ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກະຊວງແຮງງານ ແຈ້ງກ່ຽວກັບການຊ່ວຍເຫຼືອ ຜູ້ປະສົບອຸທົກກະໄພ ພາກກາງ ແລະ ພາກໃຕ້

ຕໍ່ກັບຜົນກະທົບຈາກອິດທິພົນຂອງລົມພະຍຸໝູນເຂດຮ້ອນໂພດຸນ ແລະ ລົມພະຍຸດີເປຣຊັນ ທີ່ພັດຜ່ານເຂົ້າມາ ສປປ ລາວ ໃນຊ່ວງທ້າຍເດືອນສິງຫາ ຫາ ຕົ້ນເດືອນກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມຢູ່ 6 ແຂວງຄື ແຂວງຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ແຂວງອັດຕະປື, ຊຶ່ງສົ່ງຜົນກະທົບໂດຍກົງຕໍ່ປະຊາຊົນໃນ 47 ເມືອງ, 1.643 ບ້ານ, 150.415 ຄອບຄົວ, ແລະ 458.017 ຄົນຖືກກະທົບ, ເສຍຊີວິດ 13 ຄົນ ( ແຂວງສະຫວັນນະເຂດ 3 ຄົນ, ສາລະວັນ 2 ຄົນ, ອັດຕະປື 4 ຄົນ ແລະ ຈຳປາສັກ 4 ຄົນ ), ສູນຫາຍ 1 ຄົນຢູ່ແຂວງຈຳປາສັກ, ປະຊາຊົນຍົກຍ້າຍ 14.328 ກວ່າຄົນ, 102.416 ກວ່າຄົນ, ເປັນຍິງ 15.205 ຄົນ, ສົ່ງຜົນກະທົບ ແລະ ຄວາມເສຍຫາຍຕໍ່ຂະແໜງການຕ່າງໆທາງສັງຄົມ, ເສດຖະກິດ, ສິ່ງແວດລ້ອມ ແລະ ໂຄງລ່າງພື້ນຖານທີ່ສຳຄັນ, ເປັນຕົ້ນທີ່ຢູ່ອາໃສ ແລະ ບ້ານເຮືອນຂອງປະຊາຊົນ, ເສັ້ນທາງ, ຂົວ, ຫ້ອງການຂອງລັດ, ໂຮງຮຽນ, ໂຮງໝໍ, ສຸກສາລາ, ແຫຼ່ງນໍ້າກິນ-ນໍ້າໃຊ້, ພື້ນທີ່ການຜະລິດ, ສັດລ້ຽງ, ຊົນລະປະທານ ແລະ ອື່ນໆ. ຕໍ່ກັບສະພາບຜົນກະທົບ ແລະ ຄວາມເສຍຫາຍທີ່ເກີດຂຶ້ນຈາກເຫດການໄພນໍ້າຖ້ວມໃນຄັ້ງນີ້, ອຳນາດການປົກຄອງ ແລະ ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນທ້ອງຖິ່ນ ໄດ້ປະຕິບັດໃຫ້ການຊ່ວຍເຫຼືອສຸກ ເສີນທັນທີ ໂດຍໄດ້ນຳໃຊ້ກຳລັງແຮງງານຂອງພະນັກງານ, ທະຫານ, ຕຳຫຼວດ ແລະ ປະຊາຊົນພາຍໃນບ້ານ ປະຕິບັດການຍົກຍ້າຍທັງຄົນ ແລະ ຊັບສິນໄປບ່ອນທີ່ປອດໄພ ເປັນຕົ້ນອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ຢາປົວພະຍາດ ແລະ ອື່ນໆ.

ພ້ອມກັນນີ້, ທາງຄະນະພັກ ຄະນະນຳຂັ້ນສູນກາງນຳໂດຍ ທ່ານນາຍົກລັດຖະມົນຕີ, ຮອງນາຍົກລັດຖະມົນຕີ ພ້ອມດ້ວຍຄະນະ ກໍ່ໄດ້ໄປພື້ນທີ່ພາກສະໜາມຢູ່ບັນດາແຂວງທີ່ຖືກກະທົບເພື່ອຕິດຕາມ, ຊຸກຍູ້ການແກ້ໄຂສຸກເສີນ ແລະ ໃຫ້ກຳລັງໃຈ, ຄວາມອົບອຸ່ນແກ່ປະຊາຊົນຜູ້ທີ່ໄດ້ຮັບຜົນກະທົບ ແລະ ພະນັກງານ, ນາຍ ແລະ ພົນທະຫານ, ຕຳຫຼວວດ ແລະ ພາກສ່ວນຕ່າງໆທີ່ປະຕິບັດໜ້າທີ່ກູ້ໄພ ແລະ ແກ້ໄຂສຸກເສີນ. ທ່ານ ຄຳແພງ ໄຊສົມແພງ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ປະທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໄດ້ໃຫ້ສຳພາດຕໍ່ສື່ມວນຊົນວ່າ : ສະເພາະການປະຕິບັດໃຫ້ການຊ່ວຍເຫຼືອຂອງຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ກະຊວງແຮງງານ ແລະ ສະຫວັດດີການສັງຄົມ ໃນນາມປະທານກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໂດຍໄດ້ຮັບການມອບໝາຍຂອງຂັ້ນເທິງ ກໍ່ໄດ້ປະສານງານຢ່າງໃກ້ຊິດກັບບັນດາແຂວງທີ່ຖືກກະທົບຈາກໄພພິບັດ ພ້ອມທັງໄດ້ປະຕິບັດໃຫ້ການຊ່ວຍເຫຼືອບັນເທົາທຸກສຸກເສີນ, ເປັນຕົ້ນໄດ້ສົບທົບກັບກອງທັບນຳໃຊ້ລົດ ແລະ ຍົນ ເພື່ອຈັດສົ່ງພາຫະນະ, ອຸປະກອນ ແລະ ເຄື່ອງຊ່ວຍເຫຼືອບັນເທົາສຸກເສີນ ໄປຊ່ວຍເຫຼືອປະຊາຊົນທີ່ຖືກກະທົບຢູ່ບັນດາແຂວງເຊັ່ນ: – ເຮືອກູ້ໄພຈຳນວນ 39 ລຳ ເພື່ອນຳໃຊ້ເຂົ້າໃນການກູ້ໄພ ແລະ ຍົກຍ້າຍປະຊາຊົນ ພ້ອມທັງຊັບສິນຂອງເຂົາເຈົ້າ. – ເຄື່ອງນອນຄອບຄົວ 120 ຊຸດ – ນໍ້າດື່ມ 3 ພັນກວ່າແພັກ – ເຄື່ອງໃຊ້ຄົວເຮືອນ 300 ກວ່າຊຸດ – ໄດ້ນຳໃຊ້ເງິນທີ່ລັດຖະບານຈັດສັນໃຫ້ຈຳນວນ 5 ຕື້ກີບ ນຳໄປ ຊ່ວຍເຫຼືອ ແລະ ມອບໃຫ້ບັນດາແຂວງທີ່ຖືກກະທົບຈາກໄພພິບັດນໍ້າຖ້ວມໃນຄັ້ງນີ້ ລວມທັງໄດ້ມອບເງິນໃນບ້ວງກອງທຶນແຮນໍ້າມັນສຸກເສີນໃຫ້ແຂວງລະ 50 ລ້ານກີບ ເພື່ອນຳໃຊ້ເຂົ້າໃນການບໍລິຫານຂົນສົ່ງເຄື່ອງຊ່ວຍເຫຼືອບັນເທົາທຸກໄປໃຫ້ຜູ້ປະສົບໄພພິບັດ. ພ້ອມກັນນີ້, ໂດຍໄດ້ຮັບການມອບໝາຍຈາກລັດຖະບານ, ກະຊວງແຮງງານ ແລະ ສະຫວັດດີການສັງຄົມ ກໍ່ໄດ້ອອກແຈ້ງການລະດົມບໍລິຈາກນຳສັງຄົມຜ່ານສື່ມວນຊົນ ຊຶ່ງໄດ້ເລີ່ມປະຕິບັດແຕ່ວັນທີ 7 ກັນຍາ 2019 ເປັນຕົ້ນມາ. ມາຮອດປະຈຸບັນ, ກໍ່ໄດ້ມີຫຼາຍພາກສ່ວນທີ່ເຂົ້າມາໃຫ້ການຊ່ວຍເຫຼືອ ທັງເປັນເງິນ ແລະ ເຄື່ອງອຸປະໂພກ-ບໍລິໂພກ. ປະຈຸບັນນີ້, ໄດ້ຂົນສົ່ງເຄື່ອງອຸປະໂພກບໍລິໂພກທີ່ໄດ້ຮັບບໍລິຈາກ ເປັນຕົ້ນເຂົ້າກິນ, ນໍ້າດື່ມ, ເຄື່ອງນຸ່ງຫົ່ມ, ເຄື່ອງນອນ, ເຄື່ອງໃຊ້ຄົວເຮືອນ, ແລະ ອື່ນໆ ມູນຄ່າ 1 ຕື້ກີບ ນຳໄປຊ່ວຍເຫຼືອຜູ້ປະສົບໄພພິບັດໃນບັນດາແຂວງຢູ່ພາກໃຕ້ແລ້ວ. ປະຈຸບັນ, ຍັງມີເຄື່ອງອຸປະໂພກ-ບໍລິໂພກ ຈຳນວນໜຶ່ງຢູ່ສາງກະຊວງແຮງງານ ແລະ ສະຫວັດດິການສັງຄົມ ແລະ ກຳລັງປະສານກັບກອງທັບ ເພື່ອນຳສົ່ງເຄື່ອງດັ່ງກ່າວເພື່ອຊ່ວຍເຫຼືອຜູ້ປະສົບໄພພິບັດ, ເປັນຕົ້ນເຄື່ອງໃຊ້ຄົວເຮືອນ, ເຄື່ອງນຸ່ງຫົ່ມ, ເຄື່ອງນອນ, ເຄື່ອງໃຊ້ສ່ວນຕົວ, ເຕັ້ນນອນຄອບຄົວ ແລະ ອື່ນໆ. ນອກຈາກນີ້, ກະຊວງແຮງງານ ແລະ ສະຫວັດດີການສັງຄົມ ຍັງໄດ້ຈັດຕັ້ງສູນປະສານງານສຸກເສີນຂຶ້ນຢູ່ກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ ພ້ອມທັງໄດ້ອອກແຈ້ງການເຖິງບັນແຂວງ ເພື່ອຈັດຕັ້ງສູນປະສານງານຊ່ວຍເຫຼືອສຸກເສີນຢູ່ຂັ້ນແຂວງ ແລະ ເມືອງ ເພື່ອປະຕິບັດໃຫ້ການຊ່ວຍເຫຼືອສຸກເສີນ, ທັງນີ້ກໍ່ເພື່ອຮັບປະກັນໃຫ້ໄດ້ທາງດ້ານປະສິດທິພາບ ແລະ ປະສິດທິຜົນໃນການປະສານງານລວມສູນ ການຊ່ວຍເຫຼືອທັງໄລຍະສຸກເສີນ ແລະ ຟື້ນຟູຄືນຫຼັງໄພພິບັດ.

ສ່ວນວຽກງານທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດມີຄື : 1. ສືບຕໍ່ການຕິດຕາມພະຍາກອນ ແລະ ແຈ້ງຂ່າວເຕືອນໄພລ່ວງໜ້າໃຫ້ທັນເວລາ ນຳໃຊ້ເຄື່ອງມືທີ່ມີຢູ່. 2. ສືບຕໍ່ປະສານ ປະຕິບັດໃຫ້ການຊ່ວຍເຫຼືອສຸກເສີນ ແລະ ຟື້ນຟູຮີບດ່ວນ ລວມທັງການສົ່ງທີມປະເມີນສຸກເສີນ ເພື່ອເຮັດການປະເມີນຄວາມເສຍຫາຍ ແລະ ຄວາມຕ້ອງການ ເພື່ອສ້າງແຜນຊ່ວຍເຫຼືອ ແລະ ຟື້ນຟູຄືນຫຼັງໄພພິບັດ. 3. ເລັ່ງສືບຕໍ່ສ້ອມແປງສິ່ງອຳນວຍຄວາມສະດວກ ແລະ ສະຖານທີ່ບໍລິການ ເປັນຕົ້ນເສັ້ນທາງ, ຂົວ, ໄຟຟ້າ, ນໍ້າປະປາ, ແຫຼ່ງນໍ້າກິນ-ນໍ້າໃຊ້, ໂຮງຮຽນ, ໂຮງໝໍ, ສຸກສາລາ ແລະ ອື່ນໆ. 4. ຮັບປະກັບໃຫ້ຜູ້ປະສົບໄພພິບັດ ທີ່ຢູ່ອາໃສສູນພັກເຊົາ ໄດ້ເຂົ້າເຖິງປັດໄຈອາຫານ, ນໍ້າດື່ມ, ການຢູ່ກິນທີ່ປອດໄພ, ສຸຂະອານາໄມ, ສຸຂະພາບ ແລະ ອື່ນໆ. 5. ສືບຕໍ່ນຳໃຊ້ກຳລັງແຮງຂອງກອງທັບ, ຕຳຫຼວດ, ຊາວໜຸ່ມ, ແມ່ຍິງ, ກາແດງ, ອາສາສະໝັກ, ອື່ນໆ ເພື່ອປະຕິບັດໃຫ້ການຊ່ວຍເຫຼືອສຸນເສີນ ແລະ ຟື້ນຟູຫຼັງໄພພິບັດ. 6. ການຂໍນຳໃຊ້ເຂົ້າສານໃນຂອບໂຄງການ ອາຊຽນບວກສາມ, ລວມທັງເຂົ້າໃນຄັງສະສົມຂອງກະຊວງການເງິນ ສະເໜີໃຫ້ປະສານກັນລະອຽດ ລວມທັງການມອບໂອນໂຄງການຄັງແຮເຂົ້າລະຫວ່າງ ກະຊວງການເງິນ ໃຫ້ກະຊວງແຮງງານ ແລະ ສະຫວັດດີການສັງຄົມ.