ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກະຊວງພະລັງງານ ແລະ ບໍ່ແຮ່ ລົງຢ້ຽມຢາມຄວາມຄືບໜ້າຜົນສໍາເລັດໂຄງການກໍ່ສ້າງເຂື່ອນໄຟຟ້ານໍ້າຮາວ, ເມືອງສົບເບົາ ແຂວງຫົວພັນ

ໃນວັນທີ 4 ກັນຍາ 2020, ທ່ານ ຄໍາມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ຈະເລີນ ເຢຍປາວເຮີ ລັດຖະມົນຕີປະຈໍາສໍານັກງານນາຍົກລັດຖະມົນຕີ ພ້ອມດ້ວຍຄະນະ, ໄດ້ລົງຢ້ຽມຢາມ ຕິດຕາມຊຸກຍູ້ໂຄງການກໍ່ສ້າງເຂື່ອນໄຟຟ້ານໍ້າຮາວ, ຕັ້ງຢູ່ເມືອງສົບເບົາ ແຂວງຫົວພັນ; ໂດຍໃຫ້ກຽດຕ້ອນຮັບຂອງທ່ານ ຄໍາຜາຍ ສີລາຊາ, ປະທານ ກຸ່ມບໍລິສັດ ດວງຈະເລີນພັດທະນາກໍ່ສ້າງຈໍາກັດຜູ້ດຽວ, ທັງເປັນປະທານ ບໍລິສັັດ ນໍ້າຮາວຈະເລີນພາວເວີ້ ຈໍາກັດ.

ໃນການລົງຢ້ຽມຢາມຄັ້ງນີ້, ທ່ານ ຄໍາຜາຍ ສີລາຊາ ໄດ້ລາຍງານຄວາມຄືບໜ້າ ແລະ ຜົນສໍາເລັດຂອງໂຄງການວ່າ: ໂຄງການເຂື່ອນໄຟຟ້ານໍ້າຮາວ ມີກໍາລັງການຜະລິດ 22 ເມກາວັດໃນລະດູຝົນ ແລະ 9 ເມກາວັດ ໃນລະດູແລ້ງ, ມີມູນຄ່າການກໍ່ສ້າງທັງໜົດ 40 ລ້ານກວ່າ ໂດລາສະຫະລັດ ໂດຍການລົງທຶນຂອງບໍລິສັັດ ນໍ້າຮາວຈະເລີນພາວເວີ້ ຈໍາກັດຜູ້ດຽວ 100%. ໂດຍແມ່ນ ບໍລິສັດ ເອນທູລ່າ ເປັນຜູ້ອອກແບບເຂື່ອນ, ສະພາບການກໍ່ສ້າງ ແມ່ນມີຂໍ້ສະດວກຫລາຍດ້ານເປັນຕົ້ນແມ່ນ: ໄດ້ຮັບການຮ່ວມມືຈາກ ບ້ານ, ເມືອງ, ແຂວງຫົວພັນ ແລະ ກະຊວງທີ່ກ່ຽວຂ້ອງ, ຈຶ່ງເຮັດໃຫ້ໂຄງການສໍາເລັດເປັນກ້າວໆມາ ແລະ ຄາດວ່າຈະໃຫ້ສໍາເລັດສົມບູນ ຕາມສັນຍາຊື້-ຂາຍໄຟ ກັບໄຟຟ້າລາວ (COD) ໃນເດືອນ ສິງຫາ 2021 ທີ່ຈະມາເຖິງນີ້. ຫລັງຈາກໂຄງການສໍາເລັດ, ຈະກາຍເປັນບ່ອນທ່ອງທ່ຽວໃຫ້ແກ່ຊຸມຊົນອ້ອມຂ້າງ ແລະ ສ້າງລາຍຮັບໃຫ້ແກ່ປະຊາຊົນຂົງເຂດດັ່ງກ່າວ

ພາຍຫຼັງໄດ້ຮັບຟັງການລາຍງານ ຂອງບໍລິສັດແລ້ວ; ທ່ານ ຄໍາມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດຂອງບໍລິສັັດ ຊຶ່ງເປັນບໍລິສັດຂອງຄົນລາວ 100% ທີ່ໄດ້ມີຄວາມຕັ້ງໃຈ ແລະ ທຸ້ມເທ ທຶນຮອນເຂົ້າໃສ່ການກໍ່ສ້າງ ໃຫ້ມີຜົນສໍາເລັດຕາມແຜນການ ເພື່ອໃຫ້ໄດ້ຈໍາໜ່າຍກະແສໄຟຟ້າສະຫນອງໃຫ້ແກ່ການຊົມໃຊ້ ຂອງຜູ້ປະກອບການຜະລິດ ອຸດສາຫະກໍາ ແລະ ຫົວໜ່ວຍທຸລະກິດອື່ນໆ ຢູ່ບັນດາເມືອງ ພາຍໃນຂອງແຂວງຫົວພັນ ແລະ ເປັນການປະກອບສ່ວນເຂົ້າໃນຂະແຫນງໄຟຟ້ານໍ້າຕົກ ເພື່ອໃຫ້ພຽງພໍກັບຄວາມຕ້ອງການຂອງພໍ່ແມ່ປະຊາຊົນບັນດາເຜົ່າ ອີກດ້ວຍ.

Cr: ກະຊວງພະລັງງານ ແລະ ບໍ່ແຮ່