ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ອານຸຊາດ ຄັນທະເພັງໄຊ ຮອງຫົວໜ້າຫ້ອງການຈັດຕັ້ງປະຕິບັດໂຄງການພັດທະນາຕົວເມືອງທ່າແຂກ (GMS4) ແຂວງຄຳມ່ວນ ໄດ້ໃຫ້ສໍາພາດຜ່ານສື່ມວນຊົນແຂວງໃນອາທິດຜ່ານມານີ້ ກ່ຽວກັບການຈັດຕັ້ງປະຕິບັດໂຄງການກໍ່ສ້າງຄອງລະບາຍນໍ້າ ຕົວເມືອງທ່າແຂກວ່າ: ປັດຈຸບັນໂຄງການດັ່ງກ່າວມີຄວາມຄືບໜ້າ 74,66% ໂດຍເລີ່ມລົງມືກໍ່ສ້າງແຕ່ທ້າຍປີ 2022 ປະກອບມີ 5 ຮ່ອງ, ມີຄວາມຍາວປະມານ 10,432 ແມັດ, ຮັບເໜົາໂດຍບໍລິສັດ ແສງມີໄຊກໍ່ສ້າງຄົບວົງຈອນໃນມູນຄ່າສັນຍາ 4 ລ້ານກວ່າໂດລາ ໄລຍະເວລາກໍ່ສ້າງ 24 ເດືອນ ຄາດວ່າຈະໃຫ້ສຳເລັດໃນທ້າຍປີ 2024 ນີ້.
ໂຄງການພັດທະນາຕົວເມືອງ ຕາມແລວທາງອານຸພາກພື້ນແມ່ນໍ້າຂອງ 4 ຫຼື GMS4 ແມ່ນໄດ້ຮັບທຶນຊ່ວຍ ເຫຼືອຈາກທະນາຄານພັດທະນາອາຊີມີມູນຄ່າປະມານ 54,6 ລ້ານໂດລາ, ໃນນີ້, ລັດຖະບານລາວປະກອບສ່ວນ 6,06 ລ້ານໂດລາ ທຶນດັ່ງກ່າວໄດ້ນໍາໃນເຂົ້າໃນການປັບປຸງບູລະນະພື້ນຖານໂຄງລ່າງ ສິ່ງແວດລ້ອມຕົວເມືອງ ໂດຍສະເພາະ 2 ເມືອງຄື: ເມືອງທ່າແຂກ ແຂວງຄໍາມ່ວນ ແລະ ເມືອງປາກຊັນ ແຂວງບໍລິຄໍາໄຊ, ສໍາລັບຕົວເມືອງທ່າແຂກໄດ້ຮັບທຶນປະມານ 21 ລ້ານໂດລາ ປະກອບມີ 5 ກິດຈະກໍາ, ປັດຈຸບັນແຂວງຄໍາມ່ວນກໍຄືຕົວເມືອງທ່າແຂກກໍາລັງຈັດຕັ້ງປະຕິບັດຢູ່ 3 ໂຄງການຄື: ໂຄງການກໍ່ສ້າງສະໜາມຂີ້ເຫຍື້ອ, ໂຄງການກໍ່ສ້າງອ່າງ ບໍາບັດນໍ້າເປື້ອນແບບບໍ່ລວມສູນ ແລະ ໂຄງການກໍ່ສ້າງຄອງລະບາຍນໍ້າຕົວເມືອງທ່າແຂກ.
ທ່ານ ອານຸຊາດ ຄັນທະເພັງໄຊ ໄດ້ຍົກໃຫ້ເຫັນຂໍ້ສະດວກ ແລະ ຫຍຸ້ງຍາກໃນການຈັດຕັ້ງປະຕິບັດໂຄງ ການວ່າ: ທາງໂຄງການໄດ້ຮັບການຊີ້ນໍາ-ນໍາພາຢ່າງໃກ້ສິດຈາກການນໍາກະຊວງທີ່ກ່ຽວຂ້ອງ, ການນໍາແຂວງ ສ່ວນດ້ານຂໍ້ຫຍຸ້ງຍາກແມ່ນໄລຍະເວລາການກໍ່ສ້າງຢູ່ໃນຊ່ວງລະດູຝົນ ແລະ ບັນຫາການຂາດແຄນແຮງງານ ເຮັດໃຫ້ການກໍ່ສ້າງຊັກຊ້າ.
ຂ່າວ: ມະນີວັນ