ພິທີປາຖະກະຖາວັນສ້າງຕັ້ງພັກປະຊາຊົນປະຕິວັດລາວຄົບຮອບ 68 ປີ, ວັນນັກຮົບເສຍອົງຄະ ແລະເສຍ ສະຫລະຊີວິດເພື່ອປະເທດຊາດຄົບຮອບ 77 ປີ, ປາຖະກະຖາວັນສ້າງຕັ້ງອົງການກວດກາພັກ-ລັດຄົບຮອບ 41 ປີ ແລະມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2022 ຈັດຂຶ້ນຕອນບ່າຍວັນທີ 27 ມິນາ 2023 ທີ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານວັນສີ ກົວມົວ ກໍາມະການສໍາຮອງສູນກາງພັກ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ພ້ອມດ້ວຍພະນັກງານ, ສະມະຊິກພັກທົ່ວກະຊວງ ຖວທ ເຂົ້າຮ່ວມປະມານ 300ຄົນ.
ທ່ານວັນສີ ກົວມົວ ກ່າວບາງຕອນວ່າ: ກ່ອນໜ້ານີ້ 68 ປີຄື ໃນວັນທີ 22 ມີນາ 1955, ພັກປະຊາຊົນລາວ ເຊິ່ງປະຈຸບັນແມ່ນ ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນ ໂດຍແມ່ນປະທານ ໄກສອນ ພົມ ວິຫານ ເປັນຜູ້ນໍາໜ້າເພື່ອສືບທອດພາລະກິດອັນສະຫງ່າງາມຂອງພັກກອມມູນິດອິນດູຈີນໃນການນໍາພາຂະບວນການປະຕິວັດໂດຍກົງ ຢູ່ປະເທດເຮົາ. ການກຳເນີດເກີດຂຶ້ນຂອງພັກເຮົາຖືເປັນຂີດໝາຍ ແລະ ເປັນບາດລ້ຽວປະຫວັດສາດສຳຄັນຍິ່ງ ໃນວິວັດທະນາການຂອງຊາດລາວເຮົາ; ນັບແຕ່ນັ້ນມາ ຂະບວນການຮັກຊາດຂອງປະຊາຊົນລາວ ໄດ້ກ້າວຂຶ້ນສູ່ຄຸນນະພາບໃໝ່ ແຫ່ງການຕໍ່ສູ້ກູ້ຊາດ, ປົດປ່ອຍປະຊາຊົນ,ທັງເປັນການເປີດເສັ້ນທາງອັນສະ ຫວ່າງສະໄຫວແຫ່ງການນໍາພາຊາດລາວກ້າວໄປສູ່ຄວາມເປັນເອກະລາດ ແລະ ສ້າງສາພັດທະນາ ໄປສູ່ຄວາມວັດທະນະຖາວອນ.
ເມື່ອທົບທວນຄືນເສັ້ນທາງແຫ່ງການຕໍ່ສູ້ອັນລະອິດລະອ້ຽວ ແລະ ມີໄຊສະຫງ່າ ງາມຂອງຊາດເຮົາ ພາຍໃຕ້ການນໍາພາ ຂອງພັກປະຊາຊົນປະຕິວັດລາວ,ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນເຮົາ ມີຄວາມເອກອ້າງພາກພູມໃຈ ເປັນຢ່າງຍິ່ງ ທີ່ເຫັນວ່າ ພັກເຮົາ ສາມາດສືບທອດແລະ ເສີມຂະຫຍາຍມູນເຊື້ອອັນອົງອາດກ້າແກ່ນ ຂອງຊາດລາວ, ຄົນລາວວິລະຊົນ ໃຫ້ກ້າວຂຶ້ນສູ່ຍອດສູງໃໝ່, ພັກ ຍາມໃດກໍ່ຈົງຮັກພັກດີຢ່າງສຸດຊຶ້ງຕໍ່ຜົນປະໂຫຍດ ຂອງຊາດ ແລະ ຂອງປະຊາຊົນ, ຍາມໃດ ກໍ່ມີຄວາມສະໜິດຕິດພັນກັບມະຫາຊົນ, ເອົາມະຫາຊົນ ເປັນກຳລັງແຮງ ອັນບໍ່ເຫືອດແຫ້ງ ຂອງພັກ, ຍາມໃດກໍ່ມີຄວາມສາມັກຄີ, ເອກະພາບເປັນປຶກແຜ່ນແໜ້ນຫນາ, ຍາມໃດ ກໍ່ເຊີດຊູຄວາມເປັນເອກະລາດ, ເປັນເຈົ້າຕົນເອງ, ມີຄວາມຄິດປະດິດສ້າງ, ໄຫວພິບ ໃນການວາງແນວທາງ, ນະໂຍບາຍ ແລະນໍາພາຊີ້ນຳພາລະກິດປະຕິວັດ ຢູ່ປະເທດເຮົາ ມາໂດຍຕະຫຼອດ.
ປີ 2023 ນີ້ເປັນປີທີ່ສາມ ແລະ ຖືເປັນໄລຍະກາງສະໄໝ ແຫ່ງການຈັດຕັ້ງປະຕິ ບັດມະຕິກອງປະຊຸມໃຫຍ່ຄັ້ງທີ XI ຂອງພັັກ ກໍ່ຄື ກອງປະຊຸມໃຫຍ່ຂອງບັນດາອົງຄະ ນະພັກ ກະຊວງ, ອົງການ ແລະ ທ້ອງຖິ່ນ, ຢູ່ໃນທ່າມກາງສະພາບການພາກພື້ນ ແລະ ສາກົນ ສືບຕໍ່ຜັນແປທີ່ມີທັງເງື່ອນໄຂອັນເອື້ອອໍານວຍ ແລະສິ່ງທ້າທາຍທົດສອບຫຼາຍປະການ ເຊິ່ງຮຽກຮ້ອງໃຫ້ພັກເຮົາ ຕ້ອງຍຶດໝັ້ນ ແລະຮູ້ເສີມຂະຫຍາຍທາດແທ້ມູນເຊື້ອປະຕິວັດ, ຜົນງານທີ່ພັກເຮົາໄດ້ສ້າງສົມມາໃຫ້ໜັກແໜ້ນ ແລະປະດິດສ້າງໃໝ່ ແລະ ເພີ່ມທະວີການສືບຕໍ່ນໍາພາຊີ້ນໍາ ສ້າງການຫັນປ່ຽນທີ່ແຂງແຮງອີ່ຫຼີ່, ບຸກບືນສູ້ຊົນເພື່ອປັບປຸງ, ກໍ່ສ້າງຕົນເອງ ແນໃສ່ຍົກສູງຄວາມສາມາດນໍາພາ ແລະລັກສະນະນໍາໜ້າ ຂອງພັກເຮົາຂຶ້ນຢ່າງບໍ່ຍຸດຢັ້ງ.
ຕອນທ້າຍຂອງພິທີຍັງໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2022, ຈໍານວນ 27ໜ່ວຍພັກ ໃນນັ້ນສະຖານີວິທະຍຸກະຈາຍສຽງແຫ່ງຊາດໄດ້ຮັບ 5 ໜ່ວຍພັກຄື: ໜ່ວຍພັກຫ້ອງການແລະຈັດຕັ້ງ, ໜ່ວຍພັກບັນນາທິການ1, ໜ່ວຍພັກບັນນາທິການ2, ໜ່ວຍພັກເຕັກນິກການສຽງ ແລະໜ່ວພັກເຄື່ອງສົ່ງຫລັກ49, ພ້ອມກັນນີ້ຍັງໄດ້ມອບບັດສະມາຊິກພັກໃຫ້ສາມະຊິກພັກສົມບູນປະຈໍາປີ 2022 ຕື່ມອີກ.
