ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບ ສູນວັດທະນະທຳ ສສ ຫວຽດນາມ ປະຈຳລາວ ໄດ້ຈັດສະແດງລະຄອນເວທີເລື່ອງຈົດໝາຍສະບັບທີ 72 ນຳສະແດງໂດຍ ນັກສະແດງຈາກ ສສ ຫວຽດນາມ ໄດ້ຈັດຂຶ້ນວັນທີ 4 ເມສາ 2024 ທີ່ ຫໍວັດທະນະທຳແຫ່ງຊາດ ເປັນກຽດເຂົ້າຮ່ວມຮັບຊົມຂອງ ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທ່ານ ວັນສີ ກົວມົວ ຮອງລັດຖະມົນຕີກະຊວງ ຖວທ ພ້ອມດ້ວຍ ທ່ານຫົວໜ້າສູນວັດທະນະທຳ ສສ ຫວຽດນາມ ປະຈຳລາວ ແລະ ແຂກທີ່ຖືກເຊີນເຂົ້າຮ່ວມ.
ລະຄອນເວທີເລື່ອງ ຈົດໝາຍສະບັບທີ 72 ຍົກໃຫ້ເຫັນຄວາມເຊື່ອໝັ້ນ ສັດທາຂອງປະຊາຊົນ ຕໍ່ອຸດົມການ ກໍຄື ແນວຄິດໂຮ່ຈີມິນ ກ່ຽວກັບໜ້າທີ່ຂອງບັນດາຂະແໜງການທີ່ປົກປ້ອງກົດໝາຍ ທັງໄດ້ສະແດງເຖິງການຍ້ອງຍໍສັນລະ ເສີນປະທານໂຮ່ຈີມີນ ເຊິ່ງເປັນຜູ້ນຳທີ່ຍິ່ງໃຫຍ່ທີ່ໄດ້ໃກ້ຊິດປະຊາຊົນ ລະຄອນເວທີເລື່ອງນີ້ແມ່ນໜຶ່ງໃນຜົນງານທີ່ໄດ້ຮັບຄວາມປະທັບໃຈຈາກຜູ້ຊົມ ບົດລະຄອນນີ້ສາມາດຍາດໄດ້ລາງວັນອັນຊົງກຽດທີ່ໂຮງລະຄອນສາກົນທີ່ຈັດຂຶ້ນຢູ່ນະຄອນຮ່າໂນຍ ສສ ຫວຽດນາມ ໃນປີ 2022 ພ້ອມກັບລາງວັນນັກສິລະປະທີ່ປະກອບຄຸນງາມຄວາມດີ ໃນເດືອນທັນວາ 2023 ລະຄອນເວທີເລື່ອງດັ່ງກ່າວໄດ້ມີໂອກາດໄປສະແດງໃນງານມະໂຫລານຈີນ-ອາຊຽນຄັ້ງທີ 10 ຈັດຂຶ້ນຢູ່ ສປຈີນ ໄດ້ຮັບລາງວັນຊະນະເລີດລະຄອນດີເດັ່ນ ແລະ ໄດ້ຮັບລາງວັນນັກສິລະປະດີເດັ່ນ.
ສຳລັບລະຄອນເລື່ອງ ຈົດໝາຍສະບັບທີ 72 ແມ່ນສ້າງຈາກເອກະສານຂໍ້ມູນຈິງ ທະນາຍຄວາມຫງຽນຈ໋ອງຕີ່ ເປັນຜູ້ພິພາກສາປະຊາຊົນສູງສຸດໂດຍເພີ່ນໄດ້ແກ້ໄຂຫຼາຍບັນຫາກ່ຽວກັບຄະດີທີ່ບໍ່ຍຸຕິທຳຖືກກວ່າຫາ ໃນນັ້ນມີຄະດີໜຶ່ງທີ່ຜິດພາດ ຄື: ຄະດີຂອງ ທ້າວ ໂດ້ວັນໂຈຍ ສະມາຊິກພັກ ທັງເປັນພະນັກງານພື້ນຖານ ທີ່ຖືກຕັດອິດສະຫຼະພາບຈຳຄຸກ 8 ປີ ໃນໂທດຂ້າຄົນຕາຍ ຂໍ້ຫາຄະດີແມ່ນເປັນຜູ້ວາງແຜນຂ້າຄົນຕາຍ ເຖິງມີຄວາມຫວັງພຽງເລັກນ້ອຍ ແຕ່ໄລຍະ 8 ປີທີ່ຢູ່ຄ້າຍຂຸມຂັງດັດສ້າງ ໂດວັນໂຈຍ ບໍ່ເຄີຍລົດລະຄວາມພະຍາຍາມໃນການຂຽນໃບຄຳຮ້ອງອຸທອນຂໍຄວາມເປັນທຳສົ່ງເຖິງລຸງໂຮ່ຈີມີນ ເຖິງ 72 ສະບັບ ຈາກນັ້ນ ປະທານໂຮ່ຈີມິນ ຈຶ່ງໄດ້ສັ່ງໃຫ້ເອົາໃຈໃສ່ແກ້ໄຂວຽກນີ້ໃຫ້ໄວ ຈາກນັ້ນຄະດີທີ່ຜິດພາດ ຖືກກ່າວຫາຂອງ ທ້າວ ໂດວັນໂຈຍ ກໍໄດ້ຮັບການພິສູດຄວາມບໍລິສຸດຂອງຕົນໄດ້ສຳເລັດ.