ທ້າຍເດືອນມີນາ 2024 ຜ່ານມາ, ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງສາລະວັນ ໄດ້ນຳຕົວຊາວໜຸ່ມ 4 ຄົນ ເຊິ່ງອາຍຸຢູ່ລະຫວ່າງ 15 ຫາ 20 ປີ ທີ່ຮ່ວມກັນປຸ້ນເອົາລົດຈັກ ມາດຳເນີນສອບສວນ.
ພວກກ່ຽວສາລະພາບວ່າ: ໄດ້ຮ່ວມກັນເຄື່ອນໄຫວປຸ້ນເອົາລົດຈັກ ຢູ່ຕາມເສັ້ນທາງເລກທີ 20,ເລກທີ 15 A,15B ແລະ ເສັ້ນທາງຮ່ອມ ບໍລິເວນອະນຸສອນສະຖານ ອົງແກ້ວ-ສວນສາທາລະນະ ແລະ ຄັ້ງລ່າສຸດນີ້, ໄດ້ຮ່ວມກັນປຸ້ນເອົາຈັກຂອງຜູ້ເສຍຫາຍ ເປັນຍິງສາວ 3 ຄົນ ຂັບຂີ່ຊ້ອນກັນມາ, ໂດຍໃຊ້ຮູບການຂັບຂີ່ລົດຈັກແນບຂ້າງລົດຈັກເປົ້າໝາຍປຸ້ນ ແລ້ວໃຊ້ຕີນຢັນລົດຈັກຄັນດັ່ງກ່າວ ໃຫ້ເສຍຫຼັກລົ້ມລົງຂ້າງທາງ ແລ້ວກໍໃຊ້ມີດ ແລະງ້າວ ລົງໄປນາບຂູ່ ເຮັດໃຫ້ຜູ້ເສຍຫາຍທັງ 3 ຄົນ ແລ່ນຫລົບໜີ.
ຈາກນັ້ນ, ກໍພາກັນເອົາລົດຈັກທີ່ປຸ້ນມາໄດ້ນັ້ນ ໄປຊຸກເຊື່ອງໄວ້ຢູ່ຖຽງນາ ຢູ່ເຮືອນທ້າວ ປ້ອມ ຢູ່ບ້ານສະໂປນ ເມືອງສາລະວັນ. ນອກຈາກນີ້, ຜ່ານມາ ໄດ້ເອົາລົດຈັກທີ່ປຸ້ນມາອີກຄັນໜຶ່ງ ໄປຂາຍ ຢູ່ທີ່ເມືອງປາກຊ່ອງ ແຂວງຈຳປາສັກ. ສ່ວນລົດຈັກອີກຈຳນວນໜຶ່ງ ທີ່ປຸ້ນມາໄດ້ ແມ່ນເອົາໃຫ້ໝູ່ຈ່າວຂາຍ ເມື່ອໄດ້ເງິນມາ ກໍແບ່ງປັນກັນໃຊ້ຈ່າຍຫຼິ້ນກິນຟຸມເຟືອຍຈົນໝົດ.
ປັດຈຸບັນ, ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງສາລະວັນ ຈະໄດ້ສອບສວນຂະຫຍາຍຜົນໃຫ້ລະອຽດ ເພື່ອຕິດຕາມເກັບກູ້ລົດຈັກທີ່ພວກກ່ຽວປຸ້ນໄປຂາຍ ມາມອບຄືນໃຫ້ເຈົ້າຂອງເດີມແລ້ວ.
Cr: ຄວາມສະຫງົບ Lao Security News
