ວັນທີ 7 ສິງຫານີ້, ຈີນໄດ້ເຜີຍແຜ່ຜົນງານການຄ້າກັບຕ່າງປະເທດໃນເດືອນຜ່ານມາ ຄື: ຍອດມູນຄ່າການນຳເຂົ້າ-ສົ່ງອອກການຄ້າສິນຄ້າປະເພດຈັບຕ້ອງໄດ້ ແມ່ນບັນລຸເຖິງ 24,830 ຕື້ຢວນ, ເພີ່ມຂຶ້ນ 6.2% ເມື່ອທຽບໃສ່ໄລຍະດຽວກັນຂອງປີ 2023.
ບົນພື້ນຖານທີ່ຈັງຫວະເພີ່ມຂອງການນຳເຂົ້າ-ສົ່ງອອກເພີ່ມໄວຂຶ້ນອີກໃນ 6 ເດືອນຕົ້ນປີນີ້, ປະລິມານການຄ້າກັບຕ່າງປະເທດໃນ 7 ເດືອນຜ່ານມາໄດ້ສ້າງສະຖິຕິສູງສຸດອີກຄັ້ງໃໝ່ເມື່ອທຽບໃສ່ໄລຍະດຽວກັນຂອງປີຜ່ນາມາ. ເຊິ່ງເປັນເລື່ອງທີ່ຫາຍາກພາຍໃຕ້ສະພາບເບື້ອງຫຼັງທີ່ຍັງມີຄວາມສ່ຽງດ້ານການເມືອງພູມີພາກທີ່ຍັງຂ້ອນຂ້າງສູງ ເຮັດໃຫ້ຕ່ອງໂສ້ການຜະລິດ ແລະ ຕ່ອງໂສ້ການສະໜອງໃນທົ່ວໂລກໄດ້ຮັບຜົນກະທົບໃນປັດຈຸບັນ.
ການຄ້າກັບຕ່າງປະເທດຂອງຈີນມີຄວາມໝັ້ນທ່ຽງ ແລະ ດີຂຶ້ນ, ບໍ່ພຽງແຕ່ໄດ້ສ່ອງແສງໃຫ້ເຫັນເຖິງຄວາມພະຍາຍາມ ແລະ ພະລັງຊີວິດຂອງເສດຖະກິດຈີນເທົ່ານັ້ນ, ແຕ່ຍັງໄດ້ນຳເອົາຂ່າວດີຫຼາຍຢ່າງມາໃຫ້ກັບໂລກອີກດ້ວຍ.
ຂ່າວດີທຳອິດນັ້ນກໍຄື ໂອກາດຈາກຕະຫຼາດຂະໜາດໃຫຍ່ພິເສດຂອງຈີນ. ນັກວິເຄາະພາກັນເຫັນວ່າ, ຄຽງຄູ່ກັບຈີນໄດ້ບັນລຸການພັດທະນາທີ່ມີຄຸນນະພາບສູງ, ການບໍລິໂພກທີ່ມີທ່ວງທ່າເນັ້ນບຸກຄະລິກພິເສດ ຫຼາຍຮູບແບບ ແລະ ເນັ້ນຄຸນນະພາບນັ້ນນັບມື້ນັບພົ້ນເດັ່ນຂຶ້ນ, ຈະກາຍເປັນແຮງຂັບເຄື່ອນທີ່ສຳຄັນສຳລັບການນຳເຂົ້າ. ຈີນເພີ່ມທະວີການນຳເຂົ້າ ເປີດກວ້າງການອະນຸຍາດໃຫ້ເຂົ້າເຖິງຕະຫຼາດຜະລິດຕະພັນກະສິກຳ ແລະ ອາຫານການກິນຢ່າງໝັ້ນທ່ຽງ ເປັນລະບຽບ, ຈະອຳນວຍຄວາມສະດວກຫຼາຍກວ່າເກົ່າໃຫ້ແກ່ປະເທດຕ່າງໆຮ່ວມກັນຊົມໃຊ້ຕະຫຼາດຂອງຈີນ.
ພ້ອມກັນນັ້ນ, ຈີນໄດ້ພັດທະນາກຳລັງການຜະລິດໃນຄຸນນະພາບໃໝ່ຕາມເງື່ອນໄຂທ່າແຮງຂອງທ້ອງຖິ່ນຕ່າງໆ, ໄດ້ສ້າງແຮງຂັບເຄື່ອນອັນໃໝ່ໃຫ້ແກ່ໂລກ. ໃນລະດູຮ້ອນປີນີ້, “ຜະລິດຕະພັນຂອງຈີນ” ໄດ້ເສີມຂະຫຍາຍບົດບາດອັນພົ້ນເດັ່ນໃນງານກິລາໂອລິມປິກປາຣີ. ວິສາຫະກິດຈີນໄດ້ນຳໃຊ້ວິທີການໃໝ່ຈຳນວນຫຼວງ ຫຼາຍ ທ່າແຮງດ້ານຕ່ອງໂສ້ອຸດສາຫະກຳ ແລະ ການສະໜອງທີ່ຄົບຖ້ວນ ກຳລັງການຜະລິດທີ່ເຂັ້ມແຂງ ເຊິ່ງໄດ້ສະໜອງຜະລິດຕະພັນ ແລະ ການບໍລິການທີ່ດີເດັ່ນໃຫ້ແກ່ໂລກ.
ເມື່ອເບິ່ງຈາກໄລຍະຍາວໄກແລ້ວເຫັນວ່າ,ການຄ້າກັບຕ່າງປະເທດຂອງຈີນໄດ້ເສີມຂະຫຍາຍບົດບາດທີ່ຕັ້ງໜ້າໃນການຮັກສາຄວາມໝັ້ນທ່ຽງຂອງຕ່ອງໂສ້ອຸດສາຫະກຳ ແລະຕ່ອງໂສ້ການສະໜອງຂອງໂລກ. ນັບຕັ້ງແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກຄອມມູນິດຈີນເປັນຕົ້ນມາ, ມູນຄ່າການຄ້າກັບຕ່າງປະເທດຂອງຈີນໄດ້ເພີ່ມຂຶ້ນ 1,600 ຕື້ຢວນສະເລ່ຍຕໍ່ປີ, ເທົ່າກັບຍອດມູນຄ່າການນຳເຂົ້າ-ສົ່ງອອກຂອງປະເທດລະດັບກາງ. ນັບມາຮອດທ້າຍເດືອນກໍລະກົດທີ່ຜ່ານມາ, ຂະບວນລົດໄຟຈີນ-ເອີຣົບໄດ້ໃຫ້ບໍລິການຫຼາຍກວ່າ 1 ໝື່ນຖ້ຽວ, ກາຍເປັນເສັ້ນທາງຂົນສົ່ງທີ່ຮັບປະກັນຄວາມໝັ້ນຄົງແຫ່ງຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງຂອງໂລກ.
