີມວຍຫັດກາຍ, ມວຍສູ້ຮົບ, ກອງພັນໃຫຍ່ທະຫານຮາບຍານເກາະ 11 ສະແດງ ຍຸດທະວິທີສູ້ຮົບບຸກຄົນ (ຍິງລູກລົມ), ກອງພັນຍິງປືນ 199 ຍິງເປີດປ້າຍຄໍາຂວັນ, ນຳໃຊ້ປືນສັ້ນຊາຍ-ຍິງ, ປືນເຫລັກສັ້ນຍິງເປົ້າຈານເຫລັກ; ເຫລົ່າຮົບຕີພິເສດປິດລັບຫລອນຕີສູນບັນຊາຂອງສັດຕູ, ກອງພັນໃຫຍ່ທະຫານຮາບຍານເກາະ 11 ໃຊ້ກໍາລັງໄຟເພດຍິງກຽມ, ເຫລົ່າຮົບຊ່າງແສງສົ່ງໂບກຝ່າບິນ, ເປີດທາງໄຂໃຫ້ກອງພັນໃຫຍ່ທະຫານຮາບຍານເກາະ 11 ບຸກຕີສັດຕູ, ເຫລົ່າເສນາຮັກປະຕິບັດກອບກູ້ທະຫານຖືກບາດເຈັບອອກຈາກສະໜາມ ແລະການສະແດງອື່ນໆ ລວມທັງໝົດຈໍານວນ 15 ລາຍການ ພິເສດກອງບັນຊາການທະຫານອາກາດກອງ ທັບປະຊາຊົນລາວ ແລະກອງທັບອາກາດຈີນຍັງໄດ້ນຳໃຊ້ຝູງຍົນບິນສວນສະໜາມ ແລະບິນສະແດງຜ່ານໜ້າຜາມໄຊ ເພື່ອສະເຫລີມສະຫລອງ ແລະຊົມເຊີຍວັນສ້າງຕັ້ງກອງທັບປະຊາຊົນລາວຕື່ມອີກ.
ໂອກາດນີ້ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫ່ຍເສນາທິການກອງທັບປະຊາຊົນລາວ ໃນນາມຫົວໜ້າຄະນະຮັບຜິດຊອບຊ້ອມຮົບສະແດງເພື່ອສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃຫ້ສໍາພາດວ່າ: ການສະແດງຊ້ອມຮົບໃນຄັ້ງນີ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້ ສະແດງອອກໃນການປະຕິບັດຕົວຈິງຂອງແຕ່ລະຈຸ ແຕ່ລະໜ່ວຍຮົບ ກອງຮ້ອຍສາມາດປະຕິບັດໄດ້ຕາມຍຸດທະວິທີ ແລະມີການປະສານງານກັນຢ່າງສອດຄ່ອງໃນແຕ່ລະລາຍການສະແດງ ທັງສາມາດນໍາໃຊ້ອາວຸດ, ຢຸດໂທ້ປະກອນຕ່າງໆໄດ້ເປັນຢ່າງດີ.
ໃນງານຄັ້ງນີ້ຜູ້ເຂົ້າຮ່ວມຍັງໄດ້ຮັບຊົມສະແດງວັດຖຸອຸປະກອນ, ພາຫະນະອາວຸດ, ຍຸດໂທປະກອນທີ່ກົມອຸດສາຫະກຳປ້ອງກັນຊາດ ແລະ ກົມສື່ສານ ແລະກົມປືນໃຫຍ່ໜ້າດິນກອງທັບປະຊາຊົນລາວ ຈັດຂື້ນ ເພື່ອສະແດງໃຫ້ເຫັນເຖິງການເຕີບໃຫ່ຍຂະຫຍາຍຕົວ ແລະຄວາມທັນສະໄໝຂອງກອງທັບປະຊາຊົນລາວຕະຫລອດໄລຍະ 75 ປີຜ່ານມາ.
ຂ່າວ: ຈັນທະສອນ
ພາບ: ຄໍາກອງ
