ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ(ຖວທ) ໄດ້ຈັດຕັ້ງເຜີຍແຜ່, ເຊື່ອມຊຶມ, ຄຳສັ່ງ, ຄໍາແນະນໍາ ວ່າດ້ວຍການກະກຽມປະຊຸມໃຫຍ່ 3 ຂັ້ນ ຂອງພັກ ແລະ ເອກະສານສຳ ຄັນອື່ນໆ ຂຶ້ນໃນວັນທີ 25 ທັນວາ 2023 ໂດຍການເປັນປະທານຂອງສະຫາຍ ນາງ ສວນສະຫວັນ ວິຍະເກດ ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ມີບັນດາສະຫາຍ ຄະນະພັກ, ຄະນະນຳ, ເລຂາ ແລະ ຮອງເລຂາໜ່ວຍພັກ, ພ້ອມດ້ວຍສະມາຊິກພັກພາຍໃນກະຊວງ ເຂົ້າຮ່ວມ.
ໃນໂອກາດນີ້, ສະຫາຍ ນາງ ສວນສະຫວັນ ວິຍະເກດ ໄດ້ຍົກໃຫ້ເຫັນເຖິງເນື້ອໃນສຳຄັນຂອງເອກະສານຄຳສັ່ງ ຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ, ຄຳແນະນຳ ຄະນະຈັດຕັ້ງສູນກາງພັກ, ການຈັດຕັ້ງປະຕິບັດຄໍາສັ່ງ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ, ເອກະສານ ຄຳແນະນໍາ ຄະນະກວດກາສູນກາງພັກ ກ່ຽວກັບການກະກຽມ ແລະ ດໍາເນີນຊີວິດການເມືອງທ້າຍສະໄໝ ກອງປະຊຸມໃຫຍ່ 3 ຂັ້ນຂອງພັກ, ຮັບຟັງການເຜີຍແຜ່ເອກະສານມະຕິ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝ 11 ເພື່ອເຮັດໃຫ້ຄະນະພັກ, ສະມາຊິກພັກ-ພະນັກງານພາຍໃນກະຊວງ ເຂົ້າໃຈຄວາມໝາຍ, ຄວາມສໍາຄັນ ແລະ ກໍາແໜ້ນເນື້ອໃນຈິດໃຈ ຂອງການດໍາເນີນກອງປະຊຸມໃຫຍ່ 3 ຂັ້ນ ຂອງພັກປະຊາຊົນປະຕິວັດລາວ. ພ້ອມນີ້, ສະຫາຍ ນາງ ສວນສະຫວັນ ວິຍະເກດ ຍັງເນັ້ນໜັກເຖິງຄວາມສໍາຄັນ ຂອງການດໍາເນີນກອງປະຊຸມດັ່ງກ່າວ ເຊິ່ງແມ່ນການຄັດເລືອກ ເອົາຜູ້ນໍາພາທີ່ມີຄວາມຮູ້, ຄວາມສາມາດ, ມີທັດສະນະຮັບໃຊ້ຊາດ, ຮັບໃຊ້ປະຊາຊົນ ເຂົ້າໃນຄະນະພັກແຕ່ລະຂັ້ນ ທັງເປັນການບຸກທະລຸສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ໃນວຽກງານພະນັກງານໃນໄລຍະໃໝ່ ແລະ ສ້າງຄວາມເຊື່ອໝັ້ນ ຂອງພະນັກງານ-ສະມາຊິກພັກ ກໍຄື ມະຫາຊົນ ຕໍ່ການນໍາພາ ຂອງຄະນະພັກແຕ່ລະຂັ້ນ.
ໃນວາລະການປະຊຸມຂອງພາກບ່າຍ, ຜູ້ເຂົ້າຮ່ວມກໍໄດ້ຮັບຟັງການຫວນຄືນມູນເຊື້ອວັນຊາດທີ 2 ທັນ ວາ ຄົບຮອບ 48 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 103 ປີ ເພື່ອໂຄສະນາ, ສຶກສາອົບຮົມໃຫ້ແກ່ສະມາຊິກພັກ-ພະນັກງານ ໃນທົ່ວກະຊວງມີຄວາມຮັບຮູ້, ເຂົ້າໃຈ ແລະ ມີຄວາມເອກອ້າງທະນົງໃຈ ຕໍ່ມູນເຊື້ອປະຫວັດສາດ, ຜົນງານການສ້າງສາພັດທະນາປະເທດຊາດກໍຄື ຜົນງານ ແລະ ຄຸນ ງາມຄວາມດີອັນໃຫຍ່ຫລວງຂອງປະທານ ໄກສອນ ພົມວິຫານ ທີ່ມີຕໍ່ປະເທດຊາດ ແລະ ການປະຕິ ວັດ, ເສີມຂະຫຍາຍມູນເຊື້ອແຫ່ງຄວາມສາມັກຄີ ເປັນປຶກແຜ່ນແໜ້ນໜາຂອງບັນດາຊົນເຜົ່າ, ຊັ້ນຄົນ, ເພດ, ໄວເພື່ອຮໍ່າຮຽນເອົາຄຸນສົມບັດສິນທຳປະຕິວັດ, ຄຸນງາມຄວາມດີ ແລະ ການອຸທິດ ປັນຍາອັນໃຫຍ່ຫລວງຂອງພະນັກງານປະຕິວັດອາວຸໂສ ທີ່ໄດ້ບຸກເບິີກເສັ້ນທາງການປະຕິວັດໃນເມື່ອກ່ອນ ເພື່ອສ້າງຂະບວນການສຶກສາອົບຮົມ ນໍ້າໃຈບຸກບືນຫ້າວຫັນປະຕິບັດ ພາຍໃຕ້ການນຳພາຂອງພັກ ແລະ ຜົນ ສຳເລັດຂອງວຽກງານຕ່າງໆ ທີ່ປະເທດຊາດຍາດມາໄດ້ ແຕ່ອະດີດເຖິງປັດຈຸບັນໃຫ້ເຕັມໄປດ້ວຍ ຄວາມໝາຍ ແລະ ເນື້ອໃນເລິກເຊິ່ງ.
ຂ່າວ: ກິດຕາ
ພາບ:ຂັນໄຊ