ການນຳກະຊວງປ້ອງກັນຄວາມສະຫງົບ(ປກສ)ນໍາໂດຍ ພົທ ວິໄລ ຫລ້າຄໍາຟອງ ລັດຖະມົນຕີກະຊວງປ້ອງກັນຄວາມສະຫງົບ ຄະນະລັດຖະມົນຕີ ແລະ ບັນຫາຫົວໜ້າກົມກອງອ້ອມຂ້າງກະຊວງ ປກສ ພ້ອມດ້ວຍນາຍ ແລະ ພົນຕຳຫລວດທົ່ວກຳລັງປ້ອງກັນຄວາມສະຫງົບ ໄດ້ພ້ອມກັນໃຊ້ສິດເລືອກຕັ້ງເອົາສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະພາປະຊາຊົນຂັ້ນແຂວງ (ສສຂ), ນະຄອນຫລວງວຽງຈັນ(ສສນວ) ຊຸດທີ II ໃນວັນທີ 21 ກຸມພາ 2021 ເພື່ອເລືອກເອົາຜູ້ແທນທີ່ດີມີມາດ ຖານເງື່ອນໄຂຄົບຖ້ວນ ແລະ ມີຄວາມຮູ້ຄວາມສາມາດຢ່າງແທ້ຈິງ ເພື່ອເປັນຕົວແທນຂອງປວງຊົນລາວທັງຊາດ ໃນການອອກຄຳຄິດ-ຄໍາເຫັນຢູ່ໃນສະພາ ເພື່ອພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ.
ການປ່ອນບັດເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ, ນະຄອນຫລວງວຽງຈັນ ຊຸດທີ II ຂອງກະຊວງ ປກສ ປະກອບມີ 14 ຈຸດໜ່ວຍປ່ອນບັດຄື: ໜ່ວຍປ່ອນບັດຈຸດຫ້ອງວ່າການກະຊວງ ປກສ ແລະ ກົມໃຫຍ່ສັນຕິບານ-ກົມຄົ້ນຄວ້າວິທະຍາສາດ ແລະ ປະຫວັດສາດ, ຈຸດກົມໃຫຍ່ຕຳຫລວດ, ຈຸດກົມໃຫຍ່ພະລາທິການ, ຈຸດກອງບັນຊາການປ້ອງກັນເຄື່ອນທີ່ໃໝ່, ຈຸດກອງບັນຊາການປ້ອງກັນສູນກາງ, ຈຸດສະໜາມມ້າ (ເຄື່ອນທີ່ເກົ່າ), ກົມ 504, ກົມສື່ສານ, ກົມກວດກາ-ກວດການ ແລະ ກອງບັນຊາການປ້ອງກັນທີ່ຕັ້ງ, ຈຸດໂຮງຮຽນ ວສປ, ຈຸດໂຮງຮຽນ ວຕປ, ເຊິ່ງການປ່ອນບັດເລືອກຕັ້ງຕ້ອງຮັບປະກັນໃຫ້ໄດ້ 3 ຄາດໝາຍຄື: ເຂົ້າຮ່ວມປ່ອນບັດໃຫ້ຄົບ 100%; ບໍ່ໃຫ້ມີບັດຕາຍ 100% ແລະ ຮັກສາໄດ້ຄວາມສະຫງົບ 100%.
ຜ່ານການປ່ອນບັດຕົວຈິງເຫັນວ່າ: ຄະນະພັກ-ຄະນະນຳກະຊວງ ປກສ ໄດ້ຊີ້ນຳ-ນຳພາຢ່າງໃກ້ຊິດຕິດແທດ ແລະ ທົ່ວເຖິງ, ຄະນະກຳມະການເລືອກຕັ້ງ ແລະ ພະ ນັກງານຮັບຜິດຊອບໜ່ວຍປ່ອນບັດແຕ່ລະຈຸດ ມີຄວາມຫ້າວຫັນ, ມີຄວາມຮັບຜິດຊອບສູງຕໍ່ໜ້າທີ່ຂອງຕົນ, ນາຍ ແລະ ພົນຕໍາຫລວດທີ່ມີສິດປ່ອນບັດ ກໍມີຄວາມຕື່ນຕົວມາໃຊ້ສິດຂອງຕົນ ແລະ ມີລະບຽບວິໄນເຂັ້ມງວດ, ສາມາດຮັບປະກັນມີຜູ້ມາໃຊ້ສິດປ່ອນບັດ ເລືອກຕັ້ງເທົ່າກັບ 100% ແລະ ບໍ່ມີບັດຕາຍ100%.
ທ່ານ ພົຈວ ຄຳກິງ ຜຸຍຫລ້າມະນີວົງ ຫົວໜ້າກົມໃຫຍ່ຕຳຫລວດ ໄດ້ໃຫ້ສຳພາດຕໍ່ນັກຂ່າວໜັງສືພິມຄວາມສະຫງົບວ່າ: ຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງທີ່ໄດ້ເຂົ້າຮ່ວມໃນການປ່ອນບັດ ເພາະເປັນເຫດການການເມືອງທີ່ສຳຄັນຂອງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ດຳເນີນໄປໃນຊ່ວງໄລຍະທີ່ຈັດຕັ້ງຜັນຂະຫຍາຍຜົນສຳເລັດຂອງກອງປະຊຸມໃຫຍ່ຜູ້ແທນ ຄັ້ງທີ XI ຂອງພັກປະຊາຊົນ ປະຕິວັດລາວ. ການເລືອກຕັ້ງຄັ້ງນີ້, ເປັນການສືບຕໍ່ປັບປຸງບູລະນະອົງການອຳນາດນິຕິບັນຍັດ, ເຊິ່ງແມ່ນອົງການສູງສຸດໃນການປົກຄອງຂອງລັດ ແລະ ການເລືອກຕັ້ງ ຄັ້ງນີ້ແມ່ນຄວາມຮັບຜິດຊອບຂອງທົ່ວພັກ, ທົ່ວກຳລັງປະກອບອາວຸດ ໃນຖານະທີ່ກຳ ລັງປ້ອງກັນຄວາມສະຫງົບ ມີບົດບາດໃນການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍປອດໄພໃນສັງຄົມ, ກໍາລັງປ້ອງກັນຄວາມສະຫງົບໄດ້ເຮັດໜ້າທີ່ພາລະບົດບາດໃຫ້ແກ່ການປ້ອງກັນໃນການເລືອກຕັ້ງໃນຄັ້ງນີ້.
ທ່ານ ພົຈວ ຄຳກິງ ຜຸຍຫລ້າມະນີວົງ ຍັງກ່າວອີກວ່າ: ໃນຖານະທີ່ເປັນຄະນະຮັບຜິດຊອບອະນຸກໍາມະການປ້ອງກັນນີ້ ກົມໃຫຍ່ຕຳຫລວດ ໄດ້ມີການຈັດຕັ້ງເຊື່ອມຊຶມ ແລະ ມີການກຳນົດແຜນເຄື່ອນໄຫວ, ມີການແບ່ງໜ້າທີ່, ແບ່ງຄວາມຮັບຜິດຊອບໃຫ້ພາກສ່ວນຕ່າງໆ ເຮັດໜ້າທີ່ເຄື່ອນໄຫວປ້ອງກັນຢູ່ຕາມຈຸດຕ່າງໆ ໃນຂອບເຂດທົ່ວປະ ເທດ. ໃນນີ້, ໄດ້ມີການສົມທົບກັບອຳນາດການປົກຄອງຂັ້ນທ້ອງຖິ່ນ ຢູ່ໃນນະຄອນ ຫລວງວຽງຈັນ ກໍຄື ຢູ່ບັນດາແຂວງໃນຂອບເຂດທົ່ວປະເທດ ເຮັດໜ້າທີ່ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນບັ້ນເລືອກຕັ້ງຄັ້ງນີ້ໄດ້ 100%.
ຂ່າວ: ສົມສະໄຫວ ກະຊວງ ປກສ
Loading...