ພິທີທາບທາມຮ່າງດຳລັດ ວ່າດ້ວຍສິນຄ້າໜຶ່ງເມືອງໜຶ່ງຜະລິດຕະພັນ(ສິນຄ້າໂອດ໋ອບ)ໄດ້ຈັດຂຶ້ນໃນວັນທີ 1 ສິງຫານີ້, ທີ່ຫ້ອງປະຊຸມຫ້ອງວ່າການແຂວງບໍລິຄຳໄຊ ໂດຍການເປັນປະທານຮ່ວມຂອງທ່ານ ວິທູນ ສິດທິມໍລະດາ ຫົວໜ້າກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກຳແລະ ການຄ້າ ແລະ ທ່ານ ສົມບູນ ວົງພະຈັນ ຮອງຫົວໜ້າກົມກົດໝາຍ ກະຊວງຍຸຕິທໍາ, ມີບັນດາຫົວໜ້າກົມ, ຮອງກົມ, ຂະແໜງການກ່ຽວຂ້ອງຂັ້ນກະຊວງ, ຫົວໜ້າ-ຮອງຫົວໜ້າພະແນກອຸດສາຫະກຳ ແລະ ການຄ້າແຂວງ ບໍລິຄຳໄຊ, ໄຊສົມບູນ, ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ, ອັດຕະປື ແລະ ນະຄອນຫຼວງວຽງຈັນ ເຂົ້າຮ່ວມ.
ກອງປະຊຸມຄັ້ງນີ້ ເພື່ອກໍານົດຫຼັກການ, ລະບຽບການ, ມາດຕະການ ແລະ ນະໂຍ ບາຍ ກ່ຽວກັບວຽກງານສິນຄ້າ ໜຶ່ງເມືອງໜຶ່ງຜະລິດຕະພັນ ເພຶ່ອເປັນບ່ອນອີງໃຫ້ແກ່ການຈັດຕັ້ງປະຕິບັດ ແລະ ເຮັດໃຫ້ວຽກງານດັ່ງກ່າວ ເຄື່ອນໄຫວມີປະສິດທິພາບ ແລະ ປະສິດທິຜົນ ແນໃສ່ສົ່ງເສີມ, ພັດທະນາສິນຄ້າ ໃຫ້ເຕີບໃຫ່ຍເຂັ້ມແຂງ, ປົກປັກຮັກສາມູນເຊື້ອ, ສີໄມ້ລາຍມື, ຄວາມເປັນເອກະລັກໂດດເດັ່ນຂອງສິນຄ້າ, ປະ ກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ແລະ ທ້ອງຖິ່ນ. ສິນຄ້າໜຶ່ງເມືອງໜຶ່ງຜະລິດຕະພັນ ຈະຕ້ອງສອດຄ່ອງກັບແນວທາງນະໂຍບາຍ ກົດໝາຍ ແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ, ຮັບປະກັນຮັກສາ ແລະ ເສີມຂະຫຍາຍມູນເຊື້ອ, ຄວາມເປັນເອກະລັກ, ສີໄມ້ ລາຍມື, ການປະດິດຄິດແຕ່ງ, ວັດທະນະທຳ ແລະ ຮີດຄອງປະເພນີ ທີ່ດີງາມຂອງຊາດ ຂອງເຜົ່າ, ປະກອບສ່ວນເຂົ້າໃນການສ້າງວຽກເຮັດງານທຳ, ການແກ້ໄຂຄວາມທຸກຍາກ ການພັດທະນາສີມືແຮງງານ ແລະ ຍົກສູງຄຸນນະພາບຊີວິດຂອງປະຊາຊົນ ບົນພື້ນຖານການນຳໃຊ້ພູມປັນຍາທ້ອງຖິ່ນ, ເປີດເຜີຍ ມີຄວາມໂປ່ງໃສ ຍຸຕິທຳ ແລະ ສາມາດກວດສອບໄດ້. ຮ່າງດຳລັດສະບັບນີ້ ມີທັງໝົດ 11 ໝວດ 58 ມາດຕາ.
ໃນໂອກາດດັ່ງກ່າວຜູ້ເຂົ້າຮ່ວມກອງປະຊຸມຍັງໄດ້ພ້ອມກັນຄົ້ນຄວ້າ ແລະ ປະກອບຄໍາເຫັນຢ່າງກົງໄປກົງມາ ເພື່ອເຮັດໃຫ້ຮ່າງດຳລັດສະບັບນີ້ ມີເນື້ອໃນຄົບຖ້ວນສົມ ບູນ, ສອດຄ່ອງຕາມລະບຽບກົດໝາຍ ແລະ ສະພາບຄວາມເປັນຈິງຂອງແຕ່ລະທ້ອງ ຖິ່ນ ແລະ ໃຫ້ສາມາດນຳໄປຈັດຕັ້ງປະຕິບັດຢ່າງເປັນຮູບປະທຳຕົວຈິງ.
(ຂ່າວ: ວຽງສະຫວັນ)
