ໂດຍ: ວັນໄຊ ຕະວິນຍານ
ໂດຍເຫັນໄດ້ເຖິງຄວາມສໍາຄັນຂອງວຽກງານການຄຸ້ມຄອງຢາປົວພະຍາດ, ທັງຢາຫຼວງ ແລະ ຢາພື້ນເມືອງ. ເພື່ອບໍ່ໃຫ້ມີຜົນກະທົບທີ່ຮ້າຍແຮງຕໍ່ສຸຂະພາບຂອງປະຊົນ, ກະຊວງສາທາລະນະສຸກ ຈຶ່ງໄດ້ຮ່າງກົດໝາຍວ່າດ້ວຍຊັບພະຍາກອນທີ່ເປັນຢາຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໃນເດືອນມິຖຸນາ ຜ່ານມາ ແລະ ໄດ້ສ້າງ, ພ້ອມທັງປັບປຸງ ນິຕິກໍາລຸ່ມກົດໝາຍຈໍານວນ 9 ສະບັບ; ຮັບຮອງແຜນຍຸດທະສາດແຫ່ງຊາດດ້ານການແພດ- ການຢາພື້ນເມືອງປີ 2024-2030; ເຜີຍແຜ່ຂໍ້ມູນຂ່າວສານອາຫານ ແລະ ຢາປົວພະຍາດ, ການຂາຍເຄື່ອງສໍາອາງ, ອາຫານເສີມ, ຜະລິດຕະພັນຄໍລາເຈນທີ່ມີການປະສົມສານເສບຕິດໃສ່ຜະລິດຕະພັນດັ່ງກ່າວ; ຜ່ານທາງອອນລາຍຈໍານວນຫຼາຍທີ່ບໍ່ຜ່ານການຈົດທະບຽນ, ຈົດແຈ້ງຈາກກົມອາຫານ ແລະ ຢາ; ປຶກສາຫາລືຮ່ວມກັບຂະແໜງການກ່ຽວຂ້ອງໃນການວາງແຜນຄຸ້ມຄອງ, ສະກັດກັ້ນ ແລະ ແກ້ໄຂບັນຫາຂອງສັງຄົມຕໍ່ການບໍລິໂພກສິ່ງເສບຕິດ ແລະ ເບື່ອເມົາທີ່ປະສົມໃສ່ອາຫານ, ຢາ ແລະ ຜະລິດຕະພັນການແພດ ຊຶ່ງບໍ່ສອດຄ່ອງກັບກົດໝາຍ;
ສ່ວນວຽກງານສະໜອງຢາ ແລະ ອຸປະກອນການແພດ ກະຊວງສາທາລະນະສຸກ ໄດ້ສະໜອງຢາປິ່ນປົວ ແລະ ອຸປະກອນການແພດດີພໍສົມຄວນ ພ້ອມທັງຕັ້ງລະບົບຕິດຕາມກວດກາຢ່າງເປັນລະບົບ. ສໍາເລັດກອງປະຊຸມຈັດຊື້ຢາປົວພະຍາດ, ເຄື່ອງໃຊ້ການແພດສິ້ນເປືອງ, ນໍ້າຢາເຄມີ, ລົມອົກຊີແຊນ ໃຫ້ 5 ໂຮງໝໍສູນກາງ, 4 ສູນ, 18 ແຂວງ ແບບຮ່ວມກັນທົ່ວປະເທດ ປະຈໍາປີ 2024; ເຄື່ອນໄຫວເກັບກໍາຂໍ້ມູນ ກ່ຽວກັບການນໍາໃຊ້ຢາຕ້ານເຊື້ອໃນຮ້ານຂາຍຢາຍ່ອຍເອກະຊົນ, ສ້າງຄວາມເຂັ້ມແຂງໃຫ້ແກ່ວຽກງານບໍາລຸງຮັກສາ,ສ້ອມ ແປງອຸປະກອນການແພດໃຫ້ແກ່ຜູ້ຊົມໃຊ້, ນາຍຊ່າງສ້ອມແປງ ຂອງໂຮງໝໍຂັ້ນສູນກາງ ແລະ ຂັ້ນແຂວງ ໄດ້ຈໍານວນ 89 ຄົນ; ຈ່າຍຢາ ແລະ ອຸປະກອນທົ່ວໄປທີ່ສາງພາລາທິການ-ການແພດ ຈໍານວນ 181 ຄັ້ງ, ເຄື່ອງ ໂຄວິດ-19 ຈໍາ ນວນ 38 ຄັ້ງ ແລະ ຮັບເຄື່ອງເຂົ້າສາງ ຈໍານວນ 27 ຄັ້ງ; ໄດ້ຈັດກອງປະຊຸມຖອດຖອນບົດຮຽນວຽກງານຄຸ້ມຄອງຢາ ແລະ ຜະລິດຕະພັນການ ແພດ ເພື່ອກຽມພ້ອມຕໍ່ກັບການລະບາດ, ຄວບຄຸມ ແລະ ຕອບໂຕ້ ໂຄວິດ-19 ແລະ ວາງແຜນຮັບມືໃນຕໍ່ໜ້າ.
ກະຊວງສາທາລະນະສຸກ ໄດ້ສົ່ງເສີມ ແລະ ພັດທະນາດ້ານການແພດ ແລະ ການຢາ ພື້ນເມືອງ ເປັນຕົ້ນໄດ້ສໍາເລັດການສຶກສາ ແລະ ຄົ້ນຄວ້າຢາພື້ນເມືອງລາວຫຼາຍຊະນິດ (ຕົ້ນທົ່ມ, ຫວ້ານສັບພະຍາ, ຜັກອີ່ຮູມ, ປິດຕໍ, ປໍແກ້ວ …) ແລະ ພັດທະນາຮູບແບບການນໍາໃຊ້ຈາກດັ່ງເດີມກ້າວໄປສູ່ຜະລິດຕະພັນແບບໃໝ່ ເຊັ່ນ: ເປັນຮູບແບບຊາຊົງ, ຢາແຄັບຊູນ, ຢານວດເສັ້ນ ອອກຮັບໃຊ້ສັງຄົມ; ເກັບກໍາຂໍ້ມູນສວນອະນຸລັກຊີວະນາໆພັນທີ່ເປັນຢາ ໃນຂອບເຂດທົ່ວປະເທດ ພ້ອມທັງສ້າງບັນຊີພືດ ແລະ ຕົ້ນໄມ້ທີ່ເປັນຢາທີ່ ກະຊວງສາທາລະນະສຸກຄຸ້ມຄອງມີ 270 ຊະນິດ; ໄດ້ຮຽບຮຽງຕໍາລາຢາພື້ນເມືອງລາວ ແລະ ຊົນເຜົ່າມົ້ງ ເພື່ອສ້າງເປັນປຶ້ມຕໍາລາ. ສິ່ງທີ່ພົ້ນເດັ່ນໄດ້ເຮັດໜ້າທີ່ວິໄຈຄຸນນະພາບອາຫານ, ຢາ ແລະ ຜະລິດຕະພັນການແພດ ໂດຍໄດ້ຖືກຮັບຮອງມາດຕະຖານສາກົນ ISO/IEC 17025 ດ້ານການວິໄຈອາຫານຈຸລິນຊີໃນນໍ້າດື່ມ – ອາຫານ 6 ເຊື້ອຈຸລິນຊີ. ໃນ 6 ເດືອນ ຕົ້ນປີ 2024 ໄດ້ຮັບຕົວຢ່າງເຂົ້າມາວິໄຈທັງໝົດ 1.162 ຕົວຢ່າງ ຫຼາຍກວ່າໝູ່ແມ່ນປະເພດນໍ້າດື່ມ, ຮອງລົງມາແມ່ນຕົວຢ່າງຢາເສບຕິດ, ນໍ້າທົ່ວໄປ, ອາຫານ-ຢາ ແລະ ຮັບຕົວຢ່າງຢາເສບຕິດຈາກເຈົ້າ ໜ້າທີ່ຕໍາຫຼວດທັງໝົດ 289 ຕົວຢ່າງ.
ໄປພ້ອມກັນນັ້ນ, ຍັງໄດ້ລົງກວດກາອາຫານ ແລະ ຢາຢູ່ຕະຫຼາດກວດກາຮ້ານຄ້າ, ມິນິມາກ ນະຄອນຫຼວງວຽງຈັນ ທີ່ມີການຈໍາໜ່າຍຜະລິດຕະພັນເຄື່ອງສໍາອາງ ທີ່ບໍ່ມີເອກະສານຈົດແຈ້ງ, ຮຽນແບບຜະລິດຕະພັນເຄື່ອງສໍາອາງ, ຈັດກອງປະຊຸມແກ້ໄຂບັນຫາການຂາຍຢາປົວພະຍາດໃນຮ້ານມິນິມາກ, ຕິດຕາມກວດກາຮ້ານຂາຍຢາໃນນະຄອນຫຼວງວຽງຈັນ ຈໍາ ນວນ 23 ຮ້ານ ແລະ ແກ້ໄຂບັນຫາທີ່ພົບໃນຮ້ານຂາຍຢາໃນ ນະຄອນຫຼວງ ຈໍານວນ 6 ຮ້ານ; ອໍານວຍຄວາມສະດວກທາງດ້ານການຄ້າສຶກສາໄລຍະເວລາໃນການອອກອະນຸຍາດ ນໍາເຂົ້າ-ສົ່ງອອກ ແລະ ການອອກອະນຸຍາດນໍາເຂົ້າອອນລາຍ ປະເພດສານເຄມີຄວບຄຸມ, ຢາຫຼວງ ແລະ ອຸປະກອນການແພດ ແລະ ຢາພື້ນເມືອງ ແລະ ຜະລິດຕະພັນຕະພັນເສີມສຸຂະພາບ; ເພື່ອຫຼຸດຜ່ອນການນໍາເຂົ້າຢາປົວພະຍາດ ກະຊວງສາທາຍັງໄດ້ສົ່ງເສີມການຜະລິດພາຍໃນ ຊຶ່ງໄດ້ມອບໃຫ້ໂຮງງານຜະລິດຢາເລກ 2 ແລະ ເລກ 3, ຜະລິດຢາ,ອຸປະກອນການແພດ ເພື່ອສະໜອງໃຫ້ແກ່ສະຖານທີ່ບໍລິການສາທາລະນະສຸກ, ຕາມການສັ່ງຊີ້ຂອງລູກຄ້າ ໃຫ້ບັນລຸຕາມເປົ້າໝາຍຂອງສົກປີ 2024.
