ໃນການດໍາເນີນກອງປະຊຸມສະໄໝສະມັນເທື່ອທີ 7 ຂອງສະພາແຫ່ງຊາດ ຊຸດທີ IX ຕອນເຊົ້າວັນທີ 25 ມິຖຸນາ 2014 ພາຍໃຕ້ການເປັນປະທານຂອງ ທ່ານ ສຸວອນ ເລືອງບຸນມີ ຮອງປະທານສະພາແຫ່ງຊາດ, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວວັດທະນະທໍາ ແລະທ່ອງທ່ຽວ (ຖວທ) ໄດ້ສະເໜີຮ່າງກົດໝາຍວ່າດ້ວຍການທ່ອງທ່ຽວ ສະບັບປັບປຸງ ເພື່ອໃຫ້ສະມາຊິກສະພາແຫ່ງຊາດ ຄົ້ນຄວ້າປະກອບຄໍາເຫັນ.
ຮ່າງກົດໝາຍດັ່ງກ່າວ ປະກອບມີ 12 ພາກ ເທົ່າກັບສະບັບເດີມ ປີ 2013 ເຊິ່ງໃນນັ້ນໄດ້ຕັດອອກພາກທີ 9 ກ່ຽວກັບການແກ້ໄຂຂໍ້ຂັດແຍ່ງອອກ ແລະຄັດເອົາໝວດກອງທຶນການທ່ອງທ່ຽວອອກມາເປັນພາກ ລວມເປັນ 12 ພາກເທົ່າເດີມ , ໂຄງປະກອບຂອງໝວດ ມີທັງໝົດ 22 ໝວດ ເພີ່ມຈາກເດີມ 2 ໝວດ, ໂຄງປະກອບມາດຕາດຕາ ມີທັງໝົດ 130 ມາດຕາ ເພີ່ມຈາກເດີມ 27 ມາດຕາ, ໃນນັ້ນພາກທີ 1 ບົດບັນຍັດທົ່ວໄປ ປະກອບມີ 8 ມາດຕາ ໄດ້ປັບປຸງຄືນທັງໝົດ 8 ມາດຕາ, ພາກທີ 2 ຊັບພະຍາກອນການທ່ອງທ່ຽວ ປະກອບມີ 3 ໝວດ 17 ມາດຕາ, ໃນນັ້ນປັບປຸງຄືນໃໝ່ 4 ມາດຕາ ເພີ່ມເຂົ້າອີກ 9 ມາດຕາ, ພາກທີສາມ ວ່າດ້ວຍກິດຈະການທ່ອງທ່ຽວ ປະກອບມີ 12 ໝວດ 55 ມາດຕາ , ປັບປຸງຄືນ 31 ມາດຕາ, ແລະເພີ່ມໃໝ່ 17 ມາດຕາ, ພາກທີ 4 ວ່າດ້ວຍນັກທ່ອງທ່ຽວ ແລະການເຂົ້າອອກ ສປປ ລາວ ປະກອບມີ 2 ໝວດ, 9 ມາດຕາ ໃນນັ້ນປັບປຸງຄືນ 6 ມາດຕາ ແລະເພີ່ມໃໝ່ 1 ມາດຕາ. ພາກທີ 5 ວ່າດ້ວຍການພັດທະນາການທ່ອງທ່ຽວ ປະກອບມີ 3 ໝວດ 8 ມາດຕາ ໃນນັ້ນປັບປຸງຄືນ 4 ມາດຕາ ແລະເພີ່ມໃໝ່ 1 ມາດຕາ, ພາກທີ 6 ວ່າດ້ວຍກອງທຶນການທ່ອງທ່ຽວ ປະກອບມີ 3 ມາດຕາ ເຊິ່ງໄດ້ປັບປຸງທັງໝົດ ທັງ 3 ມາດຕາ, ພາກທີ 7 ປະກອບມີ 2 ມາດຕາ.
ທ່ານ ນາງ ສວນສະຫວັນ ວິຍະເກດ ກ່າວວ່າ: ຈາກການປັບປຸງກົດໝາຍວ່າດ້ວຍການທ່ອງທ່ຽວ ຈະເປັນເຄື່ອງມື ແລະ ບ່ອນອີງ ໃຫ້ແກ່ການຈັດຕັ້ງ ແລະ ການເຄື່ອນໄຫວ ຂອງວຽກງານການທ່ອງທ່ຽວ ມີຄວາມທັນສະໄໝ, ການຄຸ້ມຄອງລັດ-ຄຸ້ມຄອງສັງຄົມ ມີຄວາມຄ່ອງຕົວ, ແທດເໝາະ ແລະ ສອດຄ່ອງກັບການຂະຫຍາຍຕົວຂອງ ເສດຖະກິດ; ຈະເປັນການອໍານວຍຄວາມສະດວກໃຫ້ແກ່ການລົງທຶນ, ການພັດທະນາ, ການຄຸ້ມຄອງ, ການຊຸກຍູ້ສົ່ງເສີມກິດຈະການ ການທ່ອງທ່ຽວ ລວມທັງການແກ້ໄຂບັນຫາຕ່າງໆ ໃຫ້ມີຄວາມສະດວກ ວ່ອງໄວ ແລະ ໂປ່ງໃສຍິ່ງຂຶ້ນ; ພາກລັດ ແລະ ພາກທຸລະກິດ ມີໂອກາດໃນການເຂົ້າຮ່ວມແຂ່ງຂັນດ້ານການທ່ອງທ່ຽວ, ການຄ້າ, ການລົງທຶນ, ສ້າງຄວາມເຊື່ອໝັ້ນ, ດຶງດູດເອົານັກນັກລົງທຶນ ແລະ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ຫຼາຍຂຶ້ນ; ຈະເຮັດໃຫ້ການເຄື່ອນໄຫວວຽກງານທ່ອງທ່ຽວ ຢູ່ຂັ້ນສູນກາງ ແລະ ທ້ອງຖິ່ນ, ລະຫວ່າງພາກລັດ ແລະ ພາກທຸລະກິດ ມີຄວາມເປັນເອກະພາບໃນທາງປະຕິບັດ.
