ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກະຊວງສາທາລະນະສຸກ ກຽມພ້ອມຮັບໃຊ້ກອງປະຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດ

ໃນຕອນບ່າຍວັນທີ 19 ກຸມພາ 2020 ທີ່ກະຊວງສທາລະນະສຸກ, ນະຄອນຫຼວງວຽງຈັນ, ດຣ ຣັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ໄດ້ໃຫ້ສໍາພາດຕໍ່ສື່ມວນຊົນ ກ່ຽວກັບສະພາບການ ລະບາດຂອງພະຍາດອັກເສບປອດທີ່ເກີດຈາກ ເຊື້ອຈຸລະໂລກເຊີ່ງມີຊື່ເອີ້ນໃໝ່ທີ່ທາງອົງການອະນາໄມໂລກປະກາດເປັນທາງການວ່າ Coronavirus Disease 2019 ຫຼື ຊື່ຫຍໍ້ ( COVID-19) ຮອດວັນທີ 18/02/202 ເວລາ 24:00ໂມງ , ລາຍງານພະຍາດອັກເສບປອດທີ່ເກີດຈາກເຊື້ອ COVID-19 ມີລາຍງານທັງໜົດ 75,307 ກໍລະນີ (ລາຍງານ ກໍລະນີໃໝ່ 1,749 ກໍລະນີ), ເສຍຊີວິດ 2,012 ກໍລະນີ, ກໍລະນີຮຸນແຮງ 12,056 ກໍລະນີ. ຜູ້ສຳຜັດໃກ້ຊິດທີ່ຢູ່ໃນການຕິດຕາມເຝົ້າລະວັງຂອງແພດໝໍ 135,881ກໍລະນີ, ລາຍງານຈາກ 31 ແຂວງຂອງຈີນ ແລະລາຍງານຈາກປະເທດອື່ນໆມີ 25 ປະເທດ ມີກໍລະນີທັງໝົດ: 914 ກໍລະນີ, ເສຍຊີວິດ 03 ກໍລະນີ ຈາກປະເທດ ຟິລີບປີນ, ຍີ່ປຸ່ນ ແລະ ຝຣັ່ງ. ສຳລັບ ສປປ ລາວ: ກໍລະນີສົງໄສ 34 ກໍລະນີ, ແລະ ບໍ່ພົບເຊື້ອພະຍາດທັງ 34 ຕົວຢ່າງ. ຕໍ່ຄຳຖາມທີ່ວ່າ: ປັດຈຸບັນ, ການເອົາໃຈໃສ່ສະກັດກັ້ນໄວຣັດ ຊະນິດນີ້ ພວກເຮົາດຳເນີນມາດຕະການແນວໃດ ແລະ ເພື່ອເຮັດໃຫ້ສັງຄົມເອົາໃຈໃສ່ປ້ອງກັນຫລາຍຂຶ້ນ ພວກເຮົາຈະເຮັດແນວໃດ? ດຣ ຣັດຕະນະໄຊ ເພັດສຸວັນ ກ່າວວ່າ: ມາດຕະການຂອງພວກເຮົາແມ່ນໄດ້ ຈັດຕັ້ງຄະນະກຳມະການສະເພາະກິດ ເພື່ອປ້ອງກັນ ແລະ ຄວບຄຸມພະຍາດ, ໂດຍມີທ່ານຮອງນາຍົກເປັນປະທານ ໂດຍແຕ່ງຕັ້ງກອງເລຂາສະເພາະກິດ ເພື່ອປ້ອງກັນ ແລະ ຄວບຄຸມພະຍາດ, ໂດຍມີທ່ານຮອງລັດຖະມົນຕີກະຊວງສາທາລະນະສຸກ ເປັນຫົວໜ້າ ແຕ່ງຕັ້ງຄະນະຮັບຜິດຊອບດ້ານວິຊາການ ເພື່ອປ້ອງກັນ, ຄວບຄຸມພະຍາດ, ໂຕ້ຕອບ ແລະ ຄຸ້ມຄອງກໍລະນີ ພະຍາດ, ໂດຍແມ່ນ ຫົວໜ້າຫ້ອງການ ກະຊວງສາທາລະນະສຸກ ເປັນຫົວໜ້າ ເປີດກອງປະຊຸມ ອີໂອຊີ ທຸກໆມື້ ພາຍໃຕ້ການຊີ້ນຳຂອງລັດຖະມົນຕີ ແລະ ຄະນະລັດຖະມົນຕີ; ກັ່ນຕອງການເຂົ້າອອກ ຕາມຈຸດຜ່ານແດນຕ່າງໆ ລວມທັງສະໜາມບິນສາກົນ ທັງ 4 ແຫ່ງ; ເຝົ້າລະວັງ ຫມວດອາການພະຍາດຢ່າງໄກ້ຊິດ ໂດຍສະເພາະແມ່ນ ຜູ້ທີ່ເດີນທາງມາແຕ່ເຂດມີການລະບາດ, ຜູ້ໃກ້ຊິດ ສຳຜັດກັບຄົນທີ່ເປັນພະຍາດ ບໍລິການໃຫ້ຂໍ້ມູນຂ່າວສານ ທາງສາຍດ່ວນ 166 ແລະ ສາຍດ່ວນ IHR ຕະຫຼອດ 24 ຊມ. Facebook page: “ສູນຂ່າວສານການແພດສຸຂະສຶກສາ ກໍ່ໄດ້ອັບເດດຂໍ້ມູນເປັນປະຈຳ; ພວກເຮົາມີ ຫ້ອງວິເຄາະ ທັງສູນກາງ ແລະ ແຂວງທີ່ມີຄວາມສ່ຽງ ພ້ອມທັງກຳລັງຈັດຊື້ ເຄື່ອງກວດແບບເຄື່ອນທີ່ໃຫ້ແຂວງພາກເໝືອ ມີ ການກະກຽມຫ້ອງແຍກປ່ຽວ ໃນໂຮງໝໍ ສູນກາງ ແລະ ແຂວງ ໄດ້ມີການຝຶກອົບຮົມ ດ້ານການກັ່ນກອງ, ການປິ່ນປົວ ແລະ ການປ້ອງກັນການຕິດເຊື້ອໃຫ້ໂຮງຫມໍຕ່າງໆ ໂຄສະນາແບບສື່ສານຄວາມສ່ຽງໂດຍຜ່ານສື່ມວນຊົນຕ່າງໆເຊັ່ນ: ຫນັງສືພິມ, ວິທະຍຸ , ໂທລະພາບ , ແຜ່ນພັບ, ປົດສະເຕີ ແລະອື່ນໆ ກຽມວັດຖຸອຸປະກອນ ເຊັ່ນ : ຊຸດປ້ອງກັນໂຕເອງ, ຜ້າອັດປາກ-ດັງ, ນໍ້າຢາລ້າງມື, ແລະ ອື່ນໆ ໃຫ້ແກ່ບັນດາໂຮງໝໍ, ດ່ານເຂົ້າ-ອອກ, ແລະ ສະຖານບໍລິການ ທີ່ມີຄວາມຈຳເປັນຈຳນວນໜຶ່ງ, ປະສານງານກັບພາກສ່ວນຕ່າງໆ ກໍ່ຄື ກະຊວງຕ່າງໆທີ່ກ່ຽວຂ້ອງ ເພື່ອອຳນວຍຄວາມສະດວກໃນການຂົນສົ່ງແຈກຢາຍສິ່ງຈຳເປັນທີ່ຕ້ອງການນຳໃຊ້ໃນ ວຽກງານນີ້.
ນອກຈາກນີ້, ເພື່ອຮັບໃຊ້ກອງປະຊຸມລັດຖະມົນຕີ ຕ່າງປະເທດ ອາຊຽນ-ຈີນສະໄໝພິເສດທີ່ຈະຈັດຂຶ້ນ ໃນວັນທີ 20 ກຸມພານີ້ , ພວກເຮົາກໍ່ໄດ້ສຳເລັດຕິດຕັ້ງເຄື່ອງThermoscan ຢູ່ຫ້ອງກຽດຕິຍົດ ແລະ ຂາເຂົ້າ ຢູ່ສະໜາມບີນວັດໄຕສາກົນ, ສະຖານທີປະຊຸມ ເພື່ອກັ່ນກອງຜູ້ແທນທີ່ເຂົ້າມາຮ່ວມກອງປະຊຸມ.
ຕໍ່ຄຳຖາມທີ່ວ່າ: “ການຜະລິດຜ້າອັດປາກ ທີ່ທົດລອງ, ຢາກຮູ້ວ່າ ມາດຕະຖານຄຸນນະພາບຫລາຍໜ້ອຍຊ່ຳໃດ? ຄາດວ່າ ຈະຜະລິດແທ້ຈິງດົນປານໃດ, ມີຈຳນວນເທົ່າໃດ ແລະ ຈະນຳແຈກຢາຍໃຫ້ປະຊາຊົນບໍ່? ຫລື ຈະຂາຍໃນຕະຫລາດ ລາຄາເທົ່າໃດ?” ທ່ານຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ,ໃຫ້ຮູ້ວ່າ: ດັ່ງທີ່ໄດ້ຖະແຫຼງໄປແລ້ວນັ້ນ ຜ້າອັດປາກ-ດັງ ແມ່ນມີຫຼາຍຊະນິດ ແລະ ບໍ່ໝາຍວ່າທຸກຄົນຈຳເປັນຕ້ອງໃສ່ ແລະ ຕ້ອງແມ່ນແບບດຽວກັນໝົດ, ແຕ່ລະຊະນິດ ກໍ່ມີຈຸດປະສົງໃນການນຳໃຊ້ທີ່ແຕກຕ່າງກັນ. ປະຈຸບັນ, ກະຊວງສາທາລະນະສຸກ ຮ່ວມກັບກະຊວງອຸດສະຫະກຳ ແລະ ການຄ້າ ແລະ ພາກສ່ວນທີ່ກ່ຽວຂ້ອງ ໄດ້ອອກແຈ້ງການໄປຫາ ບັນດາຮ້ານປະກອບການ: ຮ້ານຂາຍຢາ-ອຸປະກອນການແພດ, ຫ້າມຂື້ນລາຄາ ວັດຖຸພັນດັ່ງກ່າວ. ລາຄາຜ້າອັດປາກ ແບບທຳມະດາ 1 ກັບ (ມີ 50 ແຜນ) ລາຄາ 25,000 ກີບ ຕໍ່ກັບ, ຖ້າຂາຍຍ່ອຍເປັນແຜ່ນ ແມ່ນ ແຜ່ນ ລະ 1,000 ກີບ. ຍອ້ນສັງຄົມມີຄວາມຕື່ນຕົວຢ້ານຫຼາຍ ຈຶ່ງເຮັດໃຫ້ມີບາງຫ້າງຮ້ານສວຍໂອກາດໃນການກັກຕຸນ ແລະ ຂື້ນລາຄາ ແລະ ໃນບາງເຂດແມ່ນບໍ່ມີຂາຍ; ສະນັ້ນ, ຖ້າວ່າເຮົາມີຄວາມຈຳເປັນແທ້ໆທີ່ຈະໃຊ້ຜ້າອັດປາກ ໃນສະຖານບໍລິການສາທາລະນະສຸກແມ່ນສາມາດຕອບສະໜອງໃຫ້ແກ່ຄົນເຈັບທີ່ເຂົ້າໄປໃຊ້ບໍລິການ.