ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກະຊວງສາທາລະນະສຸກ ຈັດສໍາມະນາກ່ຽວກັບການເຝົ້າລະວັງແລະຕອບໂຕ້ຕໍ່ເຊື້ອພະຍາດ COVID-19 ຢູ່ລາວ

ໃນຕອນເຊົ້າວັນທີ 13 ກຸມພາ 2020 ທີ່ໂຮງແຮມຄລາວພາຊາ ນະຄອນຫລວງວຽງຈັນ, ກະຊວງສາທາລະນະສຸກ ຮ່ວມກັບອົງການອະນາໄມໂລກ ແລະ ອົງການUSCDC ໄດ້ຈັດສໍາມະນາເພື່ອຍົກສູງວຽກງານເຝົ້າລະວັງ ແລະ ການຕອບໂຕ້ຕໍ່ ເຊື້ອໄວລັດໂຄໂລນາສາຍພັນໃຫມ່ ຫລື COVID-19 ໃນ ສ.ປ.ປ.ລາວ ຢູ່ຂັ້ນແຂວງ ໂດຍມີສໍາມະນາກອນ, ແລະ ພະນັກງານວິຊາການ ຈາກພາກສ່ວນສາທາລະນະສຸກຂັ້ນສູນກາງ ແລະ ຂັ້ນແຂວງ ລວມທັງຈາກກອງທັບ ແລະ ປກສ ເຂົ້າຮ່ວມທັງໝົດ 120ຄົນ.

ດຣ ພອນປະດິດ ສັງໄຊຍະລາດ, ຫົວໜ້າສູນວິເຄາະແລະລະບາດວິທະຍາ ກະຊວງສາທາລະນະສຸກ ກ່າວວ່າ: ຄວາມຈິງແລ້ວ, ພະນັກງານແພດໝໍຂອງພວກເຮົາໃນຂອບເຂດທົ່ວປະເທດ ກໍ່ມີຄວາມພ້ອມຢູ່ແລ້ວ ແຕ່ເມື່ອມີເຫດການເກີດຂຶ້ນຢູ່ປະເທດໃກ້ຄຽງ, ພວກເຮົາກໍ່ຕ້ອງຍົກລະດັບ ເພື່ອໃຫ້ມີຄວາມພ້ອມເພີ່ມຂຶ້ນ, ເປັນຕົ້ນແມ່ນລະບົບຕິດຕາມເຝົ້າລະວັງ ຫາກມີກໍລະນີເກີດຂຶ້ນ; ພາກສ່ວນໂຮງໝໍຄວນມີຄວາມພ້ອມຄືແນວໃດ, ດ່ານກວດກາຄົນເຂົ້າອອກເມືອງຈະເຮັດແນວໃດ, ເພື່ອໃຫ້ເຂົ້າໃຈເຖິງສະຖານະການໃນໂລກ ແລະ ຍຸດທະສາດການຕອບໂຕ້ກັບເຊື້ອໄວລັດ COVID-19 ໃນ ສ.ປ.ປ.ລາວ ແລະ ເພື່ອໃຫ້ເຂົ້າໃຈຂື້ນຕື່ມກ່ຽວກັບກົນໄກການປະສານງານທີ່ມີຢູ່ແລ້ວ (ສູນປະຕິບັດງານສຸກເສີນ) ແລະ ຂະບວນການຄັດກອງທີ່ດ່ານສາກົນ ເຂົ້າ-ອອກຕ່າງໆ. ກອງປະຊຸມສຳມະນາໃນຄັ້ງນີ້ ແມ່ນແນ່ໃສ່ເພື່ອເພີ່ມທະວີໃນການທົບທວນຄືນ ບັນດາຄໍາແນະນຳ ກ່ຽວກັບການນຳໃຊ້ນິຍາມກໍລະນີ ເພື່ອຄັດກອງ, ການສອບສວນ, ແລະ ການຕິດຕາມ ກໍລະນີສົງໃສໃຫ້ແກ່ທີມງານຕອບໂຕ້ ໄວຂັ້ນແຂວງ (RRT) ເພື່ອໃຫ້ເຂົ້າໃຈຂື້ນຕື່ມໃນການປະຕິບັດຕົວຈີງ ໃນການເກັບຕົວຢ່າງ ເພື່ອສົ່ງກວດວິເຄາະ ສຳລັບເຊື້ອ COVID-19, ແລະ ທັງເພື່ອຍົກສູງສະຕິຕື່ນຕົວກ່ຽວກັບການຄຸ້ມຄອງ, ການປ້ອງກັນ ແລະ ການຄວບຄຸມການຕິດເຊື້ອ (CM & IPC) COVID-19, ລວມທັງ ການປະຕິບັດການນຸ່ງເຄື່ອງປ້ອງກັນຕົວເອງຢ່າງເໝາະສົມ. ພາຍຫລັງຮຽນຮູ້ດ້ານທິດສະດີແລ້ວ, ທິມງານຈະຈັດເປັນກຸ່ມຄົ້ນຄວ້າ ເພື່ອສາທິດການນໍາໃຊ້ອຸປະກອນ, ປຶກສາຫາລື ແລະ ແລກປ່ຽນບົດຮຽນປະສົບການຮ່ວມກັນ ເພື່ອໃຫ້ສາມາດນໍາໄປໝູນຕົວຈິງໃຊ້ຢູ່ແຕ່ລະທ້ອງຖິ່ນໃຫ້ມີປະສິດທິຜົນ. ກອງປະຊຸມສໍາມະນາຄັ້ງນີ້ ດໍາເນີນແຕ່ວັນທີ 13 ຫາ 14 ກຸມພາ 2020 ນີ້.