ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກະຊວງສາທາລະນະສຸກຢືນຢັນຄຸນປະໂຫຍດຂອງຜ້າອັດປາກທົ່ວໄປ ສາມາດປ້ອງກັນພະຍາດອັກເສບປອດໄດ້

ຫົວຫນ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຢັ້ງຢືນວ່າ: ຜ້າອັດປາກອັດດັງທົ່ວໄປທີ່ຄົນໃນສັງຄົມມັກໃຊ້ໃນປັດຈຸບັນ ສາມາດປ້ອງກັນການແຜ່ລະບາດຂອງເຊື້ອພະຍາດອັກເສບປອດ ເຊີ່ງເກີດຈາກເຊື້ອຈຸລະໂລກສາຍພັນໃຫມ່ ຫລື ໂຄໂຣນາໄວຣັສ໌ໄດ້, ເນື່ອງຈາກວ່າພະຍາດນີ້ບໍ່ສາມາດຕິດຕໍ່ກັນໄດ້ງ່າຍທາງລະບົບຫາຍໃຈໂດຍກົງ ຮ້ອຍສ່ວນຮ້ອຍ, ຍົກເວັ້ນແຕ່ກໍລະນີ ສໍາຜັດ ຫລື ໂອ້ລົມສົນທະນາກັບຄົນເຈັບທີ່ເປັນພະຍາດນີ້ ແລ້ວຂາດການປ້ອງກັນ; ດ້ວຍເຫດນີ້ ຈຶ່ງຂໍຮຽກຮ້ອງມາຍັງທຸກໆຄົນພາຍໃນສັງຄົມເຮົາບໍ່ຄວນກັງວົນ ແລະ ຢ້ານກົວຈົນເກີນໄປ. ໃນໂອກາດຖະແຫລງຂ່າວຕໍ່ສື່ມວນຊົນຈັດຂື້ນໃນວັນທີ 3 ກຸມພານີ້ ຢູ່ຫ້ອງປະຊຸມກະຊວງສາທາລະນະສຸກ, ນະຄອນ ຫຼວງວຽງຈັນ, ດຣ ລັດຕະນະໄຊ ເພັດສຸວັນ, ຫົວຫນ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ວ່າ: ພະຍາດອັກເສບປອດ ສາຍພັນໃຫມ່ ບໍ່ສາມາດຕິດຕໍ່ກັນໄດ້ງ່າຍ ທາງລະບົບທາງເດີນຫາຍໃຈ ດັ່ງນັ້ນການໃສ່ຜ້າອັດປາກຈຶ່ງຄວນໃສ່ໃນເວລາທີ່ຕ້ອງເດີນທາງໄປເຂດຊຸມຊົນທີ່ແອອັດ ແລະ ໄປໃນເຂດທີ່ມີຄວາມສ່ຽງ; ຖ້າໃນກໍລະນີບໍ່ມີຜ້າອັດປາກ ໃນເວລາຕ້ອງໄດ້ລົມກັບຄົນເຈັບທີ່ສົງໃສວ່າເປັນພະຍາດດັ່ງກ່າວ, ກໍ່ຄວນຢູ່ຫ່າງໆຈາກເຂົາເຈົ້າໃນໄລຍະຂອບເຂດຫ່າງກັນ 2 ແມັດຂື້ນໄປ, ພ້ອມທັງ ຫ້າມສໍາຜັດ ແລະ ຫ້າມດື່ມນໍ້າຈອກດຽວກັນກັບຄົນເຈັບ; ແຕ່ຖ້າຈະໃຫ້ດີກວ່ານີ້, ກໍ່ຄື ຄວນຫລີກລ່ຽງຈາກຄົນທີ່ມີອາການສົງໃສວ່າເປັນພະຍາດນີ້ໂດຍໄວ. ດຣ ລັດຕະນະໄຊ ເພັດສຸວັນ ໃຫ້ຮູ້ຕື່ມວ່າ: ສໍາລັບກໍລະນີທີ່ສັງຄົມໃຫ້ຄວາມສົນໃຈ ແລະ ເປັນກະແສມາແຮງໃນປັດຈຸບັນກ່ຽວກັບການສວຍໂອກາດຂື້ນລາຄາຜ້າອັດປາກຂອງຮ້ານຂາຍຢາ, ຮ້ານຄ້າທົ່ວໄປ ຫລື ບຸກຄົນຈໍານວນໜຶ່ງທີ່ຂາຍເຄື່ອງຜ່ານທາງເຟກບຸກນັ້ນ, ຕໍ່ບັນຫານີ້, ທາງກະຊວງສາທາລະນະສຸກ ໄດ້ປະສານສົມທົບກັບພາກສ່ວນກ່ຽວຂ້ອງ ເພື່ອອອກມາດຕະການຄວບຄຸມລາຄາແລ້ວ. ຖ້າກວດພົບເຫັນຜູ້ລະເມີດ, ກໍ່ຈະມີການນໍາໃຊ້ມາດຕະການຕ່າງໆຕາມຄວາມເໝາະສົມ ຫຼື ຖ້າຫາກມີການພົບເຫັນກໍລະນີຝ່າຝືນ, ໃຫ້ໂທແຈ້ງສາຍດ່ວນໝາຍເລກ 166 ໂດຍທັນທີ.


ໂດຍ: ເດດອາລຸນ ແກ້ວວິໄລ