ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກະຊວງ ຖວທ ແລະ ບໍລິສັດລາວເພ້ວຽງຈັນ ຮ່ວມມືຫັນວຽກງານ ຖວທ ໃຫ້ເປັນທັນສະໄໝ

ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບ ບໍລິສັດລາວເພ້ວຽງຈັນ ຈຳກັດຜູ້ດຽວ ຈັດຕັ້ງປະຕິບັດໂຄງການປັບປຸງ ແລະ ພັດທະນາລະບົບຖານຂໍ້ມູນ ຂອງວຽກງານ ຖວທ ກໍຄື ຫັນວຽກງານ ຖວທ ໃຫ້ເປັນທັນສະໄໝ ແນໃສ່ຕອບສະໜອງຄວາມຕ້ອງການຂອງວຽກງານ ຖວທ ໃຫ້ມີຄວາມຖືກຕ້ອງ, ວ່ອງໄວ ໃນອະນາຄົດ, ເຊິ່ງພິທີເຊັນບົດບັນທຶກຄວາມເຂົ້າໃຈ (MOU) ກ່ຽວກັບໂຄງການດັ່ງກ່າວ, ໄດ້ຈັດຂຶ້ນໃນວັນທີ 12 ສິງຫາ 2020 ນີ້, ລະຫວ່າງ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ກັບ ທ່ານ ພູໄຊສະນະ ໄຊສົມບັດ ປະທານບໍລິສັດລາວເພ້ວຽງຈັນ ຈຳກັດຜູ້ດຽວ, ໂດຍມີ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍພາກສ່ວນກ່ຽວຂ້ອງ ຂອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ໃນບົດບັນທຶກສະບັບດັ່ງກ່າວ, ບໍລິສັດລາວເພ້ວຽງຈັນ ຈຳກັດຜູ້ດຽວ ຈະໄດ້ສຶກສາ ສຳຫລວດ, ອອກແບບຄວາມເປັນໄປໄດ້ ໃນການສ້າງໂຄງການປັບປຸງ ແລະ ພັດທະນາລະບົບຖານຂໍ້ມູນຂອງວຽກງານ ຖວທ ໃຫ້ສຳເລັດໂດຍໄວ ແລະ ສອດຄ່ອງກັບສະພາບແວດລ້ອມຕົວຈິງ, ຮັບຜິດ ຊອບຄ່າໃຊ້ຈ່າຍທັງໝົດທີ່ເກີດຂຶ້ນໃນການສຶກສາ, ສຳ​ຫລວດ, ອອກແບບລະບົບ ຈົນສາມາດພັດທະນາລະບົບ ແລະ ໃຊ້ງານໄດ້, ປະສານສົມທົບກັບພາກສ່ວນທີ່ກ່ຽວ​ຂ້ອງ ແລະ ເຮັດບົດລາຍງານຄວາມຄືບໜ້າໃຫ້ແກ່ກົມສື່ມວນຊົນ ເປັນແຕ່ລະໄລຍະ ເພື່ອລາຍງານຕໍ່ການນຳກະຊວງ. ສຳລັບກະຊວງ ຖວທ ຈະໄດ້ສ້າງຂໍ້ຕົກລົງ, ແຕ່ງຕັ້ງຄະນະຮັບຜິດຊອບ ແລະ ຜູ້ປະສານງານໃຫ້ແກ່ໂຄງການ, ເປັນຈຸດໃຈກາງໃນການປະສານງານ ກັບທຸກພາກສ່ວນທີ່ກ່ຽວຂ້ອງ ແລະ ອຳນວຍຄວາມສະດວກ ໃນການເຂົ້າເຖິງຂໍ້ມູນຂ່າວສານທີ່ຈຳເປັນ ແລະ ກ່ຽວຂ້ອງກັບການພັດທະນາລະບົບຖານຂໍ້ມູນຂ່າວສານ, ຕິດຕາມກວດກາ ແລະ ຊຸກຍູ້ພາກສ່ວນທີ່ກ່ຽວຂ້ອງ, ໃຫ້ການສະໜັບ​ສະໜູນ ຮ່ວມມືກັບບໍລິສັດ ລາວເພ້ວຽງຈັນ ຈຳກັດຜູ້ດຽວ ແລະ ລາຍງານຄວາມຄືບໜ້າໃຫ້ແກ່ແກນນຳກະຊວງ ເປັນແຕ່ລະໄລຍະ.
ບົດບັນທຶກຄວາມເຂົ້າໃຈສະບັບນີ້, ມີກຳນົດເລີ່ມໃຊ້ໄດ້ແຕ່ວັນທີ 12 ສິງຫາ 2020 ເຖິງວັນທີ 12 ສິງຫາ 2021, ຖ້າການຈັດຕັ້ງປະຕິບັດໂຄງການບໍ່ມີຄວາມຄືບໜ້າ ບົດບັນທຶກສະບັບດັ່ງກ່າວ ຈະຖືກຍົກເລີກໂດຍອັດຕະໂນມັດ.

ຂ່າວ: ທະນູທອງ
ພາບ: ເກດສະໜາ