ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ການກໍ່ສ້າງສະຖານີວິທະຍຸ-ໂທລະພາບ ແຂວງໄຊສົມບູນ ສໍາເລັດແລ້ວ 50%

ວັນທີ 7 ກໍລະກົດ 2020 ທ່ານ ສະຫວັນຄອນ ຣາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ໂຄງການກໍ່ສ້າງສະຖານີວິທະຍຸ-ໂທລະພາບ ແຂວງໄຊສົມບູນ ທີ່ຫ້ອງປະຊຸມພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງດັ່ງກ່າວ.

ທ່ານ ຮວ່າງ ແຄັງ ແທ່ງ ຮອງຫົວໜ້າຜູ້ຊີ້ນຳພາກສະໜາມ ຕາງໜ້າບໍລິສັດ ຮ່ວມມືເສດຖະກິດ ໂກເອກໂກ ຈຳ ກັດຜູ້ດຽວ ເຊີ່ງເປັນບໍລິສັດຮັບເໝົາກໍ່ສ້າງ ລາຍງານວ່າ: ໂຄງການກໍ່ສ້າງສະຖານີວິທະຍຸ-ໂທລະພາບ ແຂວງໄຊສົມບູນ ປະກອບມີ: ຫ້ອງການເຮັດວຽກອາຄານສອງຊັ້ນ, ເຮືອນຕິດຕັ້ງເຄື່ອງຈ່າຍສັນຍານ, ຫໍພັກພະນັກງານເຕັກນິກ, ເຮືອນຕິດຕັ້ງຈັກດູດນໍ້າ, ອ່າງນໍ້າໃຕ້ດິນ, ເຈາະນໍ້າບາດານ, ອ່າງກັ່ນຕອງນໍ້າ, ລະບົບດັບເພີງ, ລະບົບໄຟຟ້າ, ອຸປະກອນຄົບຊຸດ ແລະ ເສົາອັງແຕນ ສູງ 75 ແມັດ, ເລີ່ມລົງມືກໍ່ສ້າງມາແຕ່ເດືອນກຸມພາ ປີ 2020 ມາຮອດປັດຈຸບັນ ການກໍ່ສ້າງສໍາເລັດແລ້ວ 50% ຂອງໜ້າວຽກທັງໝົດ, ເຊີ່ງກໍານົດໄລຍະເວລາຕາມສັນຍາ 23 ເດືອນ, ມູນຄ່າຂອງການກໍ່ສ້າງທັງໝົດ 118.950.817.021 ດົ່ງ ໃນນັ້ນທຶນສົມທົບກັບລັດຖະບານລາວ ຈໍານວນ 1.800.000.000 ກີບ.

ໃນໂອກາດນີ້ ທ່ານ ສະຫວັນຄອນ ຣາຊະມຸນຕີ ຍັງໄດ້ນຳເອົາໂທລະໂຄງ ຈຳນວນ 1 ຊຸດ ໄປມອບໃຫ້ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງໄຊສົມບູນ. ຈາກນັ້ນ ທ່ານ ສະຫວັນຄອນ ຣາຊະມຸນຕີ ພ້ອມດ້ວຍຄະນະ ໄດ້ພ້ອມກັນລົງຢ້ຽມຢາມ ແລະ ກວດກາສະຖານທີ່ໂຄງການກໍ່ສ້າງຕົວຈິງ. ນອກຈາກນີ້ ໃນໂອກາດທີ່ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ໂຄງ ການກໍ່ສ້າງສະຖານີວິທະຍຸ-ໂທລະພາບ ແຂວງໄຊສົມບູນ ໃນຄັ້ງນີ້ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ພ້ອມດ້ວຍຄະນະ ຍັງໄດ້ເຂົ້າພົບປະຢ້ຽມຢາມ ທ່ານ ຄຳລຽງ ອຸທະໄກສອນ ເຈົ້າແຂວງໄຊສົມບູນ ເພື່ອປຶກສາຫາລືກ່ຽວກັບວຽກງານສື່ມວນຊົນຂອງແຂວງ ໄຊສົມບູນໃຫ້ມີການພັດທະນາຫລາຍຂຶ້ນກ່ວາເກົ່າ.

ຮຽບຮຽງຂ່າວ: ມົດແດງນ້ອຍ

ພາບ: ສຸກສັນ ອ້ວນລິດຕິກຸນ