11 ສິງຫາ 2022, ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດ ກອງປະຊຸມປຶກສາຫາລືເພື່ອກະກຽມຄວາມພ້ອມດ້ານເນື້ອໃນຕ່າງໆ ໃນການເປັນປະທານອາຊຽນ ຂອງສປປ ລາວ ໃນປີ 2024 ພາຍໃຕ້ການເປັນປະທານຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ພ້ອມດ້ວຍຜູ້ຕາງບັນດາກົມກອງອ້ອມຂ້າງກະຊວງເຂົ້າຮ່ວມ.
ໃນໂອກາດນີ້, ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: ກອງປະຊຸມຄັ້ງນີ້ ຈັດຂຶ້ນ ເພື່ອປຶກສາຫາລື ກ່ຽວກັບບັນດາເນື້ອໃນຕ່າງໆ ເພື່ອກະກຽມຄວາມພ້ອມໃຫ້ແກ່ການເປັນປະທານອາຊຽນຂອງສປປ ລາວ ໃນປີ 2024 ໂດຍສະເພາະ ແມ່ນໃນຂົງເຂດວຽກງານເສົ້າຄໍ້າວັດທະນະທຳ ເຊິ່ງຜ່ານມາ ສປປ ລາວ ໄດ້ຮັບກຽດເປັນປະທານກອງປະຊຸມອາຊຽນມາແລ້ວ 2 ຄັ້ງ ເຊິ່ງໄດ້ຮັບຜົນສໍາເລັດອັນໃຫຍ່ຫລວງ. ເຖິງຢ່າງໃດກໍຕາມ ການເປັນປະທານອາຊຽນຂອງສປປ ລາວ ໃນປີ 2024 ນີ້ ຍັງມີສິ່ງທ້າທ້າຍຫລາຍຢ່າງ ເປັນຕົ້ນສະພາບພາກພື້ນ ແລະ ສາກົນ ມີສະພາບສົບສົນ, ສະເພາະ ສປປ ລາວ ສະພາບເສດຖະກິດ ຍັງມີຄວາມຫຍຸ້ງ ຍາກ ແລະ ອື່ນໆ ຈຶ່ງຮຽກຮ້ອງໃຫ້ຜູ້ເຂົ້າຮ່ວມ ຈົ່ງພ້ອມກັນເອົາໃຈໃສ່ຕິດຕາມ ແລະ ຄົ້ນຄ້ວາປະກອບຄຳຄິດຄຳເຫັນ ໃສ່ບັນດາເນື້ອໃນຕ່າງໆ ເພື່ອຮັບ ປະກັນໃຫ້ມີຄວາມຖືກຕ້ອງ ແລະ ສົມບູນທີ່ສຸດ.
ທ່ານ ນາງ ແພງຈັນ ແພງເມືອງ ຫົວໜ້າກົມແຜນການ ແລະ ການຮ່ວມມືສາກົນ ກະຊວງ ຖວທ ໄດ້ລາຍງານຂໍ້ຕົກລົງວ່າດ້ວຍການແຕ່ງຕັ້ງໜ່ວຍງານຊ່ວຍວຽກຂອງອະນຸກຳມະການ ໂຄສະນາເຜີຍແຜ່ວັດທະນະທຳ ແລະ ຂ່າວສານໃນການເປັນປະທານອາຊຽນ ຂອງສປປ ລາວປິ2024.ພ້ອມນັ້ນ, ກະຊວງ ຖວທ ຍັງຈະເປັນຈຸດປະສານງານ ລະຫວ່າງກະຊວງ ກັບ ພາຍນອກ ແລະ ພາຍໃນ ໃນການກະກຽມວາລະ ແລະແຜນເຄື່ອນໄຫວລະອຽດຂອງບັນດາກອງປະຊຸມຕ່າງໆທີ່ກ່ຽວຂ້ອງ, ກະກຽມບົດປາໄສ ແລະ ບົດປະກອບຄຳເຫັນຂອງການນຳລາວຕາມວາລະກອງປະຊຸມແລະບົດອື່ນໆ. ນອກຈາກນີ້, ຍັງຕ້ອງປະສານສົມ ທົບກັບໜ່ວຍງານປະສານງານ ແລະ ກອງເລຂາ ໃນການກໍານົດ, ຕິດຕາມວຽກງານການສະແດງ , ສ້າງວີດີໂອກ່ຽວກັບ 10 ປະເທດອາຊຽນ, ພິເສດໃຫ້ສຳເລັດວີດີໂອສັ້ນກ່ຽວກັບສປປ ລາວ ໃນການເປັນປະທານອາຊຽນ ເພື່ອນຳໄປເຜີຍແຜ່ໃນເວລາ ສປປ ລາວ ຮັບເປັນປະທານອາຊຽນ ຈາກອິນໂດເນເຊຍ ໃນທ້າຍປີ 2023, ອອກແບບການສະແດງໃນພິທີ ເປີດ-ປິດ ກອງປະຊຸມສຸດຍອດອາຊຽນ ແລະ ກອງປະຊຸມກ່ຽວຂ້ອງຕ່າງໆ.
ຂ່າວຈາກ, ຂປລ
Loading...