ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກະຊວງວິທະຍາສາດແລະເຕັກໂນໂລຊີຈັດກອງປະຊຸມສຳມະນາກ່ຽວກັບການປະຕິວັດອຸດສາຫະກຳຄັ້ງທີ4ແລະຂະບວນການນັກວິທະຍາສາດຂອງສປປລາວ:

ໃນວັນທີ 11 ກຸມພາ 2020, ທີ່ກະຊວງວິທະຍາສາດ ແລະ ເຕັກໂນໂລຊີ, ນະຄອນຫລວງວຽງຈັນ, ກະຊວງວິທະຍາສາດ ແລະ ເຕັກໂນໂລຊີ ແລະ ສູນກາງຊາວໜຸ່ມປະຊາຊົນປະຕິວັດລາວ ໄດ້ຮ່ວມກັນຈັດກອງປະຊຸມສຳມະນາກ່ຽວກັບການປະຕິວັດອຸດສາຫະກຳຄັ້ງທີ 4 ແລະ ຂະບວນການນັກວິທະຍາສາດຂອງ ສປປ ລາວ, ໂດຍມີຊາວໜຸ່ມຈາກພາກສ່ວນຕ່າງໆເຂົ້າຮ່ວມ 100 ກວ່າຄົນ.
ໃນໂອກາດນີ້, ທ່ານ ສຈ ປອ ບໍ່ວຽງຄຳ ວົງດາລາ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ໄດ້ໃຫ້ກຽດຂຶ້ນມີຄຳເຫັນ ໂດຍກ່ອນອື່ນ ທ່ານໄດ້ເລົ່າປະຫວັດຄວາມເປັນມາກ່ຽວກັບການປະຕິວັດອຸດສາຫະກຳໃນແຕ່ລະໄລຍະ ແລະ ອະທິບາຍກ່ຽວກັບວຽກງານອຸດສາຫະກຳ ແລະ ເຕັກໂນໂລຊີ ທີ່ໄດ້ຮັບການພັດທະນາມາຕາມການປ່ຽນແປງຂອງສັງຄົມແຕ່ປີ 1780 ເປັນຕົ້ນມາ, ເລີ່ມຈາກການຄົ້ນພົບການໃຊ້ລະບົບອາຍນໍ້າ ເພື່ອດັດແປງມາເປັນພະລັງງານ ສືບເນື່ອງຕໍ່ມາເຖິງຍຸກປະຈຸບັນ ຊຶ່ງເປັນຍຸກທີ່ວຽກງານເຕັກໂນໂລຊີໄດ້ພັດທະນາຢ່າງກ້າວກະໂດດຂັ້ນ. ນອກຈາກນັ້ນ, ທ່ານຍັງໄດ້ແຈ້ງໃຫ້ຮູ້ເຖິງມາດຕະການສຳລັບ ສປປ ລາວ ເພື່ອຮອງຮັບແບບແຜນການປະຕິວັດອຸດສາຫະກຳຄັ້ງທີ 4 ທີ່ຈະຕ້ອງໄດ້ມີແຜນການງານທີ່ຕ້ອງໄດ້ເອົາໃຈໃສ່ປະຕິບັດຄື ຕ້ອງໄດ້ເອົາໃຈໃສ່ໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງທາດແທ້ຂອງປະຕິວັດອຸດສາຫະກຳຄັ້ງທີ 4, ສ້າງ ແລະ ປັບປຸງບັນດາກົດໝາຍ, ນິຕິກຳລຸ່ມກົດໝາຍ, ກົນໄກການປະສານງານ ແລະ ຄຸ້ມຄອງລັດ, ຄຸ້ມຄອງເສດຖະກິດສັງຄົມຕາມແນວທາງນະໂຍບາຍຂອງພັກ-ລັດ, ບຸກທະລຸໃນການພັດທະນາຊັບພະຍາກອນມະນຸດ, ຄົ້ນຄວ້ານຳໃຊ້ວິທະຍາສາດ ແລະ ເຕັກໂນໂລຊີທີ່ທັນສະໄໝ, ເອົາໃຈໃສ່ເປີດກວ້າງການບໍລິການວິທະຍາສາດ ແລະ ເຕັກໂນໂລຊີໃຫ້ແກ່ສັງຄົມ ແລະ ເປີດກວ້າງການຮ່ວມມືກັບຕ່າງປະເທດ ຕາມແນວທາງນະໂຍບາຍການຕ່າງປະເທດຂອງພັກ.


ພ້ອມກັນນີ້, ທ່ານຍັງໄດ້ເນັ້ນໃຫ້ຖັນແຖວຂອງຂະບວນການ 4 ບຸກຂອງຊາວໜຸ່ມປະຊາຊົນປະຕິວັດລາວ ຈົ່ງໄດ້ບຸກທະລຸໃຫ້ໄດ້ຕາມມາດຕະຖານ 4 ບຸກ ທີ່ໄດ້ວາງອອກຄື ບຸກທະລຸສ້າງຈິດສຳນຶກດ້ານວິທະຍາສາດ ແລະ ເຕັກໂນໂລຊີຂອງຍຸກອຸດສາຫະກຳ 4.0 ໃຫ້ແກ່ຊາວໜຸ່ມລາວ, ບຸກທະລຸການສ້າງເງື່ອນໄຂໃຫ້ຊາວໜຸ່ມໄດ້ຮໍ່າຮຽນ ເພື່ອພັດທະນາຄວາມຮູ້ໃນຍຸກ 4.0 ໃຫ້ເຂັ້ມແຂງທາງດ້ານປະລິມານ ແລະ ຄຸນນະພາບ ແລະ ບຸກທະລຸໃນການຊຸກຍູ້ສົ່ງເສີມການສ້າງທຸລະກິດນະວັດຕະກຳ start up ໃຫ້ສົມກັບຊາວໜຸ່ມປຽບເໝືອນນົກອິນຊີທີ່ບໍ່ຫວັ່ນໄຫວຕໍ່ພາຍຸລົມແດງ, ເປັນສິນໄຊແຫ່ງຍຸກສະໄໝ, ຈົ່ງເປັນນັກວິທະຍາສາດທີ່ກ້າວໜ້າຂຶ້ນໄປເລື້ອຍໆ ເພື່ອໃຫ້ເປັນກຳລັງແຮງໃນການສ້າງສາພັດທະນາປະເທດຊາດໃຫ້ຮຸ່ງເຮື່ອງ ແລະ ສີວິໄລໃນຕໍ່ໜ້າ.