ກະຊວງ ຖວທ ຈັດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ ໃຫ້ສະມາຊິກພັກ-ພະນັງງານຫລັກແຫລ່ງ.

ການຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ 7 ໃຫ້ສະມາຊິກພັກ-ພະນັງງານຫລັກແຫລ່ງຂອງກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ຈັດຂຶ້ນໃນວັນທີ 9 ສິງຫາ 2022ນີ້ ທີ່ສະຖາບັນສື່ມວນຊົນ, ວັດທະນະທໍາ ແລະ ທ່ອງທ່ຽວ ໂດຍການ ເຂົ້າຮ່ວມ ຂອງທ່ານ ວັນສີ ກົວມົ່ວ ກໍາມະການສໍາຮອງສູນກາງພັກ, ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງ ຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ມີທ່ານ ດາວສະຫວັນ ເຄືອມີໄຊ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ຫົວໜ້າກົມ ຮອງກົມ ພ້ອມດ້ວຍສໍາມະນາກອນອ້ອມຂ້າງກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ

ໃນໂອກາດນີ້ ທ່ານ ວັນສີ ກົວມົວ ກໍາມະການສໍາຮອງສູນກາງພັກ, ຮອງເລຂາຄະນະບໍລິຫານງານ ພັກ, ຮອງລັດຖະມົນຕີກະຊວງ ຖະແຫລງຂ່າວ ວັດທະນະທໍາ ແລະ ທ່ອງທ່ຽວມີຄໍາເຫັນວ່າ: ວຽກງານພັດທະນາຊັບພະຍາກອນມະນຸດແມ່ນວຽກງານອັນສໍາຄັນໜຶ່ງທີ່ບໍ່ສາມາດຕັດແຍກອອກຈາກກັນໄດ້ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ເປັນພາກສ່ວນໜຶ່ງທີ່ເຮັດໃຫ້ ບົດບາດວຽກງານແນວຄິດຂອງພັກ. ໂດຍສະເພາະ ການຍົກລະດັບ ທິດສະດີມາກ-ເລນິນ, ແນວຄິດ ໄກສອນ ພົມວິຫານ, ການສ້າງຄວາມເຂັ້ມແຂງທາງດ້ານການເມືອງແນວຄິດ, ສ້າງສະຕິທີ່ມີຫລັກໝັ້ນທາງດ້ານການເມືອງ, ຍົກສູງຄຸນສົມບັດສິນທໍາປະຕິວັດ ແລະ ຄວາມສາມາດາຄຸ້ມຄອງ ໃຫ້ແກ່ສະມາຊິກພັກ-ພະນັກງານຫລັກແຫລ່ງໃຫ້ສູງຂຶ້ນ ແລະ ໜັກແໜ້ນ ເພາະວ່າ: ພະນັກງານນໍາພາ ຄຸ້ມຄອງມີບົດບາດຕັດສິນການພັດທະນາຂອງອົງການ ຕະຫລອດຮອດຜົນປະໂຫຍດອັນໃຫຍ່ ຫລວງຂອງປະເທດຊາດ. ສະນັ້ນ ຄະນະພັກ ຄະນະນໍາກະຊວງ ຖວທ ແມ່ນເຫັນຄວາມສໍາຄັນໃນການບໍາລຸງສ້າງ ກໍ່ຄືການຍົກລະດັບດ້ານທິດສະດີການເມືອງ ແລະ ດ້ານວິຊາສະເພາະ ຈຶ່ງໄດ້ເອົາໃຈໃສ່ ແລະ ນໍາພາຊີ້ນໍາຢ່າງໃກ້ຊິດ ພ້ອມທັງອໍານວຍຄວາມ ສະດວກທຸກໆເງື່ອນໄຂ.

ຊຸດຝຶກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 45 ວັນໃນຄັ້ງນີ້ ມີຜູ້ເຂົ້າຮ່ວມ ທັງໝົດ 40 ສະຫາຍ, ຍິງ 19 ສະຫາຍ, ໂດຍປະຕິບັດຕາມຫລັກສູດ ຂອງສະຖາບັນການເມືອງ ແລະ ການປົກຄອງແຫ່ງຊາດວາງອອກ ແມ່ນຈະໄດ້ດໍາເນີນ ລະຫວ່າງວວັນທີ 9 ສິງຫາ ຫາ ວັນທີ 7 ມັງກອນ 2022 , ເຊຶ່ງປະກອບມີພາກວິຊາຮຽນທັງໝົດ 5 ພາກຄື: ພາກວິຊາປັດຊະຍາ, ພາກວິຊາເສດຖະສາດ-ການເມືອງ, ລັດທິສັງຄົມນິຍົມວິທະຍາສາດ, ພາກວິຊາບໍລິຫານສາດ ແລະ ພາກວິຊາກໍ່ສ້າງພັກ ນອກຈາກຄົ້ນຄວ້າຮໍ່າຮຽນແລ້ວ ບັນດາສໍາມະນາກອນຍັງຈະໄດ້ລົງທັດສະນະສຶກສາຕົວຈິງຕາມເງື່ອນໄຂທີ່ເປັນໄປໄດ້ຕື່ມອີກ.