ໂຄງການກໍ່ສ້າງຂົວເບຕົງຂ້າມເຊຈຳພອນ ຢູ່ເຂດບ້ານນາທົ່ມ ເມືອງອາດສະພອນແຂວງສະຫວັນນະເຂດ ຮອດປັດຈຸບັນ ສໍາເລັດແລ້ວຫຼາຍກວ່າ 84% ພາຍຫຼັງທີ່ເລີ່ມກໍ່ສ້າງມາແຕ່ວັນທີ 25 ທັນວາ 2023 ທີ່ຜ່ານມາ.
ທ່ານ ບຸນໂຈມ ອຸບົນປະເສີດ ໄດ້ລົງຕິດຕາມຄວາມຄືບໜ້າຂອງການກໍ່ສ້າງຂົວດັ່ງກ່າວເມື່ອມໍ່ໆມານີ້ ຊຶ່ງ ທ່ານ ທິບພາວອນ ສີລາຊາ ປະທານບໍລິບັດ ວີແອພີ ພັດທະນາກໍ່ສ້າງ ຈຳກັດຜູ້ດຽວ ເຊິ່ງເປັນບໍລິສັດຮັບເໝົາກໍ່ສ້າງ ໄດ້ລາຍງານໃຫ້ຮູ້ວ່າ: ຂົວດັ່ງກ່າວ ມີຄວາມຍາວທັງໝົດ 100 ແມັດ, ກວ້າງ 5,5 ແມັດ, ໂດຍອອກແບບເປັນຂົວເບຕົງເສີມເຫຼັກພາກສ່ວນລຸ່ມ ແລະພາກສ່ວນເທິງ, ຮູບແບບຂາງຂົວເປັນຮູບໂຕ (I) ເບຕົງອັດແຮງ (Post Tension) ທີ່ໃຊ້ສາຍກາບອັດແຮງດ້ວຍລະບົບໄຮໂດລິກ, ລວງຍາວຂາງຂົວແມ່ນ 25,6 ແມັດ, ມີຈຳນວນ 3 ຊ່ວງຕໍ່ຂາງຂົວ, ມີ 4 ຊ່ອງຫວ່າງນ້ຳໄຫຼ (04 Span) ໃນມູນຄ່າການກໍ່ສ້າງເກືອບ 20 ຕື້ກີບ, ເຊິ່ງໄດ້ເລີ່ມການກໍ່ສ້າງມາແຕ່ ວັນທີ 25 ທັນວາ 2023 ມາຮອດເດືອນພຶດສະພາ 2024 ແມ່ນສາມາດປະຕິບັດໜ້າວຽກໄດ້ແລ້ວ 84,6%, ຄາດວ່າຈະໃຫ້ສຳເລັດໃນໄວໆນີ້.
ຂົວດັ່ງກ່າວນີ້ ແມ່ນນອນຢູ່ໃນເສັ້ນທາງຫຼັກຂອງເມືອງອາດສະພອນ ລະຫວ່າງບ້ານນາທົ່ມ ຫາຈຸດສຸມນາເລົ່າ ແລະເປັນຂົວ-ທາງ ທີ່ສາມາດເຊື່ອມຕໍ່ໄປຫາຫຼາຍບ້ານ ທີ່ຢູ່ຟາກເຊເບື້ອງນັ້ນ ເປັນຕົ້ນ: ບ້ານນາທົ່ມ, ນາກະປົງ, ນາເລົ່າ, ນາຂາມ, ວຽງໄຊ, ຈອມຮາດ, ດົງຂັນຄຳ, ຫ້ວຍງົວ, ສິງສະຫວ່າງ, ຫ້ວຍເດື່ອ, ສີນົນໄຊ ແລະ ບ້ານເດີ່ນປ້ອມ. ປະຈຸບັນ ການສັນຈອນໄປມາຍັງບໍ່ສະດວກ ເພາະຍັງບໍ່ທັນມີຂົວຂ້າມເຊ ແລະ ໃນລະດູຝົນແມ່ນບໍ່ສາມາດສັນຈອນໄປມາໄດ້.
ທີ່ມາ: ສະຫວັນພັດທະນາ
