ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຫວ່າງບໍ່ດົນມານີ້, ການກໍ່ສ້າງ ສະຖານີຫຼວງພະບາງເຊິ່ງຮັບເໝົາກໍ່ສ້າງໂດຍ ກຸ່ມບໍລິສັດກໍ່ສ້າງທາງລົດໄຟ ສປ ຈີນ ໄດ້ສໍາເລັດການກໍ່ສ້າງເປັນທີ່ຮຽບຮ້ອຍແລ້ວ, ການຕົບແຕ່ງສະຖານີຫຼວງພະບາງມີລັກສະນະໂດດເດັ່ນທາງດ້ານວັດທະນະທໍາ ທີ່ປະສົມປະສານກັບແບບຕົ້ນໂພວັດຊຽງທອງ ແລະລວດລາຍດອກບົວຈາກຫໍພິພິທະພັນພະລາດຊະວັງແລະຈາກບ່ອນອື່ນໆ ທັງຍັງເປັນເຄື່ອງໝາຍໃນການສໍາເລັດອາຄານສະຖານີ 10 ແຫ່ງຂອງເສັ້ນທາງລົດໄຟລາວຈີນຊ່ວງບໍ່ເຕັນ-ນະຄອນຫຼວງວຽງຈັນ ແລະໄດ້ເປັນພື້ນຖານອັນໜັກແໜ້ນໃຫ້ແກ່ການເປີດນຳໃຊ້ທາງລົດໄຟ ລາວ-ຈີນທີ່ມີຄຸນນະພາບສູງ.
ສະຖານີດັ່ງກ່າວຕັ້ງຢູ່ເມືອງມໍລະດົກໂລກ ເປັນເມືອງທີ່ມີຊື່ສຽງທາງດ້ານວັດທະນະທໍາ ແລະ ສະຖານທີ່ທ່ອງທ່ຽວທີ່ຂຶ້ນຊື່ຂອງປະເທດລາວ ເຊິ່ງເອີ້ນຂານວ່າ ເມືອງຫຼວງພະບາງ ”ນະຄອນຫຼວງບູຮານພັນປີ”, ສະຖານີນີ້ມີເນື້ອທີ່ກໍ່ສ້າງຢູ່ທີ່ 7.970 ຕາແມັດ ແລະມີຂະໜາດໃຫຍ່ຮອງລົງມາຈາກສະຖານີນະຄອນຫຼວງວຽງຈັນ ໃນນັ້ນໄດ້ຕິດຕັ້ງເປັນ 2 ບ່ອນຂຶ້ນລົງລົດ ແລະ 4 ເສັ້ນທາງລົດໄຟ ເຊິ່ງຈະເປີດເປັນບ່ອນຂົນສົ່ງໂດຍສານ ແລະຂົນສົ່ງສິນຄ້າ.
ຫຼັງຄາຂອງອາຄານສະຖານີມີໂຄງສ້າງແບບ “ສາມລວງຕັ້ງໜຶ່ງລວງຂວາງ” ເຊິ່ງມີຄວາມໂຄ້ງຫຼາຍ ແລະປະສົມປະສານກັບຫຼັງຄາແບບຊົງຈົ່ວ ເຊິ່ງໂຄງສ້າງເຫຼັກນັ້ນມີຫຼາຍເຖິງ 5 ຊັ້ນ ແລະໃຊ້ວັດສະດຸຫຼາຍກວ່າ 500 ຊະນິດ, ມີຫຼາຍຂັ້ນຕອນການປະກອບແລະຕິດຕັ້ງ ຖືໄດ້ວ່າມີຄວາມຫຍຸ້ງຍາກໃນການກໍ່ສ້າງເປັນອັນດັບຕົ້ນໆ ແລະຕໍ່ກັບບັນຫາດັ່ງກ່າວທາງໂຄງການຈຶ່ງໄດ້ສ້າງແຜນງານພິເສດຂຶ້ນ ໄດ້ນໍາໃຊ້ເຕັກໂນໂລຊີ BIM ຈໍາລອງແບບກໍ່ສ້າງ ເພື່ອປັບຈຸດເຊື່ອມຕໍ່ລະຫວ່າງໂຄງເຫຼັກກັບໂຄງເບຕົງ ສາມາດຊ່ວຍໃນການກໍ່ສ້າງໃຫ້ມີປະສິດທິພາບສູງ ເຊິ່ງໃຊ້ເວລາ 161 ວັນ ໃນທີ່ສຸດກໍ່ສໍາລັດການກໍ່ສ້າງຂອງພາກສ່ວນຫຼັງຄາ.
ປັດຈຸບັນນີ້ທາງລົດໄຟລາວ-ຈີນໄດ້ສໍາເລັດການກໍ່ສ້າງ ແລະ ກວດຮັບເປັນທີ່ຮຽບຮ້ອຍແລ້ວ ເຊິ່ງຈະເປີດການນໍາໃຊ້ໃນເດືອນທັນວາຂອງປີນີ້.