ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

   ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ

ກະຊວງ ຖວທ ປະກາດພະນັກງານການນໍາຂັ້ນສູງອອກພັກການ-ຮັບອຸດໜູນບໍານານ

ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງ ທ່ຽວ (ຖວທ) ຈັດພິທີປະກາດພະນັກງານການນໍາຂັ້ນສູງອອກພັກການ-ຮັບອຸດໜູນບໍານານ ໃນຕອນເຊົ້າວັນທີ 10 ມິຖຸນາ 2021 ທີ່ຫໍວັດທະນະທໍາແຫ່ງຊາດ, ນະຄອນ ຫລວງວຽງຈັນ ໂດຍມີ ທ່ານ ນາງ ສວນສະຫວັນ ວິຍະເກດ, ກໍາມະການສູນກາງພັກ, ລັດຖະມົນຕີກະຊວງ ຖວທ, ພ້ອມດ້ວຍຕາງໜ້າຈາກບັນດາກົມອ້ອມຂ້າງກະຊວງ ຖວທ ເຂົ້າຮ່ວມ.
ໃນພິທີ ທ່ານ ສີອຳພອນ ຈັນລາຕີ ຕາງໜ້າຈາກຄະນະຈັດຕັ້ງສູນກາງພັກ ໄດ້ຂຶ້ນຜ່ານສອງດຳລັດຂອງນາຍົກລັດ ຖະມົນຕີ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງອອກພັກການ-ຮັບອຸດໜູນບໍານານ ຄື: ດຳລັດສະບັບເລກທີ 260, ລົງວັນ ທີ 1 ເມສາ 2021 ອະນຸມັດໃຫ້ ທ່ານ ບົວເງິນ ຊາພູວົງ, ຮອງລັດຖະມົນຕີກະຊວງ ຖວທ ອອກພັກການ-ຮັບອຸດໜູນບໍານານ ແລະ ດຳລັດສະບັບເລກທີ 300, ລົງວັນທີ 26 ເມສາ 2021 ອະນຸມັດໃຫ້ ທ່ານ ສະ ຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖວທ ອອກພັກການ-ຮັບອຸດໜູນບໍານານ. ຫລັງຈາກນັ້ນ ທ່ານ ລືໄຊ ສິນທະວົງ, ຮອງຫົວໜ້າກົມຈັດຕັ້ງ, ກະຊວງ ຖວທ ໄດ້ຂຶ້ນຜ່ານດຳລັດຂອງນາຍົກລັດ ຖະມົນຕີ ສະບັບເລກທີ 309, ລົງວັນທີ 11 ພຶດສະພາ 2021 ອະນຸມັດໃຫ້ ທ່ານ ທອງໃບ ໂພທິສານ, ຫົວໜ້າກົມມໍລະດົກ ອອກພັກການ-ຮັບອຸດໜູນບໍານານ.
ໃນໂອກາດນີ້ ທ່ານ ນາງ ສວນສະຫວັນ ວິຍະເກດ, ກໍາມະການສູນກາງພັກ, ລັດຖະມົນຕີກະຊວງ ຖວທ ໄດ້ໃຫ້ກຽດໂອລົມ. ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ທັງ 3 ທ່ານ ທີ່ອອກພັກການ-ຮັບອຸດໜູນບໍານານໃນຄັ້ງນີ້ ເຊີ່ງເວົ້າໄດ້ວ່າເປັນຮຸ່ນບຸກເບີກໃນວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວໃນໄລຍະໃໝ່ຂອງລາວເຮົາ, ພວກທ່ານດັ່ງກ່າວ ໄດ້ເອົາໃຈໃສ່ປະຕິບັດໜ້າທີ່ຂອງຕົນຕາມທີ່ພັກ ແລະ ລັດຖະບານມອບໝາຍໃຫ້ຢ່າງໄດ້ຮັບຜົນ ສຳເລັດ ແລະ ປະກອບສ່ວນສໍາຄັນເຮັດໃຫ້ວຽກງານຖະ ແຫລງຂ່າວ, ວັດທະນະທຳ ແລະ ທ່ອງທ່ຽວຂອງລາວ ໄດ້ຮັບການພັດທະ ນານັບມື້ເຕີບໃຫຍ່ຂະຫຍາຍຕົວຢ່າງຕໍ່ ເນື່ອງ ເຊີ່ງກາຍເປັນບົດຮຽນສຳຄັນໃຫ້ແກ່ຄົນຮຸ່ນໃໝ່ໄດ້ສືບທອດ ແລະ ຮໍ່າຮຽນເອົາເປັນແບບຢ່າງ.
ທ່ານ ນາງ ສວນສະຫວັນ ວິຍະເກດ ກ່າວຕື່ມວ່າ: ໃນ 5 ປີ ຕໍ່ໜ້າ ກະຊວງຖະ ແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ວາງຫລາຍຄາດໝາຍຕ້ອງບັນລຸໃຫ້. ສະນັ້ນ ຮຽກຮ້ອງໃຫ້ຄະນະພັກ-ຄະນະນຳກະຊວງທຸກຂັ້ນ ຕ້ອງສືບຕໍ່ເອົາໃຈໃສ່ປະຕິ ບັດວຽກງານຂອງຕົນໃຫ້ດີຂຶ້ນກວ່າເກົ່າ, ວຽກງານໃດທີ່ສາມາດປະຕິບັດໄດ້ໃຫ້ຮີບ ຮ້ອນຈັດ ຕັ້ງປະຕິບັດນັບແຕ່ນີ້ເປັນຕົ້ນໄປ, ສິ່ງໄດ້ທີ່ພົວພັນເຖີງຫລາຍພາກສ່ວນຕ້ອງໄດ້ຄົ້ນຄ້ວາ, ວິເຄາະ ແລະ ວິໄຈຢ່າງລະອຽດ ເພາະຖ້າຈະລໍຖ້າໃຫ້ພະຍາດໂຄວິດ-19 ຢຸດຕິການລະບາດແມ່ນເປັນໄປໄດ້ຍາກ. ຢ່າງໃດກໍຕາມ ເພື່ອບັນ ລຸຄາດ ໝາຍທີ່ວາງໄວ້ ຄະນະພັກ-ຄະນະນຳກະຊວງ ມີຄວາມຈຳເປັນຕ້ອງໄດ້ຖອດຖອນບົດ ຮຽນ ແລະ ສືບຕໍ່ຂໍຄຳແນະນຳຕ່າງໆ ຈາກທັງ 3 ທ່ານໄດ້ອອກພັກການ-ຮັບອຸດໜູນບໍານານໃນຄັ້ງນີ້ ເພື່ອແນໃສ່ເຮັດໃຫ້ການປະຕິບັດທຸກວຽກງານໄດ້ຮັບຜົນສຳເລັດຕາມທີ່ວາງໄວ້.
ຂ່າວ: ບຸນຕຽງ ຈັນທະວົງ
ພາບ: ຢຸພິນ
May be an image of 5 people, people standing and indoor