ກະຊວງອຸດສາຫະກໍາ ແລະ ການຄ້າ ຮ່ວມກັບ ມະຫາວິທະຍາໄລແຫ່ງຊາດ ສະເຫຼີມສະຫຼອງວັນຊັບສິນທາງປັນຍາໂລກ ປະຈໍາປີ 2024

ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ, ຮ່ວມກັບ ມະຫາວິທະຍາໄລແຫ່ງຊາດ ຈັດງານສະເຫຼີມສະຫຼອງວັນຊັບສິນທາງປັນຍາໂລກ ປະຈໍາປີ 2024, ທີ່ມະຫາວິທະຍາໄລແຫ່ງຊາດ, ໃນວັນທີ 30 ພຶດສະພາ ນີ້, ມີ ທ່ານ ພຸດທະວັນ ນັນທະວົງ, ຫົວໜ້າກົມກວດກາ, ກະຊວງອຸດສາຫະກໍາ ເເລະ ການຄ້າ ແລະ ທ່ານ ຮສ. ປອ ເດຊານຸລາດ ແສນດວງເດດ, ວ່າການອະທິການບໍດີ ມະຫາວິທະຍາໄລແຫ່ງຊາດ, ມີບັນດາທ່ານຫົວໜ້າ, ຮອງຫົວໜ້າ, ຫ້ອງການ, ກົມ, ສະຖາບັນອ້ອມຂ້າງກະຊວງ, ຕາງໜ້າບັນດາ ກະຊວງອ້ອມຂ້າງ, ຜູ້ຕາງໜ້າຈາກອົງການຈັດຕັ້ງສາກົນ, ພະນັກງານ-ອາຈານ ແລະ ນັກສຶກສາ ເຂົ້າຮ່ວມ.

ຈຸດປະສົງ ໃນການຈັດງານສະເຫຼີມສະຫຼອງຄັ້ງນີ້ ແມ່ນເພື່ອສ້າງຈິດສໍານຶກ ແລະ ຍົກສູງບົດບາດຄວາມສໍາຄັນ ກ່ຽວກັບຊັບສິນທາງປັນຍາ ແນໃສ່ຊຸກຍູ້ສົ່ງເສີມການສ້າງ ນະວັດຕະກໍາ ແລະ ຫົວຄິດປະດິດສ້າງ ເພື່ອເປັນກໍາລັງແຮງອັນສໍາຄັນໜຶ່ງ ທີ່ປະກອບສ່ວນເຂົ້າໃນການບັນລຸເປົ້າຂອງການພັດທະນາແບບຍືນຍົງ. ໃນປີນີ້ ຄໍາຂວັນຂອງວັນຊັບສິນທາງປັນຍາໂລກແມ່ນ “ຊັບສິນທາງປັນຍາ ແລະ ເປົ້າໝາຍການພັດທະນາແບບຍືນຍົງ: ມາສ້າງອະນາຄົດຮ່ວມກັນ ດ້ວຍນະວັດຕະກຳ ແລະ ຄວາມຄິດສ້າງສັນ”. ການສະເຫຼີມສະຫຼອງວັນຊັບສິນທາງປັນຍາໂລກປະຈໍາປີ 2024 ນີ້ ເປັນການສ້າງຈິດສໍານຶກໃຫ້ທຸກພາກສ່ວນໃນສັງຄົມລາວ ເຫັນໄດ້ເຖິງຄວາມໝາຍຄວາມສໍາຄັນຂອງຊັບສິນທາງປັນຍາ ຕໍ່ການພັດທະນາເສດຖະກິດ-ສັງຄົມ ຂອງ ສປປ ລາວ. ແລະ ຈະຊ່ວຍເຮັດໃຫ້ທຸກພາກສ່ວນໃນສັງຄົມເຫັນຄວາມສໍາຄັນຫຼາຍຂຶ້ນ ກ່ຽວກັບຊັບສິນທາງປັນຍາ ພ້ອມທັງຮ່ວມກັນນໍາໃຊ້ກຳລັງແຮງຂອງຊັບສິນທາງປັນຍາ ເຂົ້າໃນການບັນລຸເປົ້າໝາຍການພັດທະນາແບບຍືນຍົງ ແລະ ຮ່ວມກັນສ້າງອະນາຄົດທີ່ດີຂຶ້ນທົ່ວສັງຄົມ.

ທ່ານ ໄຊສົມເພັດ ນໍລະສິງ ໃຫ້ຮູ້ວ່າ: ນັບແຕ່ປີ 2016 ເປັນຕົ້ນມາ ກົມຊັບສິນທາງປັນຍາ ໄດ້ມີການຈັດງານສະເຫຼີມສະຫຼອງ ວັນຊັບສິນທາງປັນຍາໂລກ ເພື່ອຊຸກຍູ້ສົ່ງເສີມຄວາມຮັບຮູ້ ແລະ ເຂົ້າໃຈກ່ຽວກັບວຽກງານຊັບສິນທາງປັນຍາ ທີ່ມີສ່ວນຮ່ວມຢ່າງຕັ້ງໜ້າຕໍ່ການພັດທະນາເສດຖະກິດ-ສັງຄົມ ແລະ ວັດທະນະທໍາ, ໂດຍສະເພາະ ປີນີ້, ແມ່ນແນໃສ່ການເຜີຍແຜ່ວຽກງານຊັບສິນທາງປັນຍາ ທີ່ປະກອບສ່ວນເຂົ້າໃນການສ້າງເປົ້າໝາຍ ພັດທະນາແບບຍືນຍົງ ແລະ ສີຂຽວ ຄືແນວໃດ ໃຫ້ແກ່ສາທາລະນະຊົນໃນວົງກວ້າງ, ລວມທັງຜູ້ປະກອບການ ເພື່ອໃຫ້ເຫັນເຖິງຄວາມສໍາຄັນ ຂອງການນໍາໃຊ້ຊັບສິນທາງປັນຍາ ໃນການປະກອບສ່ວນສ້າງມູນຄ່າເພີ່ມ ແລະ ຄວາມສາມາດແຂ່ງຂັນ ໃຫ້ແກ່ທຸລະກິດ, ສະຖາບັນການຄົ້ນຄ້ວາ ແລະ ສະຖາບັນການສຶກສາ ໃນການສົ່ງເສີມການຄົ້ນຄວ້າ ແລະ ການສ້າງນະວັດຕະກຳ.

ຍ້ອນເຫັນໄດ້ເຖິງຄວາມສຳຄັນ ຂອງຊັບສິນທາງປັນຍາ ປັດຈຸບັນຢູ່ ສປປ ລາວ ໄດ້ມີການຈົດທະບຽນ ເຄື່ອງໝາຍການຄ້າ ຈໍານວນ 63,258 ເຄື່ອງໝາຍ, ສິດທິບັດ 953 ສິດທິບັດ ແລະ ແບບອຸດສາຫະກໍາ ຈໍານວນ 649 ແບບ, ພ້ອມກັນນັ້ນ, ກົມຊັບສິນທາງປັນຍາ ກໍໄດ້ດຳເນີນໂຄງການສົ່ງເສີມຊັບສິນທາງປັນຍາ ໃຫ້ແກ່ຜູ້ປະກອບການ MSME ແລະ ODOP ໃນການສ້າງຍີ່ຫໍ້ ແລະ ຈົດທະບຽນເຄື່ອງໝາຍການຄ້າ ຊຶ່ງໂຄງການດັ່ງກ່າວ ແມ່ນເນັ້ນຊ່ວຍຜູ້ປະກອບການຈາກທີ່ບໍ່ເຄີຍມີຍີ່ຫໍ້ ໃຫ້ມີຍີ່ຫໍ້ ແລະ ຜູ້ທີ່ມີແລ້ວໄດ້ປັບປຸງຍີ່ຫໍ້ໃຫ້ດີຂຶ້ນ ມີພາບລັກທີ່ດີຂຶ້ນ ມີກົນລະຍຸດທິດທາງແບຣນທີ່ຊັດເຈນຂຶ້ນ ຮູ້ຈຸດຢືນ ຮູ້ຈຸດເດັ່ນຂອງຕົນ; ອີກດ້ານໜຶ່ງ, ເພື່ອໃຫ້ສອດຄ່ອງກັບແຜນພັດທະນາ ເສດຖະກິດສັງຄົມແຫ່ງຊາດ ແລະ ແຜນອຸດສາຫະກຳປຸງແຕ່ງ ແລະ ການຄ້າ ຈົນເຖິງ ປີ 2025 ແລະ ວິໄສທັດ ປີ 2030, ແຜນພັດທະນາວຽກງານຊັບສິນທາງປັນຍາ ຍັງໄດ້ກຳນົດເປົ້າໝາຍ ແລະ ຕົວຊີ້ວັດ ເພື່ອເຮັດໃຫ້ນັກຄົ້້ນຄວ້າ-ວິໄຈ, ນັກສຶກສາ ສາມາດເຂົ້າເຖິງຂໍ້ມູນຊັບສິນທາງປັນຍາ, ສະໜັບສະໜູນການຄົ້ນຄວ້າ-ວິໄຈ ແລະ ສົ່ງເສີມຫົວຄິດປະດິດສ້າງ ແລະ ປະດິດຄິດແຕ່ງ ໃນວຽກງານການສຶກສາຄົ້ນຄວ້າ-ພັດທະນານະວັດຕະກຳ, ສ້າງສູນ ຫຼື ຈຸດປະສານງານ ເພື່ອສົ່ງເສີມເຕັກໂນໂລຊີ ແລະ ນະວັດຕະກຳ ຢູ່ມະຫາວິທະຍາ ໄລ ໃນຂອບເຂດທົ່ວປະເທດອີກດ້ວຍ. ຊຶ່ງເປັນອີກໜຶ່ງແຜນງານທີ່ທາງພວກເຮົາແນໃສ່ ແລະ ສົ່ງເສີມວຽກງານຊັບສິນທາງປັນຍາ ໃນສະຖານການສຶກສາ.