ກະຊວງໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ຈັດກອງປະຊຸມເຜີຍແຜ່ຂໍ້ມູນໂຄງການຂົນສົ່ງແບບຍືນຍົງ ໃນຕົວເມືອງຂອງນະຄອນຫຼວງວຽງຈັນ ຈັດຂຶ້ນວັນທີ 8 ສິງຫາ 2024 ທີ່ ໂດຍເປັນປະທານຂອງ ທ່ານ ສະເຫຼີມສັກ ໄຊຍະມຸງຄຸນ ຫົວໜ້າຫ້ອງການກະຊວງໂຍທາທິການ ແລະ ຂົນສົ່ງ ມີຫົວໜ້າ-ຮອງຫົວໜ້າກົມ ພະນັກງານ-ວິຊາການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ສະເຫຼີມສັກ ໄຊຍະມຸງຄຸນ ກ່າວວ່າ: ໂຄງການນີ້ ແມ່ນໄດ້ກະກຽມ ແລະ ໄດ້ລິເລີ່ມຈັດຕັ້ງປະຕິບັດມາແຕ່ 2015 ແລະ ມີແຜນໃຫ້ສໍາເລັດໂຄງການໃນເດືອນມິຖຸນາ 2020 ແຕ່ຍ້ອນສະພາບຄວາມພ້ອມ ທັງພາຍໃນເຮົາໃນການປະຕິບັດເງື່ອນໄຂເງິນກູ້ຢືມຊ່ວຍເຫຼືອລ້າ ແລະ ພາຍນອກການເກີດພະຍາດໂຄວິດ-19 ລະບາດຢູ່ບັນດາປະເທດຕ່າງໆທົ່ວໂລກ ໂຄງການນີ້ ຈຶ່ງໄດ້ແກ່ຍາວມາຮອດປັດຈຸບັນ ແລະ ໄດ້ຕໍ່ເວລາໃຫ້ໂຄງການນີ້ ສໍາເລັດໃນເດືອນທັນວາ 2024 ເນື່ອງຈາກໂຄງການນີ້ ເປັນໂຄງການທີ່ໃຫຍ່ ຈັດຕັ້ງຢູ່ນະຄອນຫຼວງວຽງຈັນ ໃນໄລຍະກໍ່ສ້າງ ແລະ ຫຼັງຈາກສໍາເລັດກໍ່ສ້າງ ຈະມີການກະທົບຕໍ່ສັງຄົມຫຼາຍດ້ານ ເຊິ່ງຈະມີທັງດ້ານບວກ ແລະ ດ້ານລົບ ດ້ານບວກແມ່ນການແກ້ໄຂການສັນຈອນແອອັດ ອຸປະຕິເຫດ ສະພາບແວດລ້ອມທາງອາກາດ ແລະ ດ້ານລົບແມ່ນການບໍ່ໃຫ້ຄວາມຮ່ວມໄມ້ຮ່ວມມື ການບໍ່ມີຄວາມຕື່ນຕົວຂອງປະຊາຊົນ ແລະ ພະນັກງານທີ່ຍັງຈະສືບຕໍ່ໃຊ້ລົດສ່ວນຕົວຫຼວງຫຼາຍ ບໍ່ຫັນມາຊົມໃຊ້ລົດເມດ່ວນສາທາລະນະ ທີ່ລັດຖະບານລົງທຶນນີ້.
ການຂົນສົ່ງສາທາລະນະ ລົດເມດ່ວນແມ່ນການຂົນສົ່ງທີ່ພວກເຮົາເລືອກຈະພັດທະນາ ແລະ ຈະນໍາໃຊ້ເຂົ້າໃນການຮັບໃຊ້ເຂົ້າໃນການບໍລິການໃນປີ 2025 ໃນທັດສະນະຂອງຂ້າພະເຈົ້າແລ້ວ ຍັງມີຫຼາຍດ້ານທີ່ເປັນຫວ່ງ ເພາະວ່າເຖິງມີແລວທາງລົດເມດ່ວນແລ່ນສະເພາະ ມີລົດເມໄຟຟ້າຈໍານວນ 55 ຄັນ ບວກກັບລົດເມນະຄອນຫຼວງທີ່ມີປັດຈຸບັນ ການທີ່ຈະຄຸ້ມຄອງບັນຊາໃຫ້ການບໍລິການລົດເມມີຄຸນນະພາບສູງ ຮັບໃຊ້ການເດີນທາງຂອງປະຊາຊົນ ໃຫ້ໃກ້ຄຽງກັບການຂົນສົ່ງແບບໃຊ້ລົດສ່ວນຕົວມັນບໍ່ງ່າຍ ຄວາມເຂົ້າໃຈກ່ຽວກັບການບໍລິການລົດເມ ຖ້າຄວາມຕື່ນຕົວຂອງປະຊາຊົນຍັງຕໍ່າ ແມ່ນຈະເຮັດຈໍານວນປະຊາຊົນປະລົດສ່ວນຕົວມານໍາໃຊ້ລົດເມແມ່ນຍາກ.
ການພັດທະນາຕົວເມືອງປັດຈຸບັນ ແມ່ນການຫັນໄປສູ່ການຄຸ້ມຄອງ ແລະ ການບໍລິການຕົວເມືອງ ແບບອັດສະລິຍະ ໃນນີ້ ການຂົນສົ່ງແບບອັດສະລິຍະ ແມ່ນອົງປະກອບຕົ້ນຕໍຂອງຕົວເມືອງ ສະນັ້ນ ການບໍລິການລົດເມດ່ວນ BRT ໃນອານາຄົດຈະຕ້ອງຫັນໄປສູ່ລະບົບອັດສະລິຍະ ມາດຖານການບໍລິການທຽບເທົ່າກັບສາກົນ.
ຂ່າວ: ວຽງຈັນໃໝ່
